ಕಳೆದ ವರ್ಷ ಸರ್ಕಾರ ಮಡಿಕೇರಿ ದಸರಾಕ್ಕೆ ೧ ಕೋಟಿ ರೂ. ಅನುದಾನದ ಭರವಸೆ ಕೊಟ್ಟಿತ್ತು. ಹಾಗಾಗಿ ಈ ಮೊತ್ತಕ್ಕೆ ಅನುಗುಣವಾಗಿ ಬಜೆಟ್ ರೂಪಿಸಿ ಖರ್ಚು ಮಾಡಲಾಗಿತ್ತು. ಆದರೆ ಈತನಕ ೭೫ ಲಕ್ಷ ರೂ. ಮಾತ್ರ ಸರ್ಕಾರದಿಂದ ಬಂದಿದೆ. ೨೫ ಲಕ್ಷ ರೂ. ಬಾಕಿ ಇದ್ದು, ಮಾಡಿಸಿಕೊಂಡಿರುವ ಕೆಲಸಕ್ಕೆ ದಸರಾ ಸಮಿತಿ ಹಣ ಪಾವತಿಸಿದೆ ಸಾಲಗಾರನಾಗಿ ಉಳಿದುಕೊಳ್ಳುವಂತಾಗಿದೆ. ಈ ವರ್ಷ ಬಾಕಿ ೨೫ ಲಕ್ಷ ರೂ. ಬಿಡುಗಡೆಯ ಜತೆಗೆ ೨ ಕೋಟಿ ರೂ. ಅನುದಾನ ಕೇಳಲಾಗಿದೆ. ಆದರೆ ಬರದ ಕಾರಣ ನೀಡಿ ಸಿಎಂ ಸಿದ್ದರಾಮಯ್ಯ ಇಷ್ಟು ಮೊತ್ತವನ್ನು ಕೊಡಲು ಸಾಧ್ಯವಿಲ್ಲ ಎಂದು ಹೇಳಿದ್ದಾರೆ ಎನ್ನಲಾಗಿದೆ.
ಸೋಮವಾರ ಮಡಿಕೇರಿಯ ಜಿಲ್ಲಾಧಿಕಾರಿ ಕಚೇರಿ ಸಭಾಂಗಣದಲ್ಲಿ ನಡೆದ ದಸರಾ ಪೂರ್ವಭಾವಿ ಸಭೆಯಲ್ಲಿ ಪಾಲ್ಗೊಂಡಿದ್ದ ದಸರಾ ಸಮಿತಿ ಪದಾಧಿಕಾರಿಗಳು ಸರಳ ದಸರಾದ ವಿರುದ್ಧವೇ ಮಾತನಾಡಿದ್ದಾರೆ. ದಸರಾವನ್ನು ವಿಜೃಂಭಣೆಯಿಂದ ಆಚರಿಸಿದರೆ ಕೊಡಗಿನ ಪ್ರವಾಸೋದ್ಯಮಕ್ಕೆ ಯಾವ ರೀತಿಯಲ್ಲಿ ಅನುಕೂಲ ಆಗುತ್ತದೆ ಮತ್ತು ಜಿಲ್ಲೆಯ ಆರ್ಥಿಕತೆಗೆ ಹೇಗೆ ಸಹಾಯವಾಗುತ್ತದೆ ಎನ್ನುವುದನ್ನು ಜಿಲ್ಲಾ ಉಸ್ತುವಾರಿ ಸಚಿವರಿಗೆ ಮನವರಿಕೆ ಮಾಡಿಕೊಡುವ ಪ್ರಯತ್ನ ನಡೆದಿದೆ. ಆದರೂ ಸರ್ಕಾರದಿಂದ ಸಿಗಬಹುದಾದ ಅನುದಾನದ ಮೊತ್ತದ ಬಗ್ಗೆ ಸಚಿವರಿಂದ ಯಾವುದೇ ಸ್ಪಷ್ಟ ಭರವಸೆ ಸಿಕ್ಕಿಲ್ಲ.
ಬರ ಇರುವುದರಿಂದ ಖುಷಿಯಲ್ಲಿ ದಸರಾ ಮಾಡಲು ಕಷ್ಟ ಆಗಬಹುದು ಎಂದು ಮಡಿಕೇರಿ ಶಾಸಕ ಡಾ. ಮಂತರ್ ಗೌಡ ಹೇಳಿದರೆ, ದಸರಾವನ್ನು ಸಾಂಪ್ರದಾಯಿಕ ಹಾಗೂ ವ್ಯವಸ್ಥಿತವಾಗಿ ಆಚರಿಸಲು ಸರ್ಕಾರದಿಂದ ಎಲ್ಲಾ ರೀತಿಯ ಸಹಕಾರ ನೀಡಲಾಗುವುದು ಎಂದಷ್ಟೇ ಉಸ್ತುವಾರಿ ಸಚಿವರು ಹೇಳಿದ್ದಾರೆ. ತಾವು ಕೇಳಿದಷ್ಟು ಅಲ್ಲವಾದರೂ ಉತ್ತಮವಾದ ಮೊತ್ತದ ನಿರೀಕ್ಷೆಯಲ್ಲಿ ಇದ್ದ ದಸರಾ ಸಮಿತಿ ಪದಾಧಿಕಾರಿಗಳಿಗೆ ಸಚಿವರ ಅಡ್ಡಗೋಡೆ ಮೇಲೆ ದೀಪ ಇಟ್ಟಂಥ ಮಾತು ಇಕ್ಕಟ್ಟಿಗೆ ಸಿಲುಕಿಸಿದೆ. ಮುಂದಿನ ಸಿದ್ಧತೆಗಳ ಮೇಲೆ ಇದು ಪರಿಣಾಮ ಬೀರುವ ಸಾಧ್ಯತೆ ಇದೆ. ಇಷ್ಟೆಲ್ಲದರ ಮಧ್ಯೆಯೂ ಸಚಿವ ಎನ್.ಎಸ್. ಬೋಸರಾಜು ಮುಖ್ಯಮಂತ್ರಿಗೆ ಆಪ್ತರಾಗಿರುವುದರಿಂದ ಇವರ ಮೇಲೆ ದಸರಾ ಸಮಿತಿ ಇನ್ನೂ ಭರವಸೆ ಇಟ್ಟುಕೊಂಡಿದೆ.
