ವಿರಾಜಪೇಟೆ : ಮನುಷ್ಯ ಆರೋಗ್ಯವಾಗಿರಲು ನಗುವನ್ನು ಕಲಿಯಬೇಕು. ಆಗ ಮಾತ್ರ ಶರೀರದಲ್ಲಿ ಶಕ್ತಿ ಹೆಚ್ಚುತ್ತದೆ ಎಂದು ಮೈಸೂರಿನ ಖ್ಯಾತ ಸಾಹಿತಿ ಮತ್ತು ಚುಕ್ಕಿಚಿತ್ರ ಕಲಾವಿದ ಮೋಹನ್ ವರ್ಣೇಕರ್ ಹೇಳಿದರು.
ಸಮೀಪದ ಆರಮೇರಿ ಕಳಂಜೇರಿ ಮಠದ ಲಿಂಗರಾಜೇಂದ್ರ ಭವನದಲ್ಲಿ ಇತ್ತೀಚೆಗೆ ನಡೆದ ’ಹೊಂಬೆಳಕು ಕಿರಣ 223 ಮಾಸಿಕ ತತ್ತ್ವ ಚಿಂತನಾಗೋಷ್ಠಿ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಆರೋಗ್ಯವಾಗಿರೋಣ ಎಂಬ ವಿಷಯದ ಬಗ್ಗೆ ತಮ್ಮ ಉಪನ್ಯಾಸದಲ್ಲಿ ಮಾತನಾಡಿದರು.
ಜೀವನದ ನೆಮ್ಮದಿಗೆ ನಗುವೇ ಮುಖ್ಯ, ಎಷ್ಟೇ ಅಲಂಕಾರ ಮಾಡಿಕೊಂಡರೂ ಮುಖದಲ್ಲಿ ನಗು ಇಲ್ಲದಿದ್ದರೆ ಪ್ರಯೋಜನವಿಲ್ಲ, ಕೋಪಬಂದ ಸಂದರ್ಭ ನಗುವಿಗೆ ಸ್ಪಂದಿಸುವವರು ಅನೇಕರಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ಎಷ್ಟೇ ಒತ್ತಡಗಳಿದ್ದರೂ ನಗುವುದು ನಾಗರಿಕತೆಯ ಆರೋಗ್ಯವಾಗಿರುತ್ತದೆ. ನಗುವಿನಿಂದ ಶರೀರದಲ್ಲಿರುವ ಇತರ ಕಾಯಿಲೆಗಳು ಗುಣವಾಗಲು ಸಾಧ್ಯ. ನಗುವಿನಲ್ಲಿ ಅನೇಕ ಬಗೆಯ ನಗುಗಳಿವೆ. ಆದರೆ ಅಹಂಕಾರ ಮತ್ತು ದ್ವೇಷದ ನಗು ಬೇಡ, ಹೃದಯದಿಂದ ಬರುವಂತ ನಗು ಅವಶ್ಯ ಎಂದು ಹೇಳಿದರು.
ನಾನು 40 ವರ್ಷಗಳಿಗೂ ಹೆಚ್ಚುಕಾಲ ಚುಕ್ಕಿಯ ಮೂಲಕ ಚಿತ್ರಗಳನ್ನು ಬಿಡಿಸುತ್ತಿದ್ದೇನೆ ಎಂದ ಮೋಹನ್, ಕರ್ನಾಟಕದ ಶ್ರೇಷ್ಠ ಸಾಹಿತಿಗಳು, ಹೆಸರಾಂತ ಕವಿಗಳು ಸೇರಿ 20ಕ್ಕು ಹೆಚ್ಚು ಚುಕ್ಕಿಹಾಕಿ ಬಿಡಿಸಿರುವ ಚಿತ್ರಗಳನ್ನು ಸಭೆಯಲ್ಲಿ ಪ್ರದರ್ಶಿಸಿದರು.
