28 ರಂದು ವೈರಮುಡಿ, ರಾಜಮುಡಿ ಉತ್ಸವ

ವೈರಮುಡಿ ಉತ್ಸವ ಮುಗಿಯುತ್ತಿದ್ದಂತೆ ಮೈಸೂರು ದೊರೆ ರಾಜ ಒಡೆಯರ್ ಸಮರ್ಪಿಸಿದ ವಜ್ರಖಚಿತ ರಾಜಮುಡಿ ಕಿರೀಟ ಧರಿಸಿ ರಾಜಮುಡಿ ಉತ್ಸವ ನೆರವೇರಿಸಲಾಗುತ್ತದೆ. ಇಡೀ ಭಾರತದ ದೇವಾಲಯಗಳ ಪೈಕಿ ಒಂದೇ ರಾತ್ರಿ ಅಪರೂಪದ ಎರಡು ವಜ್ರದ ಕಿರೀಟಗಳ ಐತಿಹಾಸಿಕ ಉತ್ಸವ ನಡೆಯುವುದು ಚೆಲುವನಾರಾಯಣಸ್ವಾಮಿಯ ವೈರಮುಡಿ ಬ್ರಹ್ಮೋತ್ಸವದ ವಿಶೇಷವಾಗಿದೆ.

ಹತ್ತು ದಿನಗಳ ವೈರಮುಡಿ ಬ್ರಹ್ಮೋತ್ಸವದ ಧಾರ್ಮಿಕ ಕಾರ್ಯಕ್ರಮಗಳು ಮಾ. 23ರಿಂದಲೇ ಆರಂಭವಾಗಿ ಏಪ್ರಿಲ್ 4ರವರೆಗೆ ವೈಭವದಿಂದ ನೆರವೇರಲಿದೆ. ವೈರಮುಡಿ, ರಥೋತ್ಸವ, ಮಹಾಭಿಷೇಕಗಳಂದು ಸರ್ಕಾರಿ ರಜಾಇರುವ ಕಾರಣ ಈ ವರ್ಷ ಕಳೆದ ವರ್ಷಕ್ಕಿಂತ ಹೆಚ್ಚಿನ ಭಕ್ತರು ಆಗಮಿಸುವ ನಿರೀಕ್ಷೆಯಿದೆ. ಬ್ರಹ್ಮೋತ್ಸವದ ವೇಳೆ ಇಡೀ ಮೇಲುಕೋಟೆ ದೀಪಾಲಂಕಾರದಿಂದ ಕಂಗೊಳಿಸಲಿದ್ದು ಜಿಲ್ಲಾಕೇಂದ್ರ ಮಂಡ್ಯ, ಮೈಸೂರು ಸೇರಿದಂತೆ ವಿವಿಧ ನಗರಗಳಿಂದ ಉತ್ಸವಗಳಿಗೆ ಬಂದು ಹೋಗಲು ಭಕ್ತರಿಗೆ ರಾಜ್ಯ ರಸ್ತೆ ಸಾರಿಗೆ ನಿಗಮ ವಿಶೇಷ ಬಸ್ ಸೌಕರ್ಯ ಕಲ್ಪಿಸಿದೆ.

ವೈರಮುಡಿ ಉತ್ಸವವಲ್ಲದೆ ಜಾತ್ರೆಯಲ್ಲಿ ಪ್ರಮುಖ ಮಹೋತ್ಸವಗಳು ನೆರವೇರಲಿದ್ದು ಮಾ.24 ರಂದು ಸಂಜೆ 5ರಿಂದ 10 ರವರೆಗೆ ಕಲ್ಯಾಣೋತ್ಸವ, 25 ರಂದು ಬೆಳಗ್ಗೆ 8 ರಿಂದ 10 ರವರೆಗೆ ಗರುಡಧ್ವಜಾರೋಹಣ, 26ರಂದು ಬೆಳಗ್ಗೆ 10 ಗಂಟೆಯಿಂದ 2ಗಂಟೆಯವರೆಗೆ ಆರಿದ್ರಾ ಮಾಸ ತಿರುನಕ್ಷತ್ರ ವಿಶೇಷವಾಗಿ ರಾಮಾನುಜಾಚಾರ್ಯರಿಗೆ ಅಭಿಷೇಕ, 27ರಂದು ಶ್ರೀರಾಮನವಮಿ, ಮಧ್ಯಾಹ್ನ 2 ರಿಂದ 9 ರವರೆಗೆ ನಾಗವಲ್ಲಿ ಮಹೋತ್ಸವ ನಡೆಯಲಿದೆ.

