ಮಕ್ಕಳಿಗೆ ಅಕ್ಷರಾಭ್ಯಾಸ ಮಾಡಿಸಿದ ಪುತ್ತಿಗೆ ಸುಗುಣೇಂದ್ರ ಶ್ರೀ

ಶ್ರೀ ಸುಗುಣ ಸ್ಕೂಲ್​ಗೆ ಶುಭ ಚಾಲನೆ | ಸನಾತನ ಸಂಸ್ಕೃತಿ ಪೋಷಣೆಯ ಉದ್ದೇಶ

ವಿಜಯವಾಣಿ ಸುದ್ದಿಜಾಲ ಉಡುಪಿ
ಹತ್ತು ವರ್ಷದ ಹಿಂದೆ ಪಾಡಿಗಾರ್​ನಲ್ಲಿರುವ ತಮ್ಮ ಮಠದಲ್ಲಿಯೇ ಲೌಕಿಕ ವೈದಿಕ ಶಿಕ್ಷಣ ಪ್ರಾರಂಭಿಸಿದ್ದ ಪುತ್ತಿಗೆ ಸುಗುಣೇಂದ್ರ ತೀರ್ಥ ಶ್ರೀಪಾದರು, ಅನೇಕ ವಿದ್ಯಾರ್ಥಿಗಳನ್ನು ತರಬೇತುಗೊಳಿಸಿ ಸಮಾಜಕ್ಕೆ ನೀಡುತ್ತಿದ್ದಾರೆ.

ವೈದಿಕ ಶೈಕ್ಷಣಿಕ ಅನುಭವದ ಪರಿಷ್ಕೃತ ರೂಪವಾಗಿ, ಅದಕ್ಕೆಂದೇ ಪ್ರತ್ಯೇಕವಾಗಿ ನಿರ್ಮಿಸಿದ ಭವ್ಯ ಕಟ್ಟಡದಲ್ಲಿ ಈ ವರ್ಷದಿಂದಲೇ ಎಲ್​ಕೆಜಿಯಿಂದ ಎಸ್​ಎಸ್​ಎಲ್​ಸಿ ವರೆಗಿನ ಶಿಕ್ಷಣ ನೀಡಲು ಶ್ರೀ ಸುಗುಣ ಸ್ಕೂಲ್​ ಆರಂಭಿಸಿದ್ದಾರೆ. ತನ್ಮೂಲಕ ಶೈಕ್ಷಣಿಕ ಕ್ಷೇತ್ರದಲ್ಲೂ ಸಹ ಹೊಸ ಹೆಜ್ಜೆ ಇಟ್ಟಿದ್ದಾರೆ.

ಮಕ್ಕಳಿಗೆ ಅಕ್ಷರಾಭ್ಯಾಸ

ಶಾಲೆಯ ಆರಂಭದ ಹಿನ್ನೆಲೆಯಲ್ಲಿ ಉಡುಪಿ ಶ್ರೀಕೃಷ್ಣ ಮಠದಲ್ಲಿ ಸೋಮವಾರ ಬೆಳಗ್ಗೆ ಶ್ರೀವೇದವ್ಯಾಸ ಹಾಗೂ ದೇವರ ಪೂಜೆ ನೆರವೇರಿಸಿದ ಸುಗುಣೇಂದ್ರ ತೀರ್ಥರು, ಸರ್ವಜ್ಞ ಪೀಠದಿಂದಲೇ ಮಕ್ಕಳಿಗೆ ಅಕ್ಷರಾಭ್ಯಾಸ ಮಾಡಿಸಿದರು. ಈ ಅಪೂರ್ವ ಸುಯೋಗ ಹೊಂದಿದ ಮಕ್ಕಳ ಪಾಲಕರು ಧನ್ಯತೆಯ ಭಾವ ವ್ಯಕ್ತಪಡಿಸಿದರು.

ಶುಭ ಚಾಲನೆ

ಪುತ್ತಿಗೆ ಶ್ರೀಗಳು ಮಕ್ಕಳ ಕೈಹಿಡಿದು, ಶ್ರೀ ಗಣೇಶಾಯ ನಮಃ, ಶ್ರೀ ಕೃಷ್ಣಾಯ ನಮಃ ಎಂದು ಬರೆಯಿಸಿದರು. ಅಲ್ಲದೆ, ಆ ಮಕ್ಕಳಿಗೆ ಶಾಂತಿಮಂತ್ರ ಬೋಧಿಸಿ, ಶ್ರೀ ಸುಗುಣ ಪಾಠ ಶಾಲೆಗೆ ಶುಭ ಚಾಲನೆ ನೀಡಿದರು. ಕಿರಿಯ ಶ್ರೀ ಸುಶೀಂದ್ರ ತೀರ್ಥ ಶ್ರೀಪಾದರು ಹಾಗೂ ಮಠದ ಶಿಷ್ಯರು ಇದ್ದರು.