ಪೂಜೆಗೂ ಮುನ್ನ ಅಮಾನಿಕೆರೆಯಲ್ಲಿ ಗಂಗೆಯನ್ನು ಕಳಸದಲ್ಲಿ ತುಂಬಿಕೊಂಡು ದೇವಿ ಆವಾಹನೆ ಮಾಡಲಾಯಿತು. ಅರಿಶಿನ, ಕುಂಕುಮ, ಹೂವುಗಳಿಂದ ಕಳಸ ಅಲಂಕರಿಸಿ ಪೂಜಿಸಲಾಯಿತು. ಗಂಗಾಜಲದ ಕಳಸವನ್ನು ಹೊಂಬಾಳೆಯೊಂದಿಗೆ ಕಿಶೋರಿಯರ ತಲೆಮೇಲೆ ಹೊರಿಸಿ ಮಂಗಳವಾದ್ಯದೊಂದಿಗೆ ದೇವಿಯ ಕಳಶವನ್ನು ಹೊತ್ತು ತರಲಾಯಿತು. ನಂತರ ಗದ್ದುಗೆಯಲ್ಲಿ ಕಳಸ ಪ್ರತಿಷ್ಠಾಪಿಸಿ ಧೂಪ, ದೀಪಗಳಿಂದ ಆರತಿ ಬೆಳಗಿ ದೇವಿಗೆ ಬಲಿ ಅರ್ಪಿಸಲಾಯಿತು. ಭಕ್ತರು ದೇವಿಗೆ ಬಾಗಿನ, ಸೀರೆ ಸಮರ್ಪಿಸಿ ಪೂಜೆ ಸಲ್ಲಿಸಲಾಯಿತು. ವಿವಿಧ ಭಕ್ಷ ಭೋಜನ, ಕಜ್ಜಾಯ ನೈವೇದ್ಯ ಸಮರ್ಪಿಸಲಾಯಿತು. ಭಕ್ತರು ಸರತಿಯಲ್ಲಿ ಸಾಗಿ ಪೂಜೆ ಸಲ್ಲಿಸಿ ಪ್ರಸಾದ ಸ್ವೀಕರಿಸಿದರು. ದೇವಿಯ ಗುಡಿಯನ್ನು ಭಕ್ತರ ಸಹಕಾರದಲ್ಲಿ ನೂತನವಾಗಿ ನಿರ್ಮಿಸಲು ಚರ್ಚಿಸಲಾಯಿತು.
