ನನ್ನನ್ನು ಮುಟ್ಟಿದ್ರೆ ಕರೊನಾ ಬರುತ್ತದೆ ಎಂದು ಪೊಲೀಸರನ್ನು ಬೆದರಿಸಿ ಪರಾರಿಯಾಗಿದ್ದ ಯುವಕರ ಬಂಧನ

ಮಂಡ್ಯ: ನನ್ನನ್ನು ಮುಟ್ಟಿದರೆ ಕರೊನಾ ವೈರಸ್​ ಬರುತ್ತೆ ಎಂದು ಪೊಲೀಸರಿಗೆ ಬೆದರಿಕೆ ಹಾಕಿ ಪರಾರಿಯಾಗಿದ್ದ ಯುವಕನನ್ನು ಆತನ ಸ್ನೇಹಿತರೊಟ್ಟಿಗೆ ಗುರುವಾರ ಬಂಧಿಸಲಾಗಿದೆ.

ಕೆ.ಆರ್​.ಪೇಟೆ ತಾಲೂಕಿನ ಬಳ್ಳೇಕೆರೆ ಗ್ರಾಮದ ಮಹೇಶ್, ಅಭಿಶೇಕ್ ಹಾಗೂ ಶ್ರೀನಿವಾಸ್ ಬಂಧಿತ ಯುವಕರು. ಬೆಂಗಳೂರಿನಲ್ಲಿ ಆಟೋ‌ ಚಾಲಕನಾಗಿ ಕೆಲಸ‌ ಮಾಡುತ್ತಿದ್ದ ಮಹೇಶ್​, ಯುಗಾದಿ ಹಬ್ಬಕ್ಕೆಂದು ಬಳ್ಳೇಕೆರೆಗೆ ಬಂದಿದ್ದ. ಆತನ ಕೈಗೆ ಗ್ರಾಮ ಪಂಚಾಯಿತಿ ಅಧಿಕಾರಿಗಳು ಸೀಲ್ ಹಾಕಿ ಹೋಂ ಕ್ವಾರಂಟೈನ್​ನಲ್ಲಿ ಇಟ್ಟಿದ್ದರು.

ಇದರ ನಡುವೆ ಕ್ವಾರಂಟೈನ್​ ಉಲ್ಲಂಘಿಸಿ ಮಹೇಶ್ ತನ್ನ ಸ್ನೇಹಿತರೊಂದಿಗೆ ಚಿನಕುರಳಿಗೆ ಹೋಗಿದ್ದ. ನಿನ್ನೆ ರಾತ್ರಿ ವಾಪಸ್ ಬರುವಾಗ ತೆಂಡೇಕೆರೆ ಚೆಕ್​ಪೋಸ್ಟ್ ಬಳಿ ಪೊಲೀಸ್​ ಸಿಬ್ಬಂದಿ ತಡೆದು ಪ್ರಶ್ನಿಸಿದ್ದಾರೆ. ಈ ವೇಳೆ ಕೈಯಲ್ಲಿ ಸೀಲ್ ಇದ್ದುದ್ದರಿಂದ ನನಗೆ ಕರೊನಾ ಇದೆ. ಮುಟ್ಟಿದರೆ ನಿಮಗೂ ಬರುತ್ತದೆ ಎಂದು ಬೆದರಿಸಿ ಸ್ನೇಹಿತರೊಟ್ಟಿಗೆ ಪರಾರಿಯಾಗಿದ್ದ.

ಇದೀಗ ಪಿಎಸ್​ಐ ಬ್ಯಾಟರಾಯಿಗೌಡ ನೇತೃತ್ವದಲ್ಲಿ ಯುವಕರನ್ನು ಬಂಧಿಸಲಾಗಿದೆ. ಕೆ.ಆರ್.ಪೇಟೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. (ದಿಗ್ವಿಜಯ ನ್ಯೂಸ್​)

https://www.vijayavani.net/road-repair-during-lockdown-in-hyderabad/