ಕೆಎಎಸ್ ಪರೀಕ್ಷೆ ಮಾರ್ಪಾಡು; ಐಚ್ಛಿಕ ವಿಷಯಗಳಿಗೆ ಕೊಕ್, ಸಂದರ್ಶನ ಅಂಕ ಕಡಿತ

ಬೆಂಗಳೂರು:  ಗೆಜೆಟೆಡ್ ಪ್ರೊಬೆಷನರಿ ಗ್ರೂಪ್ ಎ ಹಾಗೂ ಬಿ ಹುದ್ದೆಗಳ ನೇಮಕಾತಿ ವಿಧಾನದಲ್ಲಿ ಭಾರಿ ಬದಲಾವಣೆ ತರಲು ಮುಂದಾಗಿರುವ ಸರ್ಕಾರ ಈವರೆಗೆ ಮುಖ್ಯ ಪರೀಕ್ಷೆಯಲ್ಲಿದ್ದ ಎರಡು ಐಚ್ಛಿಕ ವಿಷಯಗಳನ್ನು ಕೈಬಿಡಲು ನಿರ್ಧರಿಸಿದೆ. ಈ ಸಂಬಂಧ ಕರಡು ಅಧಿಸೂಚನೆ ಪ್ರಕಟಿಸಿದೆ.

ಪೂರ್ವಭಾವಿ ಪರೀಕ್ಷೆಯಲ್ಲಿ 400 ಅಂಕಗಳ 2 ಪತ್ರಿಕೆಗಳನ್ನು ಮುಂದುವರಿಸಿದ್ದು, ಮುಖ್ಯ ಪರೀಕ್ಷೆಯಲ್ಲಿ ಕೆಲ ಬದಲಾವಣೆ ಸೂಚಿಸಿದೆ. ಈ ಮೊದಲು ಕನ್ನಡ, ಇಂಗ್ಲಿಷ್ (ತಲಾ 150 ಅಂಕಗಳಂತೆ ಒಟ್ಟು 300 ಅಂಕಗಳು) ಜತೆಗೆ, ಒಟ್ಟು ಏಳು ಪತ್ರಿಕೆಗಳಿಗೆ ತಲಾ 250 ಅಂಕಗಳಂತೆ ಒಟ್ಟು 1,750 ಅಂಕಗಳಿಗೆ ಪರೀಕ್ಷೆ ಬರೆಯಬೇಕಾಗಿತ್ತು. ಇದರಲ್ಲಿ ಕೊನೆಯ ಎರಡು ಪತ್ರಿಕೆಗಳು ಐಚ್ಛಿಕ ವಿಷಯವಾಗಿದ್ದವು.

ಇನ್ನು ಎರಡು ಐಚ್ಛಿಕ ವಿಷಯಗಳ ಪರೀಕ್ಷೆ ಇಲ್ಲವಾಗಲಿದ್ದು, ಮುಖ್ಯ ಪರೀಕ್ಷೆಯ ಒಟ್ಟು ಅಂಕಗಳು 1,750 ರಿಂದ 1,250ಕ್ಕೆ ತಗ್ಗಲಿವೆ. ಈ ಬಗ್ಗೆ ಕರ್ನಾಟಕ ಗೆಜೆಟೆಡ್ ಪ್ರೊಬೆಷನರಿ ನೇಮಕಾತಿ ನಿಯಮಗಳು- 2020 ಕರಡು ಅಧಿಸೂಚನೆ ಹೊರಡಿಸಿದ್ದು, ಆಕ್ಷೇಪಣೆಗಳಿಗೆ 15 ದಿನಗಳ ಕಾಲಾವಕಾಶ ನೀಡಲಾಗಿದೆ.

ವ್ಯಕ್ತಿತ್ವ ಪರೀಕ್ಷೆಯ ಅಂಕ 50ಕ್ಕೆ ಇಳಿಕೆ 

ಈವರೆಗೆ 200 ಅಂಕಗಳಿಗೆ ನಡೆಯುತ್ತಿದ್ದ ವ್ಯಕ್ತಿತ್ವ ಪರೀಕ್ಷೆಯ (ಸಂದರ್ಶನ) ಅಂಕಗಳನ್ನು 50ಕ್ಕೆ ಇಳಿಸಲಾಗಿದೆ. ಸಂದರ್ಶನದಲ್ಲಿ ಶೇ.80ಕ್ಕೂ ಅಧಿಕ ಹಾಗೂ ಶೇ.40 ಕ್ಕಿಂತ ಕಡಿಮೆ ಅಂಕ ನೀಡಿದರೆ ಸಂದರ್ಶನ ಮಂಡಳಿ ಸದಸ್ಯರು ಅದಕ್ಕೆ ಕಾರಣ ದಾಖಲಿಸಬೇಕು ಎಂದು ಸೂಚಿಸಲಾಗಿದೆ.