ದೀಪಾವಳಿ ಬಳಿಕ ಮೆಕ್ಕೆಜೋಳ ಕಟಾವು ಬಿರುಸು

ಕೃಷ್ಣಮೂರ್ತಿ ಪಿ.ಎಚ್. ಮಾಯಕೊಂಡ

ದಾವಣಗೆರೆ ತಾಲೂಕಿನ ಆನಗೋಡು, ಮಾಯಕೊಂಡ, ಅಣಜಿ ಹೋಬಳಿಗಳಲ್ಲಿ ಮುಂಗಾರು ಹಂಗಾಮಿನ ಮೆಕ್ಕೆಜೋಳ ಈಗಾಗಲೇ ಕಟಾವಿಗೆ ಬಂದಿದ್ದು ದೀಪಾವಳಿ ನಂತರ ಕಟಾವು ಬಿರುಸು ಪಡೆಯಲಿದೆ.

ಕಳೆದ ವಾರ ಉತ್ತಮ ಮಳೆಯಾಗಿದ್ದು ಮೆಕ್ಕೆಜೋಳ ಜಮೀನುಗಳಲ್ಲಿ ತೇವಾಂಶ ಇರುವುದರಿಂದ ಕಟಾವು ಮಾಡಿದ ನಂತರ ತೆನೆಗಳನ್ನು ಟ್ರ್ಯಾಕ್ಟರ್​ನಲ್ಲಿ ತುಂಬಿ ಹೊರಗೆ ತರುವುದು ಕಷ್ಟವಾಗುತ್ತದೆ ಎಂಬ ಕಾರಣಕ್ಕೆ ಸದ್ಯಕ್ಕೆ ನಿಧಾನಗತಿಯಲ್ಲಿ ಸಾಗಿದೆ.

ಈ ನಡುವೆ ಮೆಕ್ಕೆಜೋಳ ಕಟಾವಿಗೆ ಕೂಲಿ ಕಾರ್ವಿುಕರ ಸಮಸ್ಯೆ ಎದುರಾಗಿದೆ. ಅಡಕೆ ಕೀಳಲು, ಸುಲಿಯಲು ಹಾಗೂ ಕೆಲವರು ನಗರ ಪ್ರದೇಶಗಳಿಗೆ ಹೋಗಿರುವ ಹಿನ್ನೆಲೆಯಲ್ಲಿ ಕೂಲಿಕಾರರ ಕೊರತೆ ಕಾಣುತ್ತಿದೆ.

ಕಳೆದ ವರ್ಷ ಕೂಲಿಕಾರರು 10-12 ಜನರ ತಂಡ ಕಟ್ಟಿಕೊಂಡು ಆನಗೋಡು, ನೇರ್ಲಿಗೆ, ಕೊಡಗನೂರು, ಸುಲ್ತಾನಿಪುರ, ಗಂಗನಕಟ್ಟೆ, ಚಿನ್ನಸಮುದ್ರ, ಕಂದನ ಕೋವಿ, ಸಿದ್ದನೂರು, ಅಗಸನಕಟ್ಟೆ, ರುದ್ರನಕಟ್ಟೆ, ಹುಣಸೆಕಟ್ಟೆ, ಹಾಲುವರ್ತಿ, ಗುಡಾಳು, ಗುಮ್ಮನೂರು, ಮಂಡಲೂರು, ಕಾಟಿಹಳ್ಳಿ ನೀರ್ಥಡಿ, ಹೊನ್ನೂರು ಗ್ರಾಮಗಳಲ್ಲಿ ಗುತ್ತಿಗೆ ಲೆಕ್ಕದಲ್ಲಿ ಪ್ರತಿ ಎಕರೆಗೆ 2,500 ರೂ. ನಿಗದಿ ಮಾಡಿದ್ದರು. ಅದರಲ್ಲಿ ಮಹಿಳೆಯರಿಗೆ 300 ರೂ.,ಪುರುಷರಿಗೆ 400 ರೂ. ನಿಗದಿ ಆಗಿತ್ತು

ನರಗನಹಳ್ಳಿ, ದಿಂಡದಹಳ್ಳಿ, ಅಣ್ಣಾಪುರ, ಪರಶುರಾಂಪುರ, ಬೊಮ್ಮೇನಹಳ್ಳಿ, ಹೊನ್ನ ನಾಯಕನಹಳ್ಳಿ, ಮಾಯಕೊಂಡ, ಬಾವಿಹಾಳ್ ಇತರೆಡೆ ಪ್ರತಿ ಎಕರೆಗೆ ಗುತ್ತಿಗೆ ದರ 2800 ರೂ. ಹೇಳುತ್ತಿದ್ದಾರೆ.

ದಾವಣಗೆರೆ ಎಪಿಎಂಸಿ ಮಾರುಕಟ್ಟೆಯಲ್ಲಿ ಮೆಕ್ಕೆಜೋಳದ ಧಾರಣೆ ಪ್ರತಿ ಕ್ವಿಂಟಲ್​ಗೆ 1