ಬಿಕಾಂ ಪದವೀಧರನ ಸಮಗ್ರ ಕೃಷಿ ಪ್ರೀತಿ

ತಾಲೂಕಿನ ಕೆ.ಹೊನ್ನಲಗೆರೆ ಗ್ರಾಮದ ನಿವಾಸಿ ದಿ.ದೊಡ್ಡ ಚೌಡಯ್ಯ ಅವರ ಪುತ್ರ ರಘುವೀರ್ ಚಿಕ್ಕ ವಯಸ್ಸಿನಲ್ಲೇ ಕೃಷಿಯಲ್ಲಿ ಯಶಸ್ಸು ಸಾಧಿಸಿದ್ದಾರೆ. ರಘುವೀರ್‌ಗೆ ಸುಮಾರು ಮೂರೂವರೆ ಎಕರೆಯಿದ್ದು, ಸುಗಂಧರಾಜ, ಟೊಮ್ಯಾಟೊ, ಹೀರೆಕಾಯಿ, ಕ್ಯಾನ್ಸರ್ ಗುಣಪಡಿಸುವ ಲಕ್ಷ್ಮಿತರು, ಹನುಮಂತಫಲ, ಹಲಸು, ನೇರಳೆ, 18 ಮೇಕೆ, ಒಂದೂವರೆ ಸಾವಿರ ಮೀನು ಸಾಕಣೆ, ಎರೆಹುಳ ಗೊಬ್ಬರ ತಯಾರಿಕೆ, ನೂರು ತೆಂಗಿನ ಸಸಿ, 100 ಗೊಬ್ಬರ ಗಿಡಗಳು, ಜೋಳ, 5 ಎಚ್.ಎಫ್.ಹಸುಗಳು, 1 ಎಮ್ಮೆ ಸೇರಿದಂತೆ ವಿವಿಧ ರೀತಿಯ ಭತ್ತದ ಬೆಳೆಗಳನ್ನು ಬೆಳೆದು ವರ್ಷಕ್ಕೆ ಸುಮಾರು 7 ರಿಂದ 8 ಲಕ್ಷ ರೂ. ಸಂಪಾದಿಸುತ್ತಿದ್ದಾರೆ.

ಆರಂಭದಲ್ಲಿ ಜಮೀನು ಬರಡು ಭೂಮಿಯಂತಿತ್ತು. ಹಂತ ಹಂತವಾಗಿ ಅದನ್ನು ವ್ಯವಸಾಯಕ್ಕೆ ಯೋಗ್ಯವಾಗುವಂತೆ ಹದಮಾಡಿ ಇದೀಗ ಅಚ್ಚ ಹಸಿರಾಗುವಂತೆ ಮಾಡಿರುವುದು ಇವರ ಕೃಷಿ ಪ್ರೀತಿಗೆ ಸಾಕ್ಷಿಯಾಗಿದೆ. ಜಮೀನಿನಲ್ಲಿ ಒಂದು ಬೋರ್‌ವೆಲ್ ಇದ್ದು, ಇದರೊಂದಿಗೆ 2 ರೋಟೋವೇಟರ್, 1 ಡೀಸೆಲ್ ಮೋಟಾರ್ ಪಂಪ್‌ಸೆಟ್ ಸೇರಿದಂತೆ ಇತರ

ಯಂತ್ರೋಪಕರಣಗಳಿವೆ. ಅವಶ್ಯಕತೆ ಇದ್ದಾಗ ಮಾತ್ರ ಕೃಷಿ ಕಾರ್ಮಿಕರನ್ನು ಬಳಸಿಕೊಳ್ಳುತ್ತಾರೆ. ಇನ್ನು ಬೆಳೆಗಳಿಗೆ ಯಾವುದೇ ರೀತಿಯ ರಾಸಾಯನಿಕ ಗೊಬ್ಬರ ಬಳಕೆ ಮಾಡುವುದಿಲ್ಲ. ಬದಲಾಗಿ ಕೊಟ್ಟಿಗೆ ಗೊಬ್ಬರ ಬಳಕೆಗೆ ಹೆಚ್ಚಿನ ಮಹತ್ವ ನೀಡಲಾಗಿದ್ದು, ಇದರಿಂದ ಭೂಮಿಯ ಫಲವತ್ತತೆ ಹೆಚ್ಚುವ ಜತೆಗೆ ಉತ್ತಮ ಫಸಲು ಬರುವಂತೆ ನೋಡಿಕೊಂಡಿದ್ದಾರೆ. ಮುಂದಿನ ದಿನಗಳಲ್ಲಿ ಕೃಷಿ ಕೈಗಾರಿಕೆ ಮಾಡುವ ಮೂಲಕ ಸ್ಥಳೀಯ ನಿರುದ್ಯೋಗ ಯುವಕರಿಗೆ ಕೆಲಸ ಕೊಡಬೇಕು ಎಂಬುದು ಇವರ ಹಂಬಲವಾಗಿದ್ದು, ಹಣಬೆ ಬೇಸಾಯ ಮಾಡಬೇಕೆಂಬುದೂ ಇವರ ಗುರಿಯಾಗಿದೆ.

