ಬಿಸಿಯೂಟ ತಯಾರಕರಿಗೆ ಸಂಕಷ್ಟ :ವೇತನವಿಲ್ಲದೆ ಪರದಾಟ

ತುಮಕೂರು: ಕರೊನಾ ಸಂಕಷ್ಟದಲ್ಲಿಯೂ ಶಾಲೆಗಳಲ್ಲಿ ಕರ್ತವ್ಯನಿರ್ವಹಿಸಿದ್ದ ಅಕ್ಷರ ದಾಸೋಹದ 6712 ಬಿಸಿಯೂಟ ತಯಾರಕರು, ಸಹಾಯಕರು ಕಳೆದೆರಡು ತಿಂಗಳಿನಿಂದ ವೇತನವಿಲ್ಲದೆ ಪರದಾಡುವ ಸ್ಥಿತಿಯಿದೆ.

ಕಳೆದ ಏಪ್ರಿಲ್‌ನಿಂದ ಅವರ ಸೇವೆ ಹಿಂಪಡೆಯಲಾಗಿದ್ದು, ಪ್ರತಿ ವರ್ಷ ಜೂನ್‌ನಲ್ಲಿ ನೀಡಲಾಗುತ್ತಿದ್ದು, ಮರುನೇಮಕ ಆದೇಶವೂ ಇನ್ನೂ ಕೈ ಸೇರಿಲ್ಲ. ವರ್ಷದಲ್ಲಿ ಹತ್ತು ತಿಂಗಳು ವೇತನ ಪಡೆದು ಅರೆಹೊಟ್ಟೆಯಲ್ಲಿ ಬದುಕು ಸಾಗಿಸುತ್ತಿದ್ದ ಸಿಬ್ಬಂದಿಗೆ ಆ ಹತ್ತು ತಿಂಗಳಿನಲ್ಲಿಯೂ ಕಡಿತ ಮಾಡಲಾಗುತ್ತಿರುವುದು ಆತಂಕ ಹೆಚ್ಚಿಸಿದೆ.

ರಾಜ್ಯಾದ್ಯಂತ 1.18 ಲಕ್ಷ ಬಿಸಿಯೂಟ ತಯಾರಕರಿದ್ದು, ಶಾಲೆಗಳಲ್ಲಿ ಅಡುಗೆ ಮಾಡುವ ಸಿಬ್ಬಂದಿಗೆ ಕನಿಷ್ಠ ವೇತನವೂ ಇಲ್ಲದೆ ಯಾವುದೇ ರೀತಿಯ ಸೌಲಭ್ಯಗಳು ದೊರೆಯುತ್ತಿಲ್ಲ, ಇಎಸ್‌ಐ ಪಿಂಚಣಿ ಸೌಲಭ್ಯಗಳು ಇಲ್ಲದಿರುವುದು ಶೋಚನೀಯ ವಿಷಯವಾಗಿದೆ. ವಿವಿಧ ಬೇಡಿಕೆಗಳನ್ನು ಈಡೇರಿಸುವಂತೆ ಆಗ್ರಹಿಸಿ ಬಿಸಿಯೂಟ ತಯಾರಕರು ಪ್ರತಿಭಟನೆಗೆ ಮುಂದಾಗಿದ್ದಾರೆ. ರಾಜ್ಯ ಅಕ್ಷರ ದಾಸೋಹ ನೌಕರರ ಸಂಘ ಜೂ.23ರಿಂದ ರಾಜ್ಯದೆಲ್ಲೆಡೆ ಪ್ರತಿಭಟನೆಗೆ ಮುಂದಾಗಿದ್ದು, ಶಾಲೆ, ಗ್ರಾಪಂ, ತಾಪಂ, ಜಿಪಂ ಮುಂಭಾಗ ಪ್ರತಿಭಟನೆ ನಡೆಸಲಿದೆ.