ಶ್ರೀನಿವಾಸ ಅಣ್ಣಯ್ಯಪ್ಪ ಯಶವಂತಪುರ : ಸಂತಾನ ಫಲ ಇಲ್ಲದವರು ಬಂದು ಹರಕೆ ಮಾಡಿಕೊಂಡರೆ ಜೋಡಿ ಫಲವನ್ನೇ (ಅವಳಿ ಮಕ್ಕಳು) ನೀಡುವ ಕ್ಷೇತ್ರ ಜೋಡಿ ವೀರಭದ್ರೇಶ್ವರ ಸನ್ನಿಧಾನ. ಮಾಗಡಿ ಮುಖ್ಯರಸ್ತೆಯ ಮಾಚೋಹಳ್ಳಿಯಲ್ಲಿರುವ ಪುರಾತನ ಶ್ರೀಜೋಡಿ ವೀರಭದ್ರೇಶ್ವರಸ್ವಾಮಿ ದೇವಾಲಯದಲ್ಲಿ ಬುಧವಾರ (ಫೆ.26) ಅದ್ದೂರಿ ಮಹಾಶಿವರಾತ್ರಿ ಜಾತ್ರಾ ಮಹೋತ್ಸವ ಹಮ್ಮಿಕೊಳ್ಳಲಾಗಿದೆ.
ಚೋಳರ ಕಾಲದ ಐತಿಹಾಸಿಕ ಜೋಡಿ ವೀರಭದ್ರ ದೇವಾಲಯದಲ್ಲಿರುವ 51 ಅಡಿ ಎತ್ತರದ ಶಿವನ ಪ್ರತಿಮೆಯ ದರ್ಶನಕ್ಕಾಗಿ ಸಾವಿರಾರು ಭಕ್ತರು ಆಗಮಿಸಲಿದ್ದು, ಜಾತ್ರಾ ಮಹೋತ್ಸವದ ಅಂಗವಾಗಿ ಮುಂಜಾನೆಯಿಂದ ತಡರಾತ್ರಿವರೆಗೂ ವಿವಿಧ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆಯಲಿವೆ.
ಮುಂಜಾನೆ ಗಂಗಾಪೂಜೆಯೊಂದಿಗೆ ಆರಂಭವಾಗುವ ಕಾರ್ಯಕ್ರಮದಲ್ಲಿ ಗೋಪೂಜೆ, ಸಾಮೂಹಿಕ ಸಂಕಲ್ಪ, ಮಹಾ ರುದ್ರಾಭಿಷೇಕ, ಹೋಮ-ಹವನ, ಪೂರ್ಣಾಹುತಿ, ಮಹಾಮಂಗಳಾರತಿ ನಡೆಯಲಿದೆ. ಉತ್ಸವದ ಅಂಗವಾಗಿ ಜೋಡಿ ವೀರಭದ್ರೇಶ್ವರ ಸ್ವಾಮಿಗೆ ವಿಶಿಷ್ಟ ಫಲಪುಷ್ಪಗಳಿಂದ ಅಲಂಕಾರ ಮಾಡಲಾಗುತ್ತದೆ. ಬೆಳಗ್ಗೆ 11 ಗಂಟೆಗೆ ವೀರಗಾಸೆ ಪ್ರದರ್ಶನ, ಭರತನಾಟ್ಯ, ನೃತ್ಯ, ಗಾಯನ ಸೇರಿ ಜಾನಪದ ಕಲಾ ವೈಭವ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ.
ಅಂದು ಮಧ್ಯಾಹ್ನ 1 ಗಂಟೆಗೆ ವಿಶೇಷವಾಗಿ ಜೋಡಿ ವೀರಭದ್ರಸ್ವಾಮಿ ಹರಕೆಯಿಂದ ಜನಿಸಿದ ಅವಳಿ ಮಕ್ಕಳಿಗೆ ಶಿವಗಂಗೆ ಮಠದ ಶ್ರೀಮಲಯ ಶಾಂತಮುನಿ ಶಿವಾಚಾರ್ಯ ಸ್ವಾಮೀಜಿ ಗುರುರಕ್ಷೆಯೊಂದಿಗೆ ಸನ್ಮಾನಿಸಲಿದ್ದಾರೆ. ನಂತರ ಭಕ್ತರಿಗೆ ಅನ್ನಸಂತರ್ಪಣೆ ನಡೆಯಲಿದೆ.
