ದಿನನಿತ್ಯ ಕಂದಮ್ಮಗಳನ್ನು ಸೊಂಟದಲ್ಲಿಟ್ಟುಕೊಂಡು ಹಲವು ಯುವತಿಯರು, ಮಹಿಳೆಯರು ಭಿಕ್ಷಾಟನೆ ನಡೆಸುತ್ತಿದ್ದು, ಮಹಿಳೆಯರು ಭಿಕ್ಷೆ ಬೇಡುವಾಗ ಹಸುಗೂಸುಗಳು ಮಲಗಿರುತ್ತವೆ ಎಂದು ಅಧಿಕಾರಿಗಳಿಗೆ ಸ್ಥಳೀಯರು ವಿವರವಾಗಿ ಮಾಹಿತಿ ನೀಡಿದರು. ಭಿಕ್ಷಾಟನೆ ಮಾಡುವುದನ್ನು ವೃತ್ತಿಯಾಗಿಸಿಕೊಂಡು ಸಿರಿಗೇರಿ, ತೆಕ್ಕಲಕೋಟೆ ಹತ್ತಿರದ ಬಲಕುಂದಿಯ ರಸ್ತೆ ಬಳಿ ವಾಸವಾಗಿರುವ ಮನೆಗಳಿಗೆ ತೆರಳಿದ ಅಧಿಕಾರಿಗಳು, ಹಸುಗೂಸುಗಳನ್ನು ಬಾಡಿಗೆ ಪಡೆದು ಭಿಕ್ಷಾಟನೆ ಮಾಡುವುದು ಸರಿಯಲ್ಲ, ಉದ್ಯೋಗ ಖಾತ್ರಿಯಡಿ ಕೆಲಸ ಕೊಡಲಾಗುವುದು, ಕೆಲಸ ಮಾಡಿ ಜೀವನ ಸಾಗಿಸಿ ಎಂದು ಸೂಚಿಸಿದರು. ಈ ಕುರಿತು ಪತ್ರಿಕೆಗೆ ಪ್ರತಿಕ್ರಿಯೆ ನೀಡಿದ ಜಿಲ್ಲಾ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಉಪ ನಿರ್ದೇಶಕ ಆರ್.ನಾಗರಾಜ್, ವಿಜಯವಾಣಿ ಮುಖಪುಟದಲ್ಲಿ ಗುರುವಾರ ‘ಭಿಕ್ಷಾಟನೆಗೆ ಶಿಶು ದಂಧೆ’ ಶೀರ್ಷಿಕೆಯಡಿ ಪ್ರಕಟವಾದ ತನಿಖಾ ವರದಿಯನ್ನು ಗಂಭೀರವಾಗಿ ಪರಿಗಣಿಸಿದ್ದು, ಘಟನಾ ಸ್ಥಳಕ್ಕೆ ತೆರಳಿ, ಪರಿಶೀಲನೆ ನಡೆಸಿದ್ದೇವೆ. ಇಲ್ಲಿ ವಾಸಿಸುವವರ ಮೂಲ ವೃತ್ತಿಯೆ ಭಿಕ್ಷಾಟನೆಯಾಗಿದೆ. ಜಿಲ್ಲಾದ್ಯಂತ ಎಲ್ಲೆಲ್ಲಿ ಇಂಥವರು ವಾಸವಾಗಿದ್ದಾರೆ ಎಂಬುದನ್ನು ಪರಿಶೀಲಿಸಿ ಅವರಿಗೆ ಪುನವರ್ಸತಿ ಕಲ್ಪಿಸಲಾಗುವುದು ಎಂದರು.
