ಪೆರ್ಮಂಕಿಯ ಕೈಗುರಿಯಲ್ಲಿ ಶನಿವಾರ ರಾತ್ರಿ ಸಣ್ಣ ಪ್ರಮಾಣದಲ್ಲಿ ಭೂಕುಸಿತವಾಗಿದ್ದರೆ, ಭಾನುವಾರ ಮತ್ತು ಸೋಮವಾರ ಸುಮಾರು 4 ಅಡಿ ಕೆಳಕ್ಕೆ ಭೂಮಿ ಕುಸಿದಿದೆ. ಈ ಹಂತದಲ್ಲಿ ಮೇಲ್ಭಾಗದ ರಸ್ತೆ ಬಿರುಕು ಬಿಟ್ಟು ಸಂಪರ್ಕ ಸ್ಥಗಿತಗೊಂಡಿದೆ. ಇಳಿಜಾರು ಭಾಗದಲ್ಲಿರುವ ತೆಂಗು ಮತ್ತು ಅಡಕೆ ತೋಟಕ್ಕೆ ಗುಡ್ಡದ ಮಣ್ಣು ಬಿದ್ದಿದೆ. ತೋಟದತ್ತ ಭಾರಿ ಮಣ್ಣು ಬಿದ್ದು, ಮಣ್ಣಿನ ಭಾರಕ್ಕೆ 50ಕ್ಕೂ ಹೆಚ್ಚು ತೆಂಗು ಮತ್ತು ಅಡಕೆ ಮರಗಳು ನೆಲಮುಖವಾಗಿವೆ. ಇದರಿಂದ ಸ್ಥಳೀಯ ತೋಟಗಾರರಿಗೆ ಲಕ್ಷಾಂತರ ರೂ. ನಷ್ಟ ಆಗಿರುವ ಬಗ್ಗೆ ಅಂದಾಜಿಸಲಾಗಿದೆ. ಪರಂಬೋಕು ತೋಡುಗಳು ಮತ್ತು ಕೆರೆಯಲ್ಲಿ ಮಣ್ಣು ತುಂಬಿದ್ದು, ತೋಡುಗಳು ನಾಪತ್ತೆಯಾಗಿವೆ. ಸತತ ಗಾಳಿ-ಮಳೆಯಿಂದ ಗುಡ್ಡದ ನೀರು ಎಲ್ಲೆಂದರಲ್ಲಿ ಹರಿಯುವಂತಾಗಿದ್ದು, ಈ ಪ್ರದೇಶದ ಜನರಲ್ಲಿ ಭೀತಿ ಮನೆ ಮಾಡಿದೆ.
