ಲಿಂಕ್​ ಕೆನಾಲ್​ ಕಾಮಗಾರಿ ಶೀಘ್ರ ಪ್ರಾರಂಭ

ಡಾ.ಎಚ್​.ಡಿ.ರಂಗನಾಥ್​ ಹೇಳಿಕೆ | ಮೂಡಲ್​ ಕುಣಿಗಲ್​ ಕೆರೆಗೆ ಗಂಗಾರತಿ, ಬಾಗಿನ ಅರ್ಪಣೆ

ಕುಣಿಗಲ್​: ಉಪಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್​ ಅವರು ಲಿಂಕ್​ ಕೆನಾಲ್​ ಕಾಮಗಾರಿ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದು, ಶೀಘ್ರದಲ್ಲೇ ಕಾಮಗಾರಿ ಪ್ರಾರಂಭವಾಗಲಿದೆ ಎಂದು ಶಾಸಕ ಡಾ.ಎಚ್​.ಡಿ.ರಂಗನಾಥ್​ ತಿಳಿಸಿದರು.

ಮೂಡಲ್​ ಕುಣಿಗಲ್​ ದೊಡ್ಡಕೆರೆ ಕೋಡಿ ಹರಿದ ಹಿನ್ನೆಲೆಯಲ್ಲಿ ಪುರಸಭೆ ಹಮ್ಮಿಕೊಂಡಿದ್ದ ಗಂಗಾರತಿ, ಬಾಗಿನ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಗಂಗಾರತಿ ಹಾಗೂ ಬಾಗಿನ ಅರ್ಪಿಸಿ ನಂತರ ಮಾತನಾಡಿ, ತಾಲೂಕಿನ ಲಿಂಕ್​ ಕೆನಾಲ್​ ಕಾಮಗಾರಿಗೆ ಕೆಲವರು ಅಡ್ಡಿ ಪಡಿಸಿದ್ದರಿಂದ ಸರ್ಕಾರ ತಾಂತ್ರಿಕ ಸಮಿತಿ ರಚಿಸಿತ್ತು, ಈ ಸಮಿತಿ ವರದಿ ನೀಡಿದ ಬಳಿಕ ಕಾಮಗಾರಿ ಆರಂಭಿಸಿದ್ದಾಗ ಜನಪ್ರತಿನಿಧಿಗಳು ಹಾಗೂ ರೈತರು ಹೋರಾಟ ಮಾಡಿ ಕೆನಾಲ್​ ಕಾಮಗಾರಿ ತಡೆದಿದ್ದರು. ಈ ಸಂಬಂಧ ಜಲಸಂಪನ್ಮೂಲ ಸಚಿವ ಡಿ.ಕೆ.ಶಿವಕುಮಾರ್​ ಅವರ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ರಾಜ್ಯ ರೈಲ್ವೆ ಸಚಿವ ವಿ.ಸೋಮಣ್ಣ ಹಾಗೂ ಜನಪ್ರತಿನಿಧಿಗಳು ಭಾಗವಹಿಸಿ ಚರ್ಚಿಸಲಾಗಿತ್ತು. ಈಗ ಉಪಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್​ ಅವರು ಸ್ಥಳ ಪರಿಶೀಲನೆ ಮಾಡಿ ಕಾಮಗಾರಿ ಆರಂಭಿಸುವಂತೆ ತಿಳಿಸಿದ್ದರಿಂದ ಶ್ರೀ ಕೆಲಸ ಆರಂಭವಾಗಲಿದೆ ಎಂದರು.

ಕೆರೆಗೆ ಅಲಂಕಾರ:

ಮಂಗಳವಾರ ದೊಡ್ಡಕೆರೆ ಕೋಡಿಯನ್ನು ಬಾಳೆ ಕಂದು, ಹಸಿರು ತಳಿರು ತೊರಣ ಹಾಗೂ ಹೂಗಳಿಂದ ಸಿಂಗರಿಸಲಾಗಿತ್ತು. ಕೋಡಿಯ ಅಂಗಳದಲ್ಲಿ ಮೂಡಲ್​ ಕುಣಿಗಲ್​ ಕೆರೆ, ನೋಡೋರ್ಗೊಂದೈ, ಮೂಡಿ ರ್ಬತಾನೆ ಚಂದಿರಾಮ ಜನಪದ ಗೀತೆ ಹಾಗೂ ಭರತ ನಾಟ್ಯದ ಜೈಕಾರ ಮೊಳಗಿತ್ತು. ಪೂರ್ಣಕುಂಭ ಹೊತ್ತ ನೂರಾರು ಮಹಿಳೆಯರು, ವಾದ್ಯಗೋಷ್ಠಿಗಳೊಂದಿಗೆ ಶಾಸಕ ರಂಗನಾಥ್​ ಮತ್ತು ಜನಪ್ರತಿನಿಧಿಗಳನ್ನು ವೇದಿಕೆಗೆ ಕರೆ ತರಲಾಯಿತು.

ಕೆರೆಯ ಕೋಡಿ ಅಂಗಳದಲ್ಲಿ ಆಯೋಜಿಸಿದ್ದ ಪೂಜಾ ಕೈಕರ್ಯಗಳನ್ನು ವಿದ್ವಾನ್​ ವೈ.ಎಸ್​.ಕುಮಾರಸ್ವಾಮಿ ನೆರವೇರಿಸಿದರು. ಬಳಿಕ ಶಾಸಕ ಡಾ.ಎಚ್​.ಡಿ.ರಂಗನಾಥ್​, ಪುರಸಭೆ ಅಧ್ಯಕ್ಷೆ ಎಸ್​.ಮಂಜುಳನಾಗರಾಜು, ತಹಸೀಲ್ದಾರ್​ ಯು.ರಶ್ಮಿ, ನೂರಾರು ನಾಗರಿಕರ ಸಮ್ಮುಖದಲ್ಲಿ ಗಂಗಾರತಿ ಮಾಡಿ ಬಳಿಕ ಬಾಗಿನ ಅರ್ಪಿಸಿದರು.

ಹೇಮಾವತಿ ಎಇಇ ರವಿ, ಪುರಸಭೆ ಉಪಾಧ್ಯಕ್ಷ ಮಲ್ಲಿಪಾಳ್ಯ ಶ್ರೀನಿವಾಸ್​, ಮುಖ್ಯಾಧಿಕಾರಿ ಕೃಷ್ಣ, ಸದಸ್ಯರಾದ ರಂಗಸ್ವಾಮಿ, ಜಯಲಕ್ಷಿ$್ಮ, ಮಂಜುಳರಂಗಪ್ಪ, ದೇವರಾಜು, ರೂಪಿಣಿ, ಶಿವಕುಮಾರ್​, ಮಾಜಿ ಸದಸ್ಯ ಶಂಕರ್​, ಪಾಪಣ್ಣ, ಮುಖಂಡ ಸುಂದರಕುಪ್ಪೆಪಾಪಣ್ಣ ಮತ್ತಿತರರು ಇದ್ದರು,

ಅಚ್ಚುಕಟ್ಟಿಗೆ ನೀರು : ಈ ಹಿಂದೆ ರಸ್ತೆ ಕಾಮಗಾರಿ ಮಾಡುವ ವೇಳೆಯಲ್ಲಿ ಕೆಲ ವ್ಯಕ್ತಿಗಳು ಅಚ್ಚುಕಟ್ಟು ಪ್ರದೇಶಕ್ಕೆ ನೀರು ಪೂರೈಸುವ ದೊಡ್ಡಕೆರೆಯ ತೂಬಿಗೆ ಸಿಮೆಂಟ್​ ಚೀಲಾ ಹಾಕಿ ತೂಬನ್ನು ಹಾಳು ಮಾಡಿ ನೀರು ಹರಿಯದಂತೆ ಮಾಡಿದ್ದಾರೆ. ತೂಬು ಹಾಳು ಮಾಡಿರುವ ವ್ಯಕ್ತಿಗಳೇ ತೂಬಿನ ಹೆಸರಿನಲ್ಲಿ ರಾಜಕಾರಣ ಮಾಡಲು ಹೊರಟ್ಟಿದ್ದಾರೆ. ಆದರೆ ನಾನು ರಾಜಕಾರಣ ಮಾಡುವುದಿಲ್ಲ, ತೂಬು ದುರಸ್ತಿ ಮಾಡುವ ಸಂಬಂಧ ಟೆಕ್ನಿಕಲ್​ ಕಮಿಟಿಯಿಂದ ಸ್ಥಳ ಪರಿಶೀಲನೆ ಮಾಡಿಸಿದ್ದೇನೆ. ನೀರು ತುಂಬಿರುವುದರಿಂದ ದುರಸ್ತಿ ಮಾಡಲು ಆಗುವುದಿಲ್ಲ. ನೀರು ಕಡಿಮೆ ಆದ ಬಳಿಕ ಸರಿಪಡಿಸುವುದಾಗಿ ಟೆಕ್ನಿಕಲ್​ ಕಮಿಟಿ ತಿಳಿಸಿದೆ ಎಂದು ಶಾಸಕರು ತಿಳಿಸಿದರು.