ಕೈಕೊಟ್ಟ ಮಳೆ, ಅನ್ನದಾತ ಕಂಗಾಲು

ಭಾರತಿ ಒ.ಚಿತ್ತಯ್ಯ ಪರಶುರಾಮಪುರ
ಈ ಬಾರಿ ವರುಣನ ಅವಕೃಪೆಯಿಂದಾಗಿ ಅನ್ನದಾತ ಸಂಪೂರ್ಣ ಕಂಗಾಲಾಗಿದ್ದಾನೆ. ಕೈ ಕೊಟ್ಟ ಮಳೆಯಿಂದಾಗಿ ಭೂಮಿ ತಾಯಿ ನಂಬಿದ ರೈತರು ನಿರೀಕ್ಷಿತ ಬೆಳೆ ಬಾರದೆ ಅಕ್ಷರಶಃ ಬೀದಿಗೆ ಬಂದಿದ್ದಾರೆ.

ಪರಶುರಾಮಪುರ ಹೋಬಳಿಯಾದ್ಯಂತ ಮಳೆಯಾಶ್ರಿತ 20.600 ಸಾವಿರ ಹೆಕ್ಟೇರ್ ಪ್ರದೇಶದಲ್ಲಿ ಬಿತ್ತನೆ ಮಾಡಿದ್ದ ಶೇಂಗಾ ಅನಾವೃಷ್ಟಿಗೆ ತುತ್ತಾಗಿ ಸಂಪೂರ್ಣ ಒಣಗಿದೆ. ಬೆಳೆಗಾಗಿ ಹನಿ ನೀರಿಗೆ ಪರದಾಡುವಂತಹ ಸ್ಥಿತಿ ರೈತನದ್ದಾಗಿದೆ.

ಸಾಲ ಮಾಡಿ ಹಾಕಿದ ಬೆಳೆಯಂತೂ ಹೊಟ್ಟೆ-ಬಟ್ಟೆಗಾಗಲಿಲ್ಲ. ಕನಿಷ್ಟ ಒಣ ಮೇವು ತಿಂದು ಜಾನುವಾರುಗಳಾದರೂ ಜೀವ ಉಳಿಸಿಕೊಳ್ಳಲಿ ಎಂದು ಒಣಗಿದ ಬೆಳೆಯನ್ನು ಕಟಾವು ಮಾಡುವ ದೃಶ್ಯ ಸಾಮಾನ್ಯವಾಗಿದೆ.

ಚಳ್ಳಕೆರೆ ತಾಲೂಕಿನ 60 ಸಾವಿರ ಹೆಕ್ಟೇರ್ ಪೈಕಿ ಪರಶುರಾಮಪುರ ಹೋಬಳಿಯ 10 ಗ್ರಾಪಂ ವ್ಯಾಪ್ತಿಯ ರೈತರು ಶೇಂಗಾ ಬೆಳೆದಿದ್ದರು. ಇದೀಗ ಈ ಎಲ್ಲ ರೈತರು ಶೇಂಗಾ ಬಳ್ಳಿಯನ್ನು ಅರಗಿ ಮಾಡಿ ಸಂಗ್ರಹಿಸುತ್ತಿದ್ದಾರೆ.

ಪರಶುರಾಮಪುರ, ಸಿದ್ದೇಶ್ವರನದುರ್ಗ, ಟಿ.ಎನ್.ಕೋಟೆ, ದೊಡ್ಡಚೆಲ್ಲೂರು, ಬೆಳೆಗೆರೆ, ಪಗಡಲಬಂಡೆ, ಜಾಜೂರು, ಸಿ.ಎನ್.ಹಳ್ಳಿ, ಚೌಳೂರು ದೇವರಮರಿಕುಂಟೆ, ಸಿರಿವಾಳ ಓಬಳಾಪುರ ಸೇರಿ 52 ಹಳ್ಳಿಗಳಲ್ಲಿ ಶೇಂಗಾ ಬೆಳೆಯಲಾಗಿತ್ತು.

ಬೆಳೆ ಪರಿಹಾರಕ್ಕೆ ಪಟ್ಟು: ಚಳ್ಳಕೆರೆ ತಾಲೂಕಿನಲ್ಲಿ ಶೇಂಗಾ ಬೆಳೆ ನಷ್ಟಕ್ಕೆ ಒಳಗಾದ ಎಲ್ಲ ರೈತರಿಗೂ ವಿಮೆ ಮತ್ತು ಬೆಳೆನಷ್ಟ ಪರಿಹಾರ ಮಂಜೂರು ಮಾಡಬೇಕು ಎಂದು ಟಿ.ಎನ್.ಕೋಟೆ ಗ್ರಾಪಂ ಮಾಜಿ ಅಧ್ಯಕ್ಷ ಒ.ಬೈಲಪ್ಪ, ಮಾಜಿ ಸದಸ್ಯ ಆರ್.ಟಿ.ನಿಂಗಣ್ಣ, ಮುಖಂಡರಾದ ಜಯಣ್ಣ, ಗಣೇಶ, ತಿಪ್ಪೇಸ್ವಾಮಿ, ಗೋಸಿಕೆರೆ ನಾಗೇಂದ್ರಪ್ಪ, ತಿಮ್ಮಯ್ಯ, ಕೃಷ್ಣಮೂರ್ತಿ, ಜಾಜೂರು ನರಸಿಂಹಪ್ಪ, ಎಸ್‌ದುರ್ಗ ಹನುಮಂತರೆಡ್ಡಿ, ತ್ಯಾಗರಾಜು ಆಗ್ರಹಿಸಿದ್ದಾರೆ.