ಮಂಡ್ಯ: ‘ಮಳೆ ನಿಂತರೂ ಹನಿ ನಿಂತಿಲ್ಲ’ ಎನ್ನುವ ಗಾದೆಯಂತಾಗಿದೆ ಮಂಡ್ಯದ ಪರಿಸ್ಥಿತಿ. ಜಿದ್ದಾಜಿದ್ದಿ ಕ್ಷೇತ್ರ ಮಂಡ್ಯ ಲೋಕಸಭಾ ಕ್ಷೇತ್ರದ ಚುನಾವಣೆ ಶಾಂತಿಯುತವಾಗಿ ಪೂರ್ಣಗೊಂಡಿದೆ. ಆದರೆ, ಯಾರು ಗೆಲ್ಲುತ್ತಾರೆಂಬ ಪ್ರಶ್ನೆ ಎಲ್ಲಿ ಹೋದರೂ ಕೇಳಿಬರುತ್ತಿದೆ. ಜಿಲ್ಲೆಯ ಹೋಟೆಲ್, ಬಸ್ಸ್ಟಾೃಂಡ್, ಸಾರ್ವಜನಿಕ ಸ್ಥಳ ಸೇರಿ ಸಾಮಾಜಿಕ ಜಾಲತಾಣದಲ್ಲಿ ಇಂತಹದೊಂದು ಪ್ರಶ್ನೆಗೆ ಉತ್ತರ ಹುಡುಕಲು ಪ್ರಾರಂಭಿಸಲಾಗಿದೆ.
ಹೈವೋಲ್ಟೆಜ್ ಕ್ಷೇತ್ರ: ಹೈವೋಲ್ಟೆಜ್ ಕ್ಷೇತ್ರವಾಗಿದ್ದ ಮಂಡ್ಯ ಜಿಲ್ಲೆ ಇದೀಗ ತಣ್ಣಗಾಗಿದೆ. ರಾಜಕೀಯದ ಕಾವು ಇಳಿದು ಸಹಜ ಸ್ಥಿತಿಗೆ ಮರಳಿದೆ. ಕಳೆದ ಕೆಲ ದಿನಗಳಿಂದ ಅಬ್ಬರದ ಪ್ರಚಾರ, ಟೀಕೆ, ಪ್ರತಿ ಟೀಕೆ, ಅಭಿಮಾನ, ಸ್ವಾಭಿಮಾನ, ನಾಟಿ, ಹೈಬ್ರಿಡ್, ಆರೋಪ, ಪ್ರತ್ಯಾರೋಪದಿಂದಾಗಿ ಮಂಡ್ಯ ಕ್ಷೇತ್ರ ರಂಗು ಪಡೆದುಕೊಂಡಿತ್ತಲ್ಲದೆ, ರಾಜ್ಯದ ಗಮನ ಸೆಳೆದಿತ್ತು.
ಕಾರಣ ಎರಡು ಬಾರಿ ಸಿಎಂ ಆಗಿದ್ದ ಎಚ್.ಡಿ.ಕುಮಾರಸ್ವಾಮಿ ಹಾಗೂ ಚುನಾವಣಾ ರಾಜಕೀಯದ ಪ್ರಾಥಮಿಕ ಹಂತದಲ್ಲಿರುವ ಸ್ಟಾರ್ ಚಂದ್ರು ಸ್ಪರ್ಧೆ. ಮೇಲ್ನೋಟಕ್ಕೆ ಇವರಿಬ್ಬರ ನಡುವೆ ಸ್ಪರ್ಧೆ ನಡೆದಿದೆ ಎಂದಾದರೂ ನಿಜವಾಗಿ ಎಚ್ಡಿಕೆ ವರ್ಸಸ್ ಸಚಿವ ಎನ್.ಚಲುವರಾಯಸ್ವಾಮಿ ಅವರಿಗೆ ಪ್ರತಿಷ್ಠೆ ಕಣವಾಗಿದೆ. ಸತತವಾಗಿ ಚುನಾವಣೆಗಳಲ್ಲಿ ಸೋಲು ಕಂಡಿರುವ ಜೆಡಿಎಸ್ಗೆ ಈ ಲೋಕಸಭಾ ಚುನಾವಣೆ ಅಸ್ತಿತ್ವದ ಪ್ರಶ್ನೆ. ಈ ಕಾರಣಕ್ಕೆ ಮಾಜಿ ಸಿಎಂ ಅವರೇ ಅಖಾಡ ಪ್ರವೇಶಿಸಿದರು. ಇತ್ತ ಜೆಡಿಎಸ್ಗೆ ಜಿಲ್ಲೆಯಲ್ಲಿ ದೊಡ್ಡಮಟ್ಟದ ಹೊಡೆತ ನೀಡಲು ಕಾಂಗ್ರೆಸ್ ಕೂಡ ತಂತ್ರಗಾರಿಕೆ ನಡೆಸಿತು. ಲೋಕಸಭಾ ಕ್ಷೇತ್ರದಲ್ಲಿ ಎಂಟು ವಿಧಾನಸಭಾ ಕ್ಷೇತ್ರಗಳ ಪೈಕಿ ಏಳರಲ್ಲಿ ಕಾಂಗ್ರೆಸ್ ಹಾಗೂ ಇಬ್ಬರು ಎಂಎಲ್ಸಿಗಳಿದ್ದಾರೆ. ಈ ಕಾರಣಕ್ಕೆ ಕಾಂಗ್ರೆಸ್ ಬಲಿಷ್ಠವಾಗಿ ಕಾಣಿಸಿತು.
