ಕೊಡಗಿನಲ್ಲಿ ಈ ಬಾರಿ ಉಂಟಾದ ಮಳೆಯ ಪರಿಣಾಮ ಬೇಸಿಗೆಯ ಆರಂಭಕ್ಕೂ ಮೊದಲೇ ಕಾಣಿಸಿಕೊಳ್ಳತೊಡಗಿದೆ. ಜೀವನದಿ ಕಾವೇರಿ ಉಗಮಸ್ಥಾನ ತಲಕಾವೇರಿ ಪಕ್ಕದಲ್ಲೇ ಇರುವ ಭಾಗಮಂಡಲದಲ್ಲಿ ನದಿಯ ಹರಿವು ತೀವ್ರವಾಗಿ ಇಳಿದಿದೆ. ಜಿಲ್ಲೆಯ ಪ್ರಮುಖ ಪಟ್ಟಣಗಳಾದ ವಿರಾಜಪೇಟೆ, ಕುಶಾಲನಗರ ಮತ್ತು ನದಿಯಂಚಿನ ಬಹುತೇಕ ಗ್ರಾಮಗಳು ಕುಡಿಯಲು ಕಾವೇರಿ ನೀರನ್ನೇ ಅವಲಂಭಿಸಿದ್ದು, ಈಗಿನ ಪರಿಸ್ಥಿತಿ ಸ್ಥಳೀಯರನ್ನು ಆತಂಕಕ್ಕೆ ದೂಡಿದೆ.
ಸಾಮಾನ್ಯವಾಗಿ ವರ್ಷದಲ್ಲಿ ೬ ತಿಂಗಳು ಮಳೆಯಿಂದ ಕೂಡಿರುವ ಕೊಡಗಿನಲ್ಲಿ ಈ ವರ್ಷ ಬೇರೆಯದ್ದೇ ಸ್ಥಿತಿ ಕಂಡುಬರುತ್ತಿದೆ. ಈ ಮುಂಗಾರಿನಲ್ಲಿ ಶೇ. ೩೮ರಷ್ಟು ಮಳೆಯ ಕೊರತೆ ಜಿಲ್ಲೆಯನ್ನು ಕಾಡಿದೆ. ವಾಡಿಕೆಯ ೨,೭೨೭.೬ ಮಿಮೀ ಮಳೆಯಾಗಬೇಕಿದ್ದಲ್ಲಿ ೧,೬೮೯.೯ ಮಿಮೀ ಮಳೆ ಬಂದಿದೆ. ಜನವರಿ ಮತ್ತು ಸೆಪ್ಟೆಂಬರ್ ಹೊರತುಪಡಿಸಿದರೆ ಉಳಿದ ಎಲ್ಲಾ ತಿಂಗಳುಗಳಲ್ಲೂ ವಾಡಿಕೆಗಿಂತ ಕಡಿಮೆ ಮಳೆ ಬಂದಿದೆ. ಜೂನ್, ಜುಲೈ ಹಾಗೂ ಆಗಸ್ಟ್ನಲ್ಲಿ ಸುರಿಯುವ ಮಳೆಗೆ ಹೆಚ್ಚಿನ ಮಹತ್ವವಿದೆ. ಈ ಮೂರು ತಿಂಗಳಿನಲ್ಲಿ ಬರುವ ಮಳೆಯಿಂದ ಕೃಷಿ ಚುಟುವಟಿಕೆಗಳಿಗೆ ಅನುಕೂಲ ಆಗುವುದಲ್ಲದೆ ಭೂಮಿಯ ಅಂತರ್ಜಲ ಮಟ್ಟ ಏರಲೂ ಸಹಾಯ ಆಗುತ್ತದೆ.