ವೈರಮುಡಿ ಜಾತ್ರಾಮಹೋತ್ಸವದ ಮತ್ತೊಂದು ಪ್ರಮುಖ ಮಹೋತ್ಸವ ಚೆಲುವನಾರಾಯಣಸ್ವಾಮಿಯವರ ಮಹಾರಥೋತ್ಸವ ಮಾ.31ರಂದು ಬೆಳಗ್ಗೆ 7-30 ರಿಂದ 3ರವರೆಗೆ ನಡೆಯಲಿದೆ. ರಾಮಾನುಜರು ನಾಮಕರಣ ಪ್ರೀತಿಯಿಂದ ಹೆಸರಿಸಿದ ತಿರುಕುಲತ್ತಾರ್ ಹರಿಜನರ ಸೇವೆಯಾದ ಪುಷ್ಪಾಲಂಕೃತ ಬಂಗಾರದ ಪಲ್ಲಕ್ಕಿ ಉತ್ಸವ ರಾತ್ರಿ ನೆರವೇರಲಿದೆ. ಇದಕ್ಕೂ ಮುನ್ನಾ ದಿನವಾದ ಮಾ.30ರಂದು ಗಜೇಂದ್ರಮೋಕ್ಷ ಉತ್ಸವ, ಏಪ್ರಿಲ್ 1 ರಂದು ರಾತ್ರಿ ಕಲ್ಯಾಣಿಯಲ್ಲಿ ತೆಪ್ಪೋತ್ಸವ ಏ.2 ರಂದು ಬೆಳಗ್ಗೆ ತೀರ್ಥಸ್ನಾನ, ಸಂಜೆ ಪಟ್ಟಾಭಿಷೇಕ, ಏ.3 ರಂದು ಚೆಲುವನಾರಾಯಣಸ್ವಾಮಿಗೆ ಮಹಾಭಿಷೇಕ, ಏ.4 ರಂದು ಬೆಟ್ಟದೊಡೆಯ ಯೋಗನರಸಿಂಹಸ್ವಾಮಿ ಮತ್ತು ಮಹಾಲಕ್ಷ್ಮೀ ಮಹಾಭಿಷೇಕ ನೆರವೇರಲಿದೆ.

ವೈರಮುಡಿ ಜಾತ್ರಾಮಹೋತ್ಸವದಲ್ಲಿ ವೈಭವದ ವಾಹನೋತ್ಸವಗಳು ಸಹ ನೆರವೇರಲಿದೆ. ಮಾ.25ರಂದು ಬೆಳಗ್ಗೆ ಮಂಟಪವಾಹನೋತ್ಸವ, ರಾತ್ರಿ ಹಂಸವಾಹನೋತ್ಸವ, 26 ರಾತ್ರಿ ಶೇಷವಾಹನೋತ್ಸವ, 27 ರಂದು ರಾತ್ರಿ ಚಂದ್ರಮಂಡಲವಾಹನೋತ್ಸವ, 29 ರಂದು ರಾತ್ರಿ ಗರುಡವಾಹನೋತ್ಸವ, 30 ರಂದು ರಾತ್ರಿ ಗಜ ಮತ್ತು ಅಶ್ವವಾಹನೋತ್ಸವ, ಏ.1 ರಂದು ರಾತ್ರಿ ಕುದುರೆವಾಹನೋತ್ಸವ 2ರಂದು ಸಂಜೆ ಸಮರಭೂಪಾಲ ವಾಹನೋತ್ಸವ, 3 ರಂದು ರಾತ್ರಿ ಹನುಮಂತ ವಾಹನೋತ್ಸವಗಳು ನಡೆಯಲಿದೆ.