ಲಿಂ.ಮುದಕನಗೌಡ ಪಾಟೀಲ ಸೇವೆ ಸ್ಮರಣೀಯ

ಮುಂಡರಗಿ: ಗ್ರಾಮಸೇವೆಯನ್ನು ತಮ್ಮ ಗುರಿಯನ್ನಾಗಿಟ್ಟುಕೊಂಡು ಈ ಭಾಗವನ್ನು ಅಭಿವೃದ್ಧಿಯತ್ತ ಕೊಂಡೊಯ್ದ ಲಿಂ.ಮುದಕನಗೌಡ ಪಾಟೀಲ ಅವರು ಕೇವಲ ವ್ಯಕ್ತಿಯಾಗಿರಲಿಲ್ಲ ಶಕ್ತಿಯಾಗಿದ್ದರು. ಅವರು ಈ ಭಾಗದ ಕೃಷಿ ಮತ್ತು ಶಿಕ್ಷಣಕ್ಕೆ ಆದ್ಯತೆ ನೀಡಿ ಕೆಲಸ ಮಾಡಿದ ಶ್ರಮಜೀವಿ ಎಂದು ನಿವೃತ್ತ ಪ್ರಾಧ್ಯಾಪಕ ಆರ್.ಎಲ್. ಪೊಲೀಸ ಪಾಟೀಲ ಹೇಳಿದರು.

ಪಟ್ಟಣದ ಪ್ರಾಥಮಿಕ ಸಹಕಾರಿ ಕೃಷಿ ಮತ್ತು ಗ್ರಾಮೀಣ ಅಭಿವೃದ್ಧಿ ಬ್ಯಾಂಕ್ ನಿಯಮಿತ ಹಾಗೂ ತಾಲೂಕು ಕಸಾಪ ಆಶ್ರಯದಲ್ಲಿ ಕರ್ನಾಟಕ ಸಂಭ್ರಮ -50ರ ಕಾರ್ಯಕ್ರಮದ ಅಡಿ ಗುರುವಾರ ಹಮ್ಮಿಕೊಂಡಿದ್ದ ಮುಂಡರಗಿಯ ಅಭಿವೃದ್ಧಿ ಹರಿಕಾರ ಲಿಂ.ಮುದಕನಗೌಡ ಪಾಟೀಲ ಅವರ ಮೂರ್ತಿ ಪ್ರತಿಷ್ಠಾಪನಾ ಅಡಿಗಲ್ಲು ಸಮಾರಂಭ ಮತ್ತು ಅವರ ಜೀವನ ಸಾಧನೆ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ತಾಲೂಕಿನ ಬಹುತೇಕ ಶಾಲಾ ಕಟ್ಟಡಗಳಿಗೆ ಆದ್ಯತೆ ನೀಡಿ, ಅನೇಕ ಕೆರೆಗಳ ನಿರ್ಮಾಣದ ಕಾರಣೀಕರ್ತರಾಗಿದ್ದವರು. 50 ವರ್ಷಗಳ ಹಿಂದೆ ಮುಂಡರಗಿಗೆ ಸಕ್ಕರೆ ಕಾರ್ಖಾನೆ, ಹುಲಿಗುಡ್ಡ ಏತ ನೀರಾವರಿ ಯೋಜನೆ ಮತ್ತು ತುಂಗಭದ್ರಾ ನದಿಗೆ ಸೇತುವೆ ಮೊದಲಾದವುಗಳ ಅಭಿವೃದ್ಧಿ ಕಾರ್ಯದ ನೀಲಿ ನಕ್ಷೆಯನ್ನು ತಯಾರಿಸಿ ಸರ್ಕಾರದ ಗಮನ ಸೆಳೆದಿದ್ದರು ಎಂದರು.

ಕಾರ್ಯಕ್ರಮ ಉದ್ಘಾಟಿಸಿದ ಮಾಜಿ ಸಚಿವ ಎಸ್.ಎಸ್.ಪಾಟೀಲ ಮಾತನಾಡಿ, ಮುಂಡರಗಿ ಅಭಿವೃದ್ಧಿಗೆ ಶ್ರಮಿಸಿದ ಅನೇಕ ಮಹನೀಯರನ್ನು ಸ್ಮರಿಸಬೇಕು. ರೈತರು ಯಾವ ಕಾರಣಕ್ಕೂ ಆತ್ಮಹತ್ಯೆ ಮಾಡಿಕೊಳ್ಳಬಾರದು. ಈ ದೇಶಕ್ಕೆ ಅನ್ನ ನೀಡುವ ರೈತ ಎಂದಿಗೂ ಕುಗ್ಗಬಾರದು. ಧೈರ್ಯದಿಂದ ಬದುಕು ನಡೆಸಬೇಕು. ಭೂತಾಯಿ ನಂಬಿದವರು ಕೆಟ್ಟಿಲ್ಲ, ಶ್ರಮದಿಂದ ದುಡಿದು ಉತ್ತಮವಾಗಿ ಬಾಳಬೇಕು ಎಂದರು.

ಹಾಲಪ್ಪ ಕಬ್ಬೇರಹಳ್ಳಿ ಅಧ್ಯಕ್ಷತೆ ವಹಿಸಿದ್ದರು. ಎಸ್.ಎಸ್.ಪಟ್ಟಣಶೆಟ್ಟರ, ಎಸ್.ಬಿ. ಕರಿಭರಮಗೌಡರ ಅವರನ್ನು ಗೌರವಿಸಲಾಯಿತು. ಕಸಾಪ ತಾಲೂಕಾಧ್ಯಕ್ಷ ಪ್ರೊ. ಎಂ.ಜಿ. ಗಚ್ಚಣ್ಣವರ, ಪುಲಿಕೇಶಗೌಡ ಪಾಟೀಲ ಇತರರು ಇದ್ದರು. ಧಾರವಾಡ ಕೆ.ಸಿ.ಸಿ. ಬ್ಯಾಂಕ್ ಅಧ್ಯಕ್ಷ ಶಿವಕುಮಾರಗೌಡ ಪಾಟೀಲ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಮಂಜುನಾಥ ಮುಧೋಳ ಸ್ವಾಗತಿಸಿದರು. ಎಸ್.ವಿ. ಪಾಟೀಲ ನಿರೂಪಿಸಿದರು.