ಬರಹಗಳ ಮೂಲಕ ಕಟುವಾಗಿ ಟೀಕಿಸುತ್ತಾ ಇಡೀ ರಾಜಕೀಯ ವ್ಯವಸ್ಥೆಯನ್ನೇ ಬದಲಿಸುವ ಹಾಗೂ ಸರ್ಕಾರವನ್ನೇ ಬೀಳಿಸುವ ಶಕ್ತಿ ಪಿ.ಲಂಕೇಶ್ ಅವರಿಗಿತ್ತು. ಕವಿ, ನಾಟಕ, ನಟನೆ, ನಿರ್ದೇಶನ, ಅನುವಾದ, ಸಂಪಾದಕ ಸೇರಿದಂತೆ ಎಲ್ಲ ಕ್ಷೇತ್ರಗಳನ್ನು ಆವರಿಸಿಕೊಂಡಿರುವ ಪಿ.ಲಂಕೇಶ್ ಅವರು ಇತರಿಗೂ ಮಾದರಿ. ಇವರು ಮಾನವೀಯ ಮೌಲ್ಯಗಳಿಗೆ ಬೆಲೆ ಕೊಡುತ್ತಿದ್ದರು. ನೊಂದವರ ಬಗ್ಗೆ ಕಾಳಜಿ ವಹಿಸಿದ್ದರು. ವಿದ್ಯಾರ್ಥಿಗಳು ಇವರ ಹಾದಿಯಲ್ಲಿಯೇ ಸಾಗಬೇಕಿದೆ. ಏಕೆಂದರೆ ಪ್ರಸ್ತುತದಲ್ಲಿ ಕೇವಲ ಜ್ಞಾನಕ್ಕಾಗಿ ಓದುವುದೇ ಆಗಿದೆ. ಜತೆಗೆ ಸಂಬಳ ತರುವ ಕೆಲಸ ಸಿಕ್ಕರೆ ಸಾಕೆನ್ನುವ ಪರಿಸ್ಥಿತಿ ಇದೆ. ಆದರೆ ಇಲ್ಲಿ ಲಂಕೇಶ್ ಅಂತಹವರು ಬರೆದಿರುವ ಕೃತಿಗಳನ್ನು ಓದುವ ಹವ್ಯಾಸ ಬೆಳೆಸುವುದು ಮುಖ್ಯವಾಗಬೇಕು ಎಂದು ಸಲಹೆ ನೀಡಿದರು.
