ಅಂಗಾಳ ಪರಮೇಶ್ವರಿ ದೇವಿಗೆ ವಾರ್ಷಿಕ ಪೂಜೆ

ಅರ್ಚಕ ವಿಜಯಕುಮಾರ್ ನೇತೃತ್ವದಲ್ಲಿ ಆರಂಭವಾದ ಪೂಜಾ ಕೈಂಕರ್ಯದಲ್ಲಿ ಹೋಬಳಿಯ ಹಾಗೂ ಹೊರಪ್ರದೇಶಗಳಿಂದ ಅಧಿಕವಾಗಿ ಭಕ್ತರು ಆಗಮಿಸಿದ್ದರು. ದೂರದ ಊರುಗಳಿಂದ ದೇವಿಯ ಭಕ್ತರು ಹರಕೆ ಹೊತ್ತು ಮೆಣಸಿನಕಾಯಿಯನ್ನು ಹೋಮಕ್ಕಾಗಿ ತಂದು ಗುಡಿಯಲ್ಲಿ ಇಟ್ಟು ದೇವಿಯ ಉತ್ಸವದಲ್ಲಿ ಭಾಗಿಯಾದರು.

ಗ್ರಾಮದ ಪ್ರಮುಖ ಬೀದಿಯಲ್ಲಿ ಅಮ್ಮನವರ ಮೆರವಣಿಗೆ ಸಾಗಿ ಅಮಾನಿಕೆರೆಯಲ್ಲಿ ಗಂಗಾಸ್ನಾನ, ಗಂಗಾಪೂಜೆಗೆ ಸಜ್ಜಾದರು. ಪ್ರೇಮಕವಿ ಕೆ.ಎಸ್. ನರಸಿಂಹಸ್ವಾಮಿ ಕಾವ್ಯಸ್ಫೂರ್ತಿಯ ಅಶ್ವಥವೃಕ್ಷದ ಸೋಪಾನಕಟ್ಟೆ ಬಳಿ ದೇವಿಯನ್ನು ಪೂಜೆಗಾಗಿ ಇಡಲಾಯಿತು. ಕಳಸಗಳನ್ನು ಇಟ್ಟು ಗಂಗೆಯನ್ನು ತುಂಬಲಾಯಿತು. ಬಳಿಕ ಹೊಂಬಾಳೆ, ಹೂವಿನಿಂದ ಅಲಂಕರಿಸಲಾಯಿತು. ಅಂಗಾಳಪರಮೇಶ್ವರಿ ಉತ್ಸವಮೂರ್ತಿಗೆ ಪುಷ್ಪಾಲಂಕಾರ ನೆರವೇರಿಸಲಾಯಿತು. ಕಳಸಕ್ಕೆ ದೇವಿಯ ಅವಾಹನೆ ಮಾಡಲಾಯಿತು. ಉತ್ಸವಮೂರ್ತಿ, ಕಳಸಗಳನ್ನು ಅಷ್ಟದ್ರವ್ಯಗಳಿಂದ ಪೂಜಿಸಲಾಯಿತು.

ಸುಮಂಗಲಿಯರು ದೇವಿಯ ಹೊಂಬಾಳೆ ಕಳಸವನ್ನು, ಉತ್ಸವ ದೇವಿಯನ್ನು ಅರ್ಚಕ ವಿಜಯಕುಮಾರ್ ತಲೆ ಮೇಲೆ ಹೊತ್ತಿ ಸಾಗಿದರು. ದೇವಿಗೆ ಜೈಕಾರ ಹಾಕುತ್ತ ಭಕ್ತರು ಸಾಲು ಸಾಲು ನಡೆದರು. ಕಂಕಣ ಕಟ್ಟಿಕೊಂಡ ಭಕ್ತರು ಉಪವಾಸವಿದ್ದು ದೇವಿಗೆ ಹರಕೆ ಒಪ್ಪಿಸಿದರು. ಚಂಡೆ ವಾದ್ಯ ಮೇಳದ ಜತೆಗೆ ಭಕ್ತರು ದೇವಿಯ ನಾಮ ಪಠಿಸುತ್ತ ನರ್ತಿಸಿದರು.

ಅಷ್ಟೋತ್ತರ ಪಠಣೆ, ಸಹಸ್ರನಾಮಾವಳಿಯಂತಹ ಧಾರ್ಮಿಕ ಕಾರ್ಯಕ್ರಮಗಳು ನಡೆದವು. ದಾರಿಯುದ್ದಕ್ಕೂ ದೇವಿಗೆ ಈಡುಗಾಯಿ ಅರ್ಪಿಸಲಾಯಿತು. ತದನಂತರ ದೇವಿ ಗುಡಿ ಬಳಿ ಉತ್ಸವಮೂರ್ತಿ ಸಾಗಿತು. ರಾತ್ರಿ ನಡೆಯುವ ಪ್ರತ್ಯಾಂಗೀರಾ ಹೋಮಕ್ಕೆ ಭಕ್ತರು ಸಜ್ಜಾದರು.