ಈ ಹಿಂದೆ ದೇವರ ದರ್ಶನಕ್ಕೆ ಸಾವಿರಾರು ಭಕ್ತರು ಸರತಿ ಸಾಲಿನಲ್ಲಿ ತೆರಳಿ ದೇವರ ದರ್ಶನವನ್ನು ಪಡೆಯುತ್ತಿದ್ದರು. ಇದೀಗ ಇದಕ್ಕೆ ಕಡಿವಾಣ ಹಾಕಲಾಗಿದ್ದು, ಪರಸ್ಪರ ಅಂತರವನ್ನು ಕಾಯ್ದುಕೊಳ್ಳಲು ಸಿದ್ಧತೆ ಮಾಡಿಕೊಳ್ಳಲಾಗಿದೆ. ಒಂದು ಬಾರಿಗೆ 180 ಜನರು ಮಾತ್ರ ಸಾಲಿನಲ್ಲಿ ತೆರಳಿ ದೇವರ ದರ್ಶನ ಮಾಡಬೇಕಿದೆ. ಈ ದಿಸೆಯಲ್ಲಿ ದೇಗುಲದ ಮುಂಭಾಗದಲ್ಲಿನ ಬಯಲು ರಂಗಮಂದಿರದಲ್ಲಿ ಎ, ಬಿ, ಸಿ, ಡಿ ಎಂದು 4 ಕೌಂಟರ್ ಮಾಡಲಾಗಿದ್ದು, 200 ಜನರು ಕುರ್ಚಿಯಲ್ಲಿ ಕುಳಿತುಕೊಳ್ಳಲು ಅವಕಾಶ ಮಾಡಿಕೊಡಲಾಗಿದೆ. ದೇಗುಲದ ಪ್ರವೇಶ ದ್ವಾರದಲ್ಲಿ ಸ್ಯಾನಿಟೈಸರ್ ಹಾಗೂ ಸ್ಕ್ರೀನಿಂಗ್ ನಡೆಸಲಾಗುತ್ತದೆ. ಮಾಸ್ಕ್ ಧರಿಸದೇ ಬರುವ ಭಕ್ತರನ್ನು ದೇಗುಲಕ್ಕೆ ಪ್ರವೇಶಿಸದಂತೆ ಪ್ರಾಧಿಕಾರ ಎಚ್ಚರಿಕೆ ಕ್ರಮ ಅನುಸರಿಸಿದೆ.