ಇನ್ನು ಜೆಡಿಎಸ್-ಬಿಜೆಪಿ ಮೈತ್ರಿ ಕ್ಷೇತ್ರದಲ್ಲಿ ವರ್ಕೌಟ್ ಆದಂತೆ ಕಾಣಿಸುತ್ತಿದೆ. ಎರಡೂ ಪಕ್ಷದ ನಾಯಕರ ನಡುವೆ ಮನಸ್ತಾಪ ಕಂಡುಬರಲಿಲ್ಲ. ಬಿಜೆಪಿಯ ಘಟಾನುಘಟಿ ನಾಯಕರೇ ಖುದ್ದು ಎಚ್ಡಿಕೆ ಪರ ಪ್ರಚಾರ ನಡೆಸಿದ್ದಾರೆ. ಈ ನಡುವೆ ಸಂಸದೆ ಸುಮಲತಾ ಪ್ರಚಾರಕ್ಕೆ ಬರಲಿಲ್ಲ. ಮೇಲ್ನೋಟಕ್ಕೆ ಎಲ್ಲವೂ ಸರಿ ಎಂದುಕೊಂಡಿದ್ದರೂ ಇದು ನಿರೀಕ್ಷಿತವೇ ಆಗಿತ್ತು. ಜೆಡಿಎಸ್ಗೆ ಬಿಜೆಪಿಯ ಬೆಂಬಲ ್ಲಸ್ ಆಗಿದೆ. ಬಿಜೆಪಿಯ ಸಾಂಪ್ರದಾಯಿಕ ಮತಗಳು ಎಚ್ಡಿಕೆಗೆ ವರದಾನವಾಗಿದೆ. ಅದರಲ್ಲಿಯೂ ಸಾಮಾಜಿಕ ಜಾಲತಾಣದಲ್ಲಿ ಕುಮಾರಸ್ವಾಮಿ ಪರ ಹಾಗೂ ಕಾಂಗ್ರೆಸ್ ವಿರುದ್ಧ ಬಿಜೆಪಿ ತಂಡ ಭರ್ಜರಿಯಾಗಿಯೇ ಕ್ಯಾಂಪೇನ್ ಮಾಡಿತು.
ಕ್ಷೇತ್ರದಲ್ಲಿ ಕಾಂಗ್ರೆಸ್ ಹಲವು ಸಭೆಗಳನ್ನು ಮಾಡಿ ಶಕ್ತಿ ಪ್ರದರ್ಶನ ಮಾಡಿತು. ಇತ್ತ ಎಚ್ಡಿಕೆ ನೇತೃತ್ವದಲ್ಲಿ ಪ್ರತಿ ಕ್ಷೇತ್ರದಲ್ಲಿ ಒಂದೊಂದು ಬಹಿರಂಗ ಸಮಾವೇಶ ಮಾಡಿ ಕಾಂಗ್ರೆಸ್ಗೆ ಸೆಡ್ಡು ಹೊಡೆಯಿತು. ಒಟ್ಟಾರೆ, ಇಷ್ಟು ದಿನದ ರಂಗೇರಿದ ಕಣವಾಗಿದ್ದ ಮಂಡ್ಯದಲ್ಲಿ ಮತದಾನ ಮುಗಿದಿದೆ. ಇನ್ನೇನಿದ್ದರೂ ಫಲಿತಾಂಶಕ್ಕೆ ಹಲವು ದಿನ ಕಾಯಲೇಬೇಕಿದ್ದು, ಫಲಿತಾಂಶದ ಬಗೆಗಿನ ಕುತೂಹಲ ಎಲ್ಲರಿಗೂ ಇದೆ.