ರಘುವೀರ್ ಉತ್ತಮ ಕೃಷಿಕನಾಗಿರುವನೊಂದಿಗೆ ತೆರಿಗೆ ಸಲಹೆಗಾರರಾಗಿ ಮದ್ದೂರು ಮತ್ತು ಬೆಂಗಳೂರಿನಲ್ಲಿ ಕೆಲಸ ನಿರ್ವಹಿಸುತ್ತಿದ್ದಾರೆ. ಚಿಕ್ಕ ವಯಸ್ಸಿನಿಂದಲೇ ಕೃಷಿ ಮೇಲಿನ ಅಪಾರ ಪ್ರೀತಿಯಿದ್ದುದ್ದರಿಂದ ಕೃಷಿ, ತೋಟಗಾರಿಕೆ ಸೇರಿದಂತೆ ಇತರ ಅಧಿಕಾರಿಗಳ ಮಾರ್ಗದರ್ಶನದಲ್ಲಿ ಮಾಹಿತಿ ಪಡೆದು ಸಮಗ್ರ ಕೃಷಿ ಮಾಡಿ ಕೈ ಎನಿಸಿಕೊಂಡಿದ್ದಾರೆ.

ಹೆಚ್ಚು ಕೃಷಿ ಚಟುವಟಿಕೆಯಲ್ಲಿ ತೊಡಗಿಕೊಳ್ಳಬೇಕೆಂಬ ಉದ್ದೇಶದಿಂದ ಬೆಂಗಳೂರಿನ ಹೆಸರುಘಟ್ಟದಲ್ಲಿ ಮೂರು ದಿನಗಳ ಕಾಲ ಆಯೋಜಿಸಿದ್ದ ಐಐಎಚ್‌ಆರ್(ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಹಾರ್ಟಿಕಲ್ಚರ್ ರಿಸರ್ಚ್) ತರಬೇತಿಯಲ್ಲಿ ಭಾಗವಹಿಸಿ ಹಲವು ಮಾಹಿತಿ ಪಡೆದು ಅಳವಡಿಸಿಕೊಳ್ಳುತ್ತಿದ್ದಾರೆ. ಇದಲ್ಲದೆ ಬೆಂಗಳೂರಿನಲ್ಲಿ ಆಯೋಜಿಸಿದ್ದ ಎರಡು ದಿನಗಳು ಮೀನು ಸಾಕಣೆ ತರಬೇತಿ ಹಾಗೂ ಮೈಸೂರಿನಲ್ಲಿ ಆಯೋಜಿಸಿದ್ದ ತೆಂಗಿನ ನಾರಿನ ಗೊಬ್ಬರ ತಯಾರಿಕೆ ಮಾಡುವುದರ ಬಗ್ಗೆ ಅರಿತು ಬೇಸಾಯ ಮಾಡುತ್ತಿರುವುದರಿಂದ ಹೆಚ್ಚಿನ ಲಾಭ ಗಳಿಸಲು ಅನುಕೂಲವಾಗಿದೆ.

ಪತಿಯ ಕೃಷಿ ಪ್ರೀತಿಗೆ ಪತ್ನಿ ರೇಣುಕಾದೇವಿ ಕುಟುಂಬ ವರ್ಗ ಸಾಥ್ ನೀಡುತ್ತಿದೆ. ಕೃಷಿ ಇಲಾಖೆಯ ಗವಾಸ್ಕರ್, ತೋಟಗಾರಿಕೆ ಇಲಾಖೆಯ ಸಂಪತ್‌ಕುಮಾರ್, ರೇಖಾ ಹಾಗೂ ಪದ್ಮಾ ಅಗತ್ಯ ಸಹಕಾರ ನೀಡುತ್ತಿದ್ದಾರೆ. ರಘವೀರ್ ಅವರ ಕೃಷಿ ಪ್ರೀತಿಯನ್ನು ಮೆಚ್ಚಿ 2024 ರಲ್ಲಿ ರಾಮನಗರದ ಸಂಸ್ಕೃತಿ ಸೌರಭ ಟ್ರಸ್ಟ್ ಕನ್ನಡ ರಾಜ್ಯೋತ್ಸವ ಪುರಸ್ಕಾರ ನೀಡಿ ಗೌರವಿಸಿದೆ.