ಭಾವುಕರಾದ ರಮೇಶ್ಕುಮಾರ್: ಕೆ.ಸಿ.ವ್ಯಾಲಿ ಯೋಜನೆ ದುರ್ಬಳಕೆ ಆಗುತ್ತಿದೆ ಎಂದು ರಮೇಶ್ಕುಮಾರ್ ದೂರಿದರು. ಒಂದು ಹಂತಕ್ಕೆ ನೀರು ಮಾತ್ರ ಬರುತ್ತದೆ. ಬೆರಳೆಣಿಕೆಯಷ್ಟು ಜನ ದುರ್ಬಳಕೆ ಮಾಡುತ್ತಿದ್ದಾರೆ. ತಮಗೆ ಬೇಕಾದಂತೆ ನೀರನ್ನು ಹರಿಸಿಕೊಳ್ಳುತ್ತಿದ್ದಾರೆ. ಒಂದೊಂದು ಕಾಲುವೆ ತೋಡಿ ಆರೇಳು ಪೈಪ್ ಅಳವಡಿಸಿಕೊಂಡು ಕೃಷಿಗೆ ನೀರು ಬಳಸಿಕೊಳ್ಳುತ್ತಿದ್ದಾರೆ. ನೂರಾರು ಕೋಟಿ ರೂ.ಗಳ ಮಹತ್ವಾಕಾಂಕ್ಷಿ ಯೋಜನೆ ಹಾಳಾಗುತ್ತಿದೆ ಎಂದು ಭಾವುಕರಾದರು. ಕೆ.ಸಿ. ವ್ಯಾಲಿ ಯೋಜನೆಗೆ 1,350 ಕೋಟಿ ರೂ ವೆಚ್ಚ ಮಾಡಲಾಗಿದೆ. ಆರಂಭಿಕ ತಾಲೂಕುಗಳ ರೈತರು ನೀರು ಎತ್ತುವಳಿ ಮಾಡುತ್ತಿದ್ದಾರೆ. ನಮ್ಮ ತಾಲೂಕಿಗೆ ನೀರು ಇನ್ನೂ ಬಂದಿಲ್ಲ, ಇದರಿಂದ ರೈತರು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಸರ್ಕಾರ ಸತ್ತು ಹೋಗಿದೆ ಎಂದು ಮಾತನಾಡುವುದು ತಪ್ಪು, ಆದರೂ ಹಾಗೆ ಮಾತಾಡುವ ಸ್ಥಿತಿ ಬಂದಿದೆ ಎಂದರು. ಕೆ.ಸಿ. ವ್ಯಾಲಿಯಿಂದ ಇಂದಿನವರೆಗೂ ಜಲಘಟ್ಟ ಎಂಬ ಒಂದು ಕೆರೆಯೇ ತುಂಬಿಲ್ಲ. ಶ್ರೀನಿವಾಸಪುರದವರೆಗೂ ನೀರು ಹೋಗುತ್ತಲೇ ಇಲ್ಲ. ನೀರನ್ನು ರೈತರು ಮೇಲ್ಭಾಗದಲ್ಲಿ ಎತ್ತುವಳಿ ಮಾಡುತ್ತಿದ್ದಾರೆ. ಇದರಿಂದ ಕೆಳಭಾಗದ ರೈತರಿಗೆ ನೀರು ತಲುಪುತ್ತಿಲ್ಲ. 1,400 ಕೋಟಿ ರೂ.ಗಳನ್ನು ಕೆಲವೇ ರೈತರಿಗಾಗಿ ಖರ್ಚು ಮಾಡಿದಂತಾಗಿದೆ ಎಂದರು. ನೀರು ಎತ್ತುವಳಿ ಮಾಡುತ್ತಿರುವವರು ನನ್ನ ನೆಂಟರೇ ಆಗಿದ್ದರೂ ಬಿಡಬೇಡಿ. ನಿವೃತ್ತ ಸೈನಿಕರ ಗಸ್ತು ಹಾಕುತ್ತೇವೆ ಎಂದು ಹೇಳಿಯೂ ಸರ್ಕಾರ ನಿಯೋಜನೆ ಮಾಡಿಲ್ಲ ಎಂದು ಬೇಸರ ವ್ಯಕ್ತಪಡಿಸಿದರು.
