ಮಹಿಳೆಯೊಂದಿಗೆ ಲಾಡ್ಜ್​ನಲ್ಲಿ ತಂಗಿದ್ದವ ಸಾವು

ಮುಳಬಾಗಿಲು: ನಗರದ ಲಾಡ್ಜ್​ವೊಂದರಲ್ಲಿ ಮಹಿಳೆಯೊಂದಿಗೆ ತಂಗಿದ್ದ ಆಂಧ್ರಪ್ರದೇಶದ ಪಲಮನೇರು ತಾಲೂಕಿನ ಗಂಟಾವರಂ ನಿವಾಸಿ ಶಿವಾರೆಡ್ಡಿ (32) ಎಂಬಾತ ಶನಿವಾರ ಸಂಜೆ ಮೃತಪಟ್ಟಿದ್ದಾನೆ.

ಶನಿವಾರ ಬೆಳಗ್ಗೆ 11 ಗಂಟೆಗೆ ಮಹಿಳೆ ಜತೆ ಶಿವಾರೆಡ್ಡಿ ಲಾಡ್ಜ್​ಗೆ ಬಂದಿದ್ದು, ಸಂಜೆ 6 ಗಂಟೆ ವೇಳೆಗೆ ಉಸಿರಾಟ ಸಮಸ್ಯೆ ಕಾಣಿಸಿಕೊಂಡಿದೆ ಎನ್ನಲಾಗಿದ್ದು, ಈ ವೇಳೆ ಜತೆಯಲ್ಲಿದ್ದ ಮಹಿಳೆ ಶಿವಾರೆಡ್ಡಿಯನ್ನು ಆಟೋದಲ್ಲಿ ಕರೆದುಕೊಂಡು ಹೋಗಿದ್ದಾರೆ. ಮುಳಬಾಗಿಲು ಸಾರ್ವಜನಿಕ ಆಸ್ಪತ್ರೆಯಲ್ಲಿ ಪ್ರಥಮ ಚಿಕಿತ್ಸೆ ಕೊಡಿಸಿ, ಹೆಚ್ಚಿನ ಚಿಕಿತ್ಸೆಗೆ ಕೋಲಾರದ ಆಸ್ಪತ್ರೆಗೆ ಕರೆದುಕೊಂಡು ಹೋಗುತ್ತಿದ್ದಾಗ ಮಾರ್ಗ ಮಧ್ಯೆ ಆತ ಮೃತಪಟ್ಟಿದ್ದಾನೆ.

ಶಿವಾರೆಡ್ಡಿ ಕೋಳಿ ಫಾಮ್​ರ್ ಸಂಬಂಧಿಸಿದ ಕಂಪನಿಯಲ್ಲಿ ಉದ್ಯೋಗಿಯಾಗಿದ್ದು, ಪಲಮನೇರು ಮೂಲದ ಮಹಿಳೆ ಜತೆ ಪ್ರೇಮಾಂಕರವಾಗಿತ್ತು ಎನ್ನಲಾಗಿದೆ. ಆದರೆ, ಇತ್ತೀಚೆಗೆ ಶಿವಾರೆಡ್ಡಿಗೆ ವಿವಾಹವಾಗಿದ್ದು, ಇದೇ ವಿಚಾರಕ್ಕೆ ಕಿರುಕುಳ ನೀಡಿ, ಆತ್ಮಹತ್ಯೆಗೆ ಪ್ರಚೋದನೆ ನೀಡಿದ್ದಾಳೆ ಎಂದು ಶಿವಾರೆಡ್ಡಿ ತಾಯಿ ಮುಳಬಾಗಿಲು ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.