ಮುಳಬಾಗಿಲು ತಾಲೂಕು ಕಚೇರಿ ಮೇಲೆ ಲೋಕಾ ದಾಳಿ

ಮುಳಬಾಗಿಲು: ತಾಲೂಕು ಕಚೇರಿ ಎಡಿಎಲ್​ಆರ್​ ನಿವೇದಿತಾ ಜಮೀನೊಂದರ ದಾಖಲೆ ನೀಡಲು 2 ಲಕ್ಷ ರೂ. ಲಂಚಕ್ಕೆ ಬೇಡಿಕೆ ಇಟ್ಟು, ಫಲಾನುಭವಿಯಿಂದ ಬುಧವಾರ 1.50 ಲಕ್ಷ ಹಣ ಸ್ವೀಕರಿಸುವಾಗ ಲೋಕಾ ಬಲೆಗೆ ಬಿದ್ದಿದ್ದಾರೆ.

ಹೊಸಕೋಟೆ ತಾಲೂಕಿನ ನಾಗಸಂದ್ರ ಮೂಲದ ಬಿ.ಮಂಜುನಾಥ್​ ಎಂಬುವವರು ಮುಳಬಾಗಿಲು ತಾಲೂಕಿನ ಕಪ್ಪಲಮಡಗು ಬಳಿ ಜಮೀನು ಖರೀದಿಸಿ ಅದರ ದಾಖಲೆ ಪಡೆಯಲು ಕೋಲಾರದ ಡಿಡಿಎಲ್​ಆರ್​ ಅಧಿಕಾರಿ ಸಂಜಯ್​ ಅವರಿಗೆ ಮನವಿ ಮಾಡಿದ್ದರು. ಈ ಮೂಲಕ ಸಿಬ್ಬಂದಿ ಸಂದೀಪ್​ ಮಾಹಿತಿ ರವಾನೆಗೊಂಡ ನಂತರ ಮುಳಬಾಗಿಲಿನ ಸರ್ವೇಯರ್​ ಸಂತೋಷ್​ ಮುಂದಾಳತ್ವದಲ್ಲಿ ಎಡಿಎಲ್​ಆರ್​ ನಿವೇದಿತಾ ಅವರು 2 ಲಕ್ಷ ರೂ.ಗೆ ಬೇಡಿಕೆ ಇಟ್ಟಿದ್ದರು.

ಅದರಂತೆ ಬಿ.ಮಂಜುನಾಥ್​ ಅವರು ಬೆಂಗಳೂರಿನ ಹೊಟೇಲ್​ ಒಂದರಲ್ಲಿ 50 ಸಾವಿರ ರೂಪಾಯಿಯನ್ನು ಮುಂಗಡವಾಗಿ ನೀಡಿದ್ದು, ಉಳಿದ 1.50 ಲಕ್ಷ ರೂಪಾಯಿಯನ್ನು ನೀಡಲು ಬುಧವಾರ ಕಚೇರಿಗೆ ಬಂದಿದ್ದಲ್ಲದೇ, ಈ ಬಗ್ಗೆ ಲೋಕಾ ಅಧಿಕಾರಿಗಳಿಗೂ ದೂರು ನೀಡಿದ್ದರು. ಬುಧವಾರ ಕಚೇರಿಯಲ್ಲಿ ಮಂಜುನಾಥ್​ ಅವರು ಹಣ ನೀಡುತ್ತಿದ್ದಂತೆ ಲೋಕಾ ಅಧಿಕಾರಿಗಳು ಕಚೇರಿಗೆ ಬಂದಿದ್ದು, ಕೂಡಲೇ ಎಚ್ಚೆತ್ತುಕೊಂಡ ನಿವೇದಿತಾ ಕಚೇರಿಯಿಂದ ಹೊರಗೆ ಓಡಿ ಬಸ್​ ನಿಲ್ದಾಣಕ್ಕೆ ಹೋಗಿದ್ದಾರೆ.

ಹಿಂದೆಯೇ ಹೋದ ಲೋಕಾಯುಕ್ತ ಅಧಿಕಾರಿಗಳು ನಿವೇದಿತಾ ಅವರನ್ನು ಪುನ@ ಕಚೇರಿಗೆ ಕರೆತಂದು ವಿಚಾರಣೆ ನಡೆಸಿ, ವಶಕ್ಕೆ ಪಡೆದಿದ್ದಾರೆ. ಅಲ್ಲದೇ ಲಂಚಕ್ಕೆ ಬೇಡಿಕೆ ಆರೋಪದಲ್ಲಿ ಎಡಿಎಲ್​ಆರ್​ಎಸ್​ ನಿವೇದಿತಾ ಸೇರಿ ಡಿಡಿಎಲ್​ಆರ್​ ಸಂಜಯ್​, ಸರ್ವೇಯರ್​ ಸಂತೋಷ್​, ಸಂದೀಪ್​ ಮೇಲೆ ಪ್ರಕರಣ ದಾಖಲಾಗಿದೆ.

ನೋಟಿಸ್​ ಜಾರಿ: ಲೋಕಾಯುಕ್ತ ಅಧಿಕಾರಿಗಳು ತಾಲೂಕು ಕಚೇರಿಗೆ ಬಂದ ನಂತರ ವಿವಿಧ ವಿಭಾಗಗಳಲ್ಲಿ ಕೆಲಸ ಮಾಡುತ್ತಿದ್ದ ಅಧಿಕಾರಿಗಳು ಕಚೇರಿ ಬಿಟ್ಟು ಹೊರಗೆ ಹೋಗಿದ್ದು, ಕಚೇರಿ ಖಾಲಿಯಾಗಿತ್ತು. ಕೆಲವರ ದೂರವಾಣಿಗಳು ಸ್ವಿಚ್​ಆಫ್​ ಆಗಿದ್ದೂ ಕಂಡುಬಂದಿದ್ದು, ಅಂತವರಿಗೆ ನೋಟಿಸ್​ ಜಾರಿ ಮಾಡಲಾಗುವುದು ಎಂದು ಲೋಕಾಯುಕ್ತ ಸರ್ಕಲ್​ ಇನ್​ಸ್ಪೆಕ್ಟರ್​ ರೇಣುಕಾ ಮಾಹಿತಿ ನೀಡಿದರು. ಸಿಬ್ಬಂದಿ ಸುಬ್ರಹ್ಮಣಿ, ವಾಸುದೇವ್​, ನಾಗಭೂಷಣ್​, ಮುನಿರತ್ನ, ಶಿವಶಂಕರ್​, ಶ್ರೀನಿವಾಸ್​ ಇತರರು ಇದ್ದರು.