ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಡಾ. ಪುರುಷೋತ್ತಮ ಬಿಳಿಮಲೆ ಡಾ. ಶಿವರಾಮ ಕಾರಂತರ ಬದುಕು ಮತ್ತು ಬರಹಗಳ ಪ್ರಸ್ತುತತೆ ಕುರಿತು ಉಪನ್ಯಾಸ ನೀಡಿದರು. 20ನೇ ಶತಮಾನದಲ್ಲಿ ಹುಟ್ಟಿರುವ ಕಾರಂತರು ಆ ಶತಮಾನ ಪೂರ್ಣ ಕಳೆದಿದ್ದು, 21ನೇ ಶತಮಾನದ ಕೊನೆಯವರೆಗೂ ಸಹ ಅವರು ಬಿಟ್ಟು ಹೋದ ಸಾಹಿತ್ಯದ ಮೂಲಕ ಕಡಲ ಭಾರ್ಗವ ಪ್ರಸ್ತುತರಾಗಿರುತ್ತಾರೆ. 1931ರಲ್ಲಿ ಸ್ವಾತಂತ್ರ್ಯದ ಕಿಚ್ಚು ಹೆಚ್ಚುತ್ತಿರುವ ಸಂದರ್ಭದಲ್ಲಿ ಈ ನೆಲದ ಸಮಸ್ಯೆ ಇರುವುದು ಬ್ರಿಟಿಷರಿಂದಲ್ಲ ಎಂಬ ಹೊಸ ಕಲ್ಪನೆ, ಸಾಮಾಜಿಕ ಪ್ರಜ್ಞೆಯನ್ನು ಚೋಮನ ದುಡಿ ಕಾದಂಬರಿ ಮೂಲಕ ಅನಾವರಣಗೊಳಿಸಿದರು. ದಲಿತರ ನೋವನ್ನು ಸಾಹಿತ್ಯದ ಮೂಲಕ ಮನೋಜ್ಞವಾಗಿ ಬಿತ್ತರಿಸಿದ್ದಾರೆ. ಚೋಮನ ದುಡಿ ಸಿನಿಮಾ ನೋಡಿದರೆ ಕಾರಂತರ ಸಾಹಿತ್ಯಶಕ್ತಿ ಕಣ್ಣೆದುರಿಗೆ ಬರುತ್ತದೆ. ಮಂಜುಳೆಯ ಜೀವನ ಕುರಿತ ಗಂಡಸರು ಎಂಬ ಕಾದಂಬರಿ ಮೂಲಕ ಮಹಿಳಾ ಸಾಹಿತ್ಯದ ಬೀಜ ಬಿತ್ತಿದವವರು. ಪರಿಸರವನ್ನು ಉದ್ಯಮವನ್ನಾಗಿ ನೋಡದೆ ತನ್ನೊಳಗೆ ಜೈವಿಕವನ್ನಾಗಿಸಿಕೊಂಡು ರಕ್ಷಣೆಗೆ ಅಪಾರ ಹೋರಾಟ, ಧೈರ್ಯ ತೋರಿದ್ದರು. ಅದು ಬೆಟ್ಟದ ಜೀವ ಎಂಬ ಕಾದಂಬರಿ ಮೂಲಕ ತೆರೆದಿಟ್ಟರು. ಯಕ್ಷಗಾನ ಕಲೆ ರಕ್ಷಿಸಿದ್ದೂ ಸಹ ಕಾರಂತರೇ. ತಮ್ಮ ಜೀವಿತಾವಧಿಯಲ್ಲಿ 450ಕ್ಕೂ ಹೆಚ್ಚು ಜ್ಞಾನಮಯ ಪುಸ್ತಕ ಬರೆದಿದ್ದಾರೆ ಎಂದು ತಿಳಿಸಿದರು. ಬಳಿಕ ಸಂವಾದದಲ್ಲಿ ಕಾರಂತರ ಕುರಿತಾಗಿ ಕೇಳಿ ಬಂದ ವಿವಿಧ ಪ್ರಶ್ನೆಗಳಿಗೆ ಉತ್ತರಿಸಿದರು.
