ಕಂಪಿಸಿದ ಭೂಮಿ, ಭಾರಿ ಸ್ಫೋಟದ ಸದ್ದು; ಭೂ ವಿಜ್ಞಾನಿಗಳ ತಂಡದಿಂದ ಪರಿಶೀಲನೆ

ವಿಜಯಪುರ: ಜಿಲ್ಲೆಯ ಕೊಲ್ಹಾರ ತಾಲೂಕಿನ ಕೂಡಗಿ ಗ್ರಾಮದಲ್ಲಿ ಭಾರಿ ಸ್ಫೋಟದ ಸದ್ದಿನ ಜತೆಗೆ ಭೂಮಿ ಕಂಪಿಸಿದ ಅನುಭವವಾಗಿದ್ದು, ಸ್ಥಳೀಯರಲ್ಲಿ ಆತಂಕ ಮೂಡಿಸಿದೆ. ಸೋಮವಾರ ತಡರಾತ್ರಿ ಸ್ಥಳೀಯರಿಗೆ ಈ ಅನುಭವ ಆಗಿದ್ದು, ಕಳೆದೆರಡು ದಿನಗಳ ಹಿಂದೆಯೂ ಎರಡು ಭಾರಿ ಇಂಥದ್ದೇ ಅನುಭವವಾಗಿತ್ತು ಎಂದು ಸ್ಥಳೀಯರು ಹೇಳಿದ್ದಾರೆ.

ಭೂಕಂಪನ ಉಂಟಾಗಿದ್ದ ಪ್ರದೇಶಕ್ಕೆ ಭೂ ವಿಜ್ಞಾನಿಗಳ ತಂಡ ಭೇಟಿ ನೀಡಿ, ಪರಿಶೀಲನೆ ನಡೆಸಿದೆ. ಈ ವೇಳೆ ಮಾತನಾಡಿದ ಭೂ ವಿಜ್ಞಾನಿಗಳು, ಈಗಾಗಲೇ ಮನಗೂಳಿ, ಮಸೂತಿ, ಮಲಘಾಣ, ಎನ್​ಟಿಪಿಸಿ ಟೌನ್​ಶಿಪ್​ನಲ್ಲಿ ಇದೇ ರೀತಿಯ ಸ್ಫೋಟಕ ಸದ್ದು ಕೇಳಿಸಿತ್ತು. ಅದೇ ರೀತಿ ಕೂಡಗಿಯಲ್ಲೂ ಆಗಿರಬಹುದು ಎಂದಿದ್ದಾರೆ.

ಪರಿಶೀಲನಾ ವರದಿಯನ್ನು ಬೆಂಗಳೂರು ಮತ್ತು ಆಲಮಟ್ಟಿಯ ಪ್ರಕೃತಿ ವಿಕೋಪ ನಿರ್ವಹಣಾ ಕೇಂದ್ರಕ್ಕೆ ಕಳುಹಿಲಾಗುವುದು. ಅಲ್ಲಿಂದ ವರದಿ ಬಂದ ಬಳಿಕ ಸತ್ಯಾಸತ್ಯತೆಯ ಸ್ಪಷ್ಟತೆಗೆ ಬರಲಾಗುವುದು ಎಂದು ತಿಳಿಸಿದ್ದಾರೆ.