ಲಕ್ಷ್ಮೇಶ್ವರದಲ್ಲಿ ರಾಜಕಾಲುವೆ, ಚರಂಡಿ ಹೂಳೆತ್ತುವ ಕಾರ್ಯ ಜೋರು

ಲಕ್ಷ್ಮೇಶ್ವರ: ಮಳೆಗಾಲದಲ್ಲಿ ಪಟ್ಟಣದ ವಿವಿಧ ವಾರ್ಡ್​ಗಳ ದೊಡ್ಡ ಚರಂಡಿ, ರಾಜಕಾಲುವೆಗಳು ತುಂಬಿ ಹರಿದು ಅವಾಂತರ ಸೃಷ್ಟಿಸುವುದನ್ನು ತಪ್ಪಿಸಲು ಪುರಸಭೆ ಸ್ವಚ್ಛತಾ ಕಾರ್ಯ ಕೈಗೊಂಡಿದೆ.
8-10 ದಿನಗಳಿಂದ ಪೌರ ಕಾರ್ವಿುಕರು, ಜೆಸಿಬಿ ಬಳಸಿ ಚರಂಡಿಗಳ ಹೂಳೆತ್ತಲಾಗುತ್ತಿದೆ. ಕೋವಿಡ್ ಕಾರ್ಯದ ನಡುವೆಯೂ ಪುರಸಭೆ ಕೈಗೊಂಡಿರುವ ಈ ಕಾರ್ಯ ಸ್ಥಳೀಯರಲ್ಲಿ ಸಂತಸ ಮೂಡಿಸಿದೆ. ಮಳೆ ಬಂದಾಗ ರಾಜಕಾಲುವೆ, ದೊಡ್ಡ ಚರಂಡಿಗಳು ತುಂಬಿ ಕೊಳಚೆ ನೀರು ರಸ್ತೆಯಲ್ಲಿ ಹರಿದು, ಮನೆಯೊಳಗೆ ನುಗ್ಗಿ ಅವಾಂತರ ಸೃಷ್ಟಿಯಾಗುತ್ತಿತ್ತು. ಇದನ್ನು ತಪ್ಪಿಸಲು ಅಗತ್ಯ ಮುಂಜಾಗ್ರತೆ ಕ್ರಮ ಕೈಗೊಳ್ಳುವಂತೆ ಜಿಲ್ಲಾಧಿಕಾರಿ ಸಂಬಂಧಪಟ್ಟ ಅಧಿಕಾರಿಗಳಿಗೆ ಸೂಚಿಸಿದ್ದರು. ಈ ಹಿನ್ನೆಲೆಯಲ್ಲಿ ಲಕ್ಷ್ಮೇಶ್ವರ ಪುರಸಭೆ ಮುಖ್ಯಾಧಿಕಾರಿ, ಅಧ್ಯಕ್ಷ-ಉಪಾಧ್ಯಕ್ಷರು, ಹಿರಿಯ ಸದಸ್ಯರು ಸ್ಥಳ ಪರಿಶೀಲಿಸಿ, ಸಾರ್ವಜನಿಕರಿಂದ ಅಹವಾಲು ಸ್ವೀಕರಿಸಿ ಕ್ರಿಯಾಯೋಜನೆ ಸಿದ್ಧಪಡಿಸಿದ್ದಾರೆ.
ಕ್ರಿಯಾಯೋಜನೆಯಲ್ಲಿನ ಕಾಮಗಾರಿಗಳು: ವಾರ್ಡ್ 1, 2, 3, 4, 5, 7 ಹಾಗೂ 11ರ ಜನವಸತಿ ಪ್ರದೇಶದಲ್ಲಿರುವ ಸುಮಾರು 3 ಕಿಮೀ ಇರುವ ಲಂಡಿ ನಾಲಾ ರಾಜಕಾಲುವೆ ಯಲ್ಲಿನ ಗಿಡಗಂಟಿ, ತ್ಯಾಜ್ಯ, ಹೂಳು ತೆಗೆದು ಸ್ವಚ್ಛ ಗೊಳಿಸುವುದು. ಲಕ್ಷ್ಮೇಶ್ವರ-ಹುಬ್ಬಳ್ಳಿ ರಸ್ತೆ ಪಂಪ ವೃತ್ತದಿಂದ ಜಯದೇವ ವೃತ್ತದವರೆಗೆ ಆರ್​ಸಿಸಿಯ ದೊಡ್ಡ ಚರಂಡಿ ಸ್ವಚ್ಛಗೊಳಿಸುವುದು, ಈದ್ಗಾ ಮೈದಾನದಿಂದ ಕೆವಿಜಿ ಬ್ಯಾಂಕ್ ಮುಖ್ಯ ಚರಂಡಿವರೆಗೆ ಸ್ವಚ್ಛಗೊಳಿಸುವುದು, ಇಟ್ಟಿಗೆಕೆರೆಗೆ ಮಳೆ ನೀರು ಸರಾಗವಾಗಿ ಹರಿದು ಬರಲು 1 ಕಿಮೀ ಮಾರ್ಗ ಸ್ವಚ್ಛಗೊಳಿಸುವುದು. ಪಂಪ ವೃತ್ತದಿಂದ ಬಸ್ತಿ ಬಣದ ಮುಖಾಂತರ ಹಾಯ್ದು ಹೋಗುವ ವಿದ್ಯಾರಣ್ಯ ವೃತ್ತ, ಹಾವಳಿ ಹನುಮಂತ ದೇವಸ್ಥಾನದವರೆಗಿನ ಚರಂಡಿ ಸ್ವಚ್ಛಗೊಳಿಸುವ ಕಾಮಗಾರಿಗಳು ಈ ಕ್ರಿಯಾಯೋಜನೆಯಲ್ಲಿವೆ.