‘ಮುದ್ದು ಮಾದಪ್ಪ’ನಿಂದ ಪರಿವರ್ತನೆ: ರಾಜ್ಯದಲ್ಲಿರುವ ಸೋಲಿಗರು, ಮೇದ, ಎರವ, ಜೇನುಕುರುಬ, ಬೆಟ್ಟದ ಕುರುಬ ಸೇರಿದಂತೆ ಇತರ ಪುರಾತನ ಬುಡಕಟ್ಟು ಸಮುದಾಯಗಳಲ್ಲಿ ಬೇಡಗಂಪಣರದೂ ಒಂದು ಜನಾಂಗ. ಪುರಾಣಕಥೆಗಳ ಪ್ರಕಾರ ಶತಮಾನಗಳ ಹಿಂದೆ ಬೇಡಗಂಪಣರು ಶ್ರೀಶೈಲದಲ್ಲಿ ವಾಸ ಮಾಡುತ್ತಿದ್ದರು. ರಾಜರುಗಳಿಗೆ ಶಸ್ತ್ರಾಸ್ತ್ರ ಸರಬರಾಜು ಮಾಡುತ್ತ, ಯುದ್ಧಗಳಲ್ಲಿ ಪಾಲ್ಗೊಳ್ಳುತ್ತಿದ್ದರು. ನಂತರ ಕರ್ನಾಟಕ, ತಮಿಳುನಾಡಿನ ಗುಡ್ಡಗಾಡುಗಳತ್ತ ವಲಸೆ ಬಂದರು. ಕಾಡಿನಲ್ಲಿ ಸೋಲಿಗರೊಂದಿಗೆ ವನ್ಯಜೀವಿಗಳನ್ನು ಬೇಟೆಯಾಡಿಕೊಂಡು ಜೀವನ ನಡೆಸುತ್ತಿದ್ದರು. ಈ ವೇಳೆ ‘ಮುದ್ದು ಮಾದಪ್ಪ’ನ ಪ್ರಭಾವಕ್ಕೊಳಗಾಗಿ ಸಂಪೂರ್ಣವಾಗಿ ಪರಿವರ್ತನೆಗೊಂಡರು. ಲಿಂಗಧಾರಣೆಯೊಂದಿಗೆ ಶಿವದೀಕ್ಷೆ ಪಡೆದು ‘ಎಪ್ಪತ್ತೇಳು ಮಲೆಯ ಒಡೆಯ ಮಾದಪ್ಪ’ನ ಪೂಜೆ ಮಾಡುತ್ತಾ ಬುಡಕಟ್ಟು ಜನಾಂಗದ ಸಂಪ್ರದಾಯಗಳನ್ನೂ ಮೀರಿ ವಿಭಿನ್ನ ಆಚರಣೆಗಳನ್ನು ಅನುಸರಿಸಲು ಮುಂದಾದರು.
