ಶಾಸಕ ಯಶ್ಪಾಲ್ ಸುವರ್ಣ ಮಾತನಾಡಿ, ಪುತ್ತಿಗೆ ಮಠದ ಪರ್ಯಾಯವೆಂದರೆ ಅದು ವಿಶೇಷ ಕಲ್ಪನೆಯಿಂದ ಕೂಡಿರುತ್ತದೆ. ಸುಗುಣೇಂದ್ರ ಶ್ರೀಗಳ ಧಾರ್ಮಿಕ ಜಾಗೃತಿ ಕಾರ್ಯಕ್ರಮ ದೇಶಕ್ಕಷ್ಟೇ ಅಲ್ಲ, ವಿಶ್ವಕ್ಕೆ ಮಾದರಿಯಾಗಿದೆ. ಮೈಸೂರು ದಸರಾ, ಮಂಗಳೂರು ದಸರಾ ಮಾದರಿಯಲ್ಲಿಯೇ ಉಡುಪಿಯ ಪರ್ಯಾಯವನ್ನೂ ವೈಭವದಿಂದ ಆಚರಿಸಲು ನಿರ್ಧರಿಸಿದ್ದೇವೆ. ಪ್ರತಿ ಪರ್ಯಾಯದ ಸಂದರ್ಭದಲ್ಲೂ ನಗರವನ್ನು ವಿದ್ಯುತ್ ದೀಪಾಲಂಕಾರ ಮಾಡಲು ಉಡುಪಿ ನಗರಸಭೆಯಿಂದ 50 ಲಕ್ಷ ರೂ. ಅನುದಾನ ಮೀಸಲಿಡಲು ನಿರ್ಧರಿಸಿದ್ದೇವೆ. ಎಂಜಿಎಂನಿಂದ ಬನ್ನಂಜೆವರೆಗೆ, ಕಿನ್ನಿಮುಲ್ಕಿ ದ್ವಾರದಿಂದ ಕನಕದಾಸ ರಸ್ತೆ ಮಾರ್ಗವಾಗಿ ಸಂಸ್ಕೃತ ಕಾಲೇಜಿನವರೆಗೆ, ಪಿಪಿಸಿ ಆಡಿಟೋರಿಯಂನಿಂದ ಕಲ್ಸಂಕ ಸರ್ಕಲ್ವರೆಗೆ ದೀಪಾಲಂಕಾರ ಮಾಡಲಾಗುವುದು ಎಂದರು.
