ಸುಮಾರು ವರ್ಷಗಳಿಂದ ಈ ಬೆಟ್ಟ ಹಾಗೂ ಮೇಲಿನ ದೇವಾಲಯದ ಪ್ರಾಂಗಣ ಆಂಧ್ರಕ್ಕೆ, ಗರ್ಭಗುಡಿ ಕರ್ನಾಟಕಕ್ಕೆ ಹಾಗೂ ಹೊರಗಿನ ಬೃಹತ್ ಶಿವಲಿಂಗವಿರುವ ಪ್ರದೇಶ ತಮಿಳುನಾಡಿಗೆ ಸೇರುತ್ತದೆ ಎನ್ನಲಾಗುತ್ತಿತ್ತು. ಜತೆಗೆ ಈ ದೇವಾಲಯದ ನಿರ್ವಹಣೆ ಕೂಡಾ ಕರ್ನಾಟಕದ ಮುಜರಾಯಿ ಇಲಾಖೆ ನೋಡಿಕೊಳ್ಳುತ್ತಿತ್ತು. ಆ ಕಾರಣಕ್ಕೆ ಶಿವರಾತ್ರಿ ದಿನಗಳಲ್ಲಿ ಬಂಗಾರಪೇಟೆ ತಾಲೂಕು ಕಾಮಸಮುದ್ರ ಪೊಲೀಸರು ಬಂದೋಬಸ್ತ್ ಮಾಡುತ್ತಿದ್ದರು. ಜತೆಗೆ ಕರ್ನಾಟಕದ ಮುಜರಾಯಿ ಇಲಾಖೆಯಿಂದಲೇ ಅರ್ಚಕರನ್ನು ನೇಮಕ ಮಾಡಿ ವೇತನ ನೀಡಲಾಗುತ್ತಿತ್ತು. ಈ ಎಲ್ಲ ಕಾರಣದಿಂದ ಕಂದಾಯ ಇಲಾಖೆ ಅಧಿಕಾರಿಗಳು ಸರ್ವೇ ಮಾಡಿ ಗಡಿ ರೇಖೆ ಗುರುತು ಮಾಡಲು ಆಂಧ್ರದ ಅಧಿಕಾರಿಗಳಿಗೆ ಪತ್ರ ಬರೆದರೂ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ ಎನ್ನಲಾಗಿದೆ. ಆದರೆ, ದೇವಸ್ಥಾನ ಗರ್ಭಗುಡಿ ಯಾವ ರಾಜ್ಯದ ವ್ಯಾಪ್ತಿಗೆ ಸೇರಿದೆ ಎಂಬ ವಿಷಯ ಇಂದಿಗೂ ವಿವಾದವಾಗಿಯೇ ಉಳಿದುಕೊಂಡಿದೆ.
