ವೀರಯೋಧರಿಗೆ ನೈತಿಕ ಬೆಂಬಲ ನೀಡಲಿ

ಗಂಗಾವತಿ: ಜಮ್ಮುಕಾಶ್ಮೀರದ ಪಹಲ್ಗಾಮ್‌ನ ಭಯೋತ್ಪಾದಕ ದಾಳಿಯಲ್ಲಿ ಮೃತಪಟ್ಟ ಆಂಧ್ರ ಪ್ರದೇಶದ ವೀರ ಯೋಧ ಮುರಳೀನಾಯ್ಕ ಅವರಿಗೆ ನಗರದ ವಿರುಪಾಪುರತಾಂಡಾದ ಸೇವಾಲಾಲ್ ವೃತ್ತದಲ್ಲಿ ಭಾನುವಾರ ರಾತ್ರಿ ಶ್ರದ್ಧಾಂಜಲಿ ಸಲ್ಲಿಸಲಾಯಿತು.

ಭಾವಚಿತ್ರಕ್ಕೆ ಪುಷ್ಪಾರ್ಪಣೆ ಸಲ್ಲಿಸಿದ ಬಂಜಾರ ಸಮಾಜದ ಸದಸ್ಯರು, ದೀಪಪ್ರಜ್ವಲನದೊಂದಿಗೆ ಮೌನಾಚರಣೆ ಸಲ್ಲಿಸಿದರು. ಯೋಧನ ಆತ್ಮಕ್ಕೆ ಶಾಂತಿ ದೊರೆಯಲಿ ಮತ್ತು ಕುಟುಂಬಕ್ಕೆ ದುಃಖಭರಿಸುವ ಶಕ್ತಿ ದೇವರು ನೀಡಲೆಂದು ಸಾಮೂಹಿಕ ಪ್ರಾರ್ಥನೆ ಸಲ್ಲಿಸಲಾಯಿತು.

ಶ್ರೀ ಸೇವಾಲಾಲ್ ಮಹಾರಾಜ ಕಟ್ಟಡ ಕಾರ್ಮಿಕ ಸಂಘದ ಅಧ್ಯಕ್ಷ ಪಾಂಡುನಾಯ್ಕ ಮಾತನಾಡಿ, ದೇಶರಕ್ಷಣೆಗೆ ಪಣತೊಟ್ಟ ವೀರಯೋಧ ಅಗಲುವಿಕೆಯಿಂದ ದೇಶಕ್ಕೆ ನಷ್ಟವಾಗಿದ್ದು, ಉಗ್ರರ ಶಮನಕ್ಕೆ ಸಜ್ಜಾಗಿರುವ ವೀರಯೋಧರಿಗೆ ಪ್ರತಿಯೊಬ್ಬರೂ ಸಾಮೂಹಿಕ ಪ್ರಾರ್ಥನೆ ಸಲ್ಲಿಸುವ ಮೂಲಕ ನೈತಿಕ ಬೆಂಬಲ ನೀಡಬೇಕಿದೆ ಎಂದರು.

ನಗರಸಭೆ ಮಾಜಿ ಸದಸ್ಯ ರಾಮನಾಯ್ಕ, ಬಂಜಾರ ಸಮಾಜದ ಮುಖಂಡರಾದ ಪ್ರಕಾಶ ರಾಠೋಡ, ಹನುಮಂತ, ವೆಂಕಟೇಶ ಜಾಧವ್, ಪ್ರಕಾಶ್ ಕೊಟಗಿ, ಕಷ್ಣ ನಾಯ್ಕ, ಠಾಕೂ ನಾಯ್ಕ, ರಾಜು, ವೆಂಕಟೇಶ, ವೆಂಕಣ್ಣ, ಲೋಕೇಶ, ಮಂಜುನಾಥ, ಉಮೇಶ ಸೇರಿ ಗೋರ್ ಸೇನಾ ಸದಸ್ಯರಿದ್ದರು.