ಕ್ರಿಯಾಶೀಲತೆಗೆ ಸಾಕ್ಷಿಯಾದ ಕಲಿಕಾ ಹಬ್ಬ

ಮೇಲುಕೋಟೆ ಸರ್ಕಾರಿ ಹಿರಿಯ ಪ್ರಾಥಮಿಕ ಬಾಲಕರ ಶಾಲೆಯಲ್ಲಿ ಆಯೋಜಿಸಿದ್ದ ಕಲಿಕಾಹಬ್ಬದಲ್ಲಿ ವಿಜೇತ ಮಕ್ಕಳಿಗೆ ಬಹುಮಾನ ವಿತರಿಸಲಾಯಿತು.

Published on:

19 Dec 2025, 1:10 pm

ಪ್ರಮುಖ ಮುಖ್ಯಾಂಶಗಳು

ಮೇಲುಕೋಟೆಯಲ್ಲಿ ಚಿಣ್ಣರ ಸಂಭ್ರಮ
ಸರ್ಕಾರಿ ಹಿರಿಯ ಪ್ರಾಥಮಿಕ ಬಾಲಕರ ಶಾಲೆಯಲ್ಲಿ ಆಯೋಜನೆ

ಮೇಲುಕೋಟೆ: ಶಾಲಾ ಶಿಕ್ಷಣ ಇಲಾಖೆಯ ಮಹತ್ವಾಕಾಂಕ್ಷಿ ಕಲಿಕಾಹಬ್ಬ ಮೇಲುಕೋಟೆಯ ಸರ್ಕಾರಿ ಹಿರಿಯ ಪ್ರಾಥಮಿಕ ಬಾಲಕರ ಶಾಲೆಯಲ್ಲಿ ಶುಕ್ರವಾರ ಅರ್ಥಪೂರ್ಣವಾಗಿ ನೆರವೇರಿತು.

ಕ್ಲಸ್ಟ್‌ರ್ ಮಟ್ಟದ ಶಾಲೆಗಳ ಒಂದರಿಂದ ಐದನೇ ತರಗತಿಯವರೆಗಿನ ಎಫ್‌ಎಲ್‌ಎನ್ ಸಾಮರ್ಥ್ಯ ಕಲಿತ ನೂರಕ್ಕೂ ಹೆಚ್ಚು ಮಕ್ಕಳು ಪಾಲ್ಗೊಂಡು ತಮ್ಮ ಕಲಿಕೆಯನ್ನು ಪ್ರದರ್ಶಿಸಿ ಬಹುಮಾನಗಳನ್ನು ತಮ್ಮದಾಗಿಸಿಕೊಂಡರು.

ಕಲಿಕಾಹಬ್ಬದಲ್ಲಿ ಮಕ್ಕಳ ಉತ್ತೇಜನಕ್ಕಾಗಿ ಏಳು ವಿಭಾಗದಲ್ಲಿ ಮಕ್ಕಳ ಬುದ್ಧಿಶಕ್ತಿ ಪರೀಕ್ಷೆಗೆ ಆಕರ್ಷಕ ಸ್ಟಾಲ್‌ಗಳನ್ನು ತೆರೆಯಲಾಗಿತ್ತು. ಕಥೆಹೇಳುವುದು, ಗಟ್ಟಿ ಓದು, ಪಾಲಕರೊಂದಿಗೆ ಸಂಬಂಧ, ರಸಪ್ರಶ್ನೆ, ಸಂತಸದಾಯಕ ಗಣಿತ, ಪರಿಸರ ಮಹತ್ವದ ವೇಷಭೂಷಣದೊಂದಿಗೆ ಪಾತ್ರಾಭಿನಯ, ಆಹಾರದೊಂದಿಗೆ ಪೌಷ್ಟಿಕಾಂಶ ಬಳಕೆಯ ಬಗ್ಗೆ ಪ್ರತೀ ಕೊಠಡಿಯಲ್ಲಿ ತೆರೆದ ಸ್ಟಾಲ್‌ನಲ್ಲಿ ಮಕ್ಕಳು ಉತ್ಸಾಹದಿಂದ ಭಾಗವಹಿಸಿ ತಮ್ಮ ಚತುರತೆ ಪ್ರದರ್ಶಿಸಿದರು.

ಭಾಗವಹಿಸಿದ್ದ 100 ಮಕ್ಕಳ ಪೈಕಿ 21 ವಿಜೇತ ಮಕ್ಕಳಿಗೆ ಇಲಾಖೆಯಿಂದ ಬಹುಮಾನ ವಿತರಿಸಲಾಯಿತು. ಉಳಿದ ಎಲ್ಲ ಮಕ್ಕಳಿಗೆ ಬಾಲಕರ ಶಾಲೆಯ ಮುಖ್ಯಶಿಕ್ಷಕ ಸ್ಥಾನೀಕಂ ಸಂತಾನರಾಮನ್ ಸಮಾಧಾನಕರ ಬಹುಮಾನವಾಗಿ ರೈಟಿಂಗ್‌ಪ್ಯಾಡ್ ನೀಡಿದರು. ಮಕ್ಕಳಿಗೆ ಕೇಸರಿಬಾತ್‌ನೊಂದಿಗೆ ಮೇಲುಕೋಟೆಯ ವಿಶಿಷ್ಟ ಪ್ರಸಾದ ಕದಂಬ ಮತ್ತು ಮೊಸರನ್ನದ ಸವಿಯ ಉಣ ಬಡಿಸಲಾಯಿತು.

ಶಾಲಾ ಆವರಣವನ್ನು ತಳಿರುತೋರಣ, ಬಲೂನ್‌ಗಳಿಂದ ಸಿಂಗರಿಸಲಾಗಿತ್ತು. ಮಕ್ಕಳು ಸೆಲ್ಫಿ ತೆಗೆದುಕೊಳ್ಳಲು ಇಲಾಖೆ ಕಾರ್ಯಕ್ರಮಗಳನ್ನು ಬರೆದು ಕಲಿಕಾಹಬ್ಬಕ್ಕೆ ಹೋಗೋಣ ಎಂದು ಬರೆದು ಮಾಡಿದ್ದ ಬಸ್ ಮಾದರಿ ಮತ್ತು ಎಫ್‌ಎಲ್‌ಎನ್ ಟೋಪಿಗಳು ಕ್ಲಸ್ಟರ್‌ನ ಶಿಕ್ಷಕರ ಕ್ರಿಯಾಶೀಲತೆಗೆ ಸಾಕ್ಷಿಯಾಗಿದ್ದವು.

ಮೇಲುಕೋಟೆ ಸಿಆರ್‌ಪಿ ಬೆಟ್ಟಸ್ವಾಮಿಗೌಡ ಮಾತನಾಡಿ, ಪಾಂಡವಪುರ ತಾಲೂಕಿನ 14 ಕ್ಲಸ್ಟರ್‌ಗಳಲ್ಲೂ ಮೂರು ಹಂತಗಳಲ್ಲಿ ಕಲಿಕಾ ಹಬ್ಬವನ್ನು ನಡೆಸಲಾಗುತ್ತಿದೆ. ಮೇಲುಕೋಟೆ ಮತ್ತು ಜಕ್ಕನಹಳ್ಳಿ ಕ್ಲಸ್ಟರ್‌ನಲ್ಲಿ ಅಚ್ಚುಕಟ್ಟಾಗಿ ಕಲಿಕಾಹಬ್ಬ ಆಯೋಜಿಸಿದ್ದು, 20 ಶಾಲೆಗಳ ನೂರಾರು ಮಕ್ಕಳು ಭಾಗವಹಿಸಿದ್ದಾರೆ ಎಂದರು.

ಕಲಿಕಾ ಹಬ್ಬದ ಸಂಪನ್ಮೂಲ ವ್ಯಕ್ತಿಗಳಾಗಿ ಶಿಕ್ಷಕರಾದ ಜಕ್ಕನಹಳ್ಳಿಯ ಮೆಹರ ಸುಲ್ತಾನ, ಬಳಿಘಟ್ಟ ಮಹಾಲಕ್ಷ್ಮೀ, ಶ್ರುತಿ ಕಳ್ಳಿಮನಿ, ವಿನುತಾ, ಪಗಡೆಕಲ್ಲಹಳ್ಳಿಯ ಮಹೇಶ್, ಮೇಲುಕೋಟೆಯ ಕಾವ್ಯಾ, ಬಿ.ಜಯಂತಿ, ಪೂರ್ಣಿಮಾ, ಮಂಜುಳಾ, ಅಮೃತಾ, ರಾಧಾಮಣಿ, ಶಂಭೂನಹಳ್ಳಿ ಹೇಮಲತಾ, ದೇವರಹಳ್ಳಿಯ ಅಮರನಾಥ್, ನ್ಯಾಮನಹಳ್ಳಿಯ ಜ್ಯೋತಿ, ಕಾದಲಗೆರೆಯ ಸತ್ಯಭಾಮಾ, ಸಂಗಾಪುರ ಆನಂದ್ ಕ್ರಿಯಾತ್ಮಕ ಚಟುವಟಿಕೆಗಳನ್ನು ಆಯೋಜಿಸುವ ಮೂಲಕ ಕಲಿಕಾ ಸ್ಟಾಲ್‌ಗಳನ್ನು ನಿರ್ವಹಿಸಿದರು.

ಗ್ರಾಮ ಪಂಚಾಯಿತಿ ಪಿಡಿಒ ರಾಜೇಶ್ವರ್, ಡಾ.ವೆಂಕಟರಾಮೇಗೌಡ, ಪದವೀಧರ ಶಿಕ್ಷಕರ ಸಂಘದ ಮಂಡ್ಯ ಜಿಲ್ಲಾಧ್ಯಕ್ಷ ವಿಜಯಕುಮಾರ್, ಭಾಗವಹಿಸಿದ್ದರು.

ಮೇಲುಕೋಟೆಗೆ ಬೇಕಿದೆ ಸರ್ಕಾರಿ ಪ್ರೌಢಶಾಲೆ

ಸುತ್ತಮುತ್ತಲ ಹಳ್ಳಿಗಾಡಿನ ಮಕ್ಕಳ ವಿದ್ಯಾಭ್ಯಾಸಕ್ಕಾಗಿ ಮೇಲುಕೋಟೆಗೆ ಸರ್ಕಾರಿ ಪ್ರೌಢಶಾಲೆ ಮಂಜೂರಾಗಬೇಕಾದ ಅಗತ್ಯತೆ ಎಂದು ಪದವೀಧರ ಶಿಕ್ಷಕರ ಸಂಘದ ಮಂಡ್ಯ ಜಿಲ್ಲಾಧ್ಯಕ್ಷ ವಿಜಯಕುಮಾರ್ ತಿಳಿಸಿದರು.

ಮೇಲುಕೋಟೆಯಲ್ಲಿದ್ದ ಅನುದಾನಿತ ಯದುಶೈಲ ಪ್ರೌಢಶಾಲೆ ಕಾರಣಾಂತರದಿಂದ ಮುಚ್ಚಿಹೋಗಿದೆ. ಈ ಭಾಗದ ಬಡಮಕ್ಕಳು ಅದರಲ್ಲೂ ಹೆಣ್ಣುಮಕ್ಕಳು ಪ್ರೌಡಶಾಲಾ ಶಿಕ್ಷಣಕ್ಕೆ 10 ಕಿ.ಮೀ.ಗೂ ಹೆಚ್ಚು ಪ್ರಯಾಣಿಸಬೇಕಾದ ಅನಿವಾರ್ಯತೆಯಿದೆ. ರಾಜ್ಯ ಮಟ್ಟದ ಉತ್ತಮ ಶಿಕ್ಷಕ ಪ್ರಶಸ್ತಿ ಪುರಸ್ಕೃತ ಮುಖ್ಯಶಿಕ್ಷಕ ಸಂತಾನರಾಮನ್ ಮೇಲುಕೋಟೆಗೆ ಸರ್ಕಾರಿ ಪ್ರೌಢಶಾಲೆ ಮಂಜೂರು ಮಾಡಿಸಲು ಶಾಸಕರು ಮತ್ತು ಸಚಿವರನ್ನು ಸಂಪರ್ಕಿಸಿ ಪಾಲಕರ ಪರವಾಗಿ ನಿಲ್ಲಬೇಕು. ಇಲಾಖೆಯ ಅಧಿಕಾರಿಗಳು ಸಹ ಸಹಕಾರ ನೀಡುತ್ತಾರೆ. ಇದು ನಿಮ್ಮ ನಿಜವಾದ ಶೈಕ್ಷಣಿಕ ಸೇವೆಯಾಗಲಿದೆ. ನಾವೆಲ್ಲರೂ ನಿಮಗೆ ಸಹಕಾರ ನೀಡಲು ಸಿದ್ಧರಿದ್ದೇವೆ ಎಂದರು.

Melukote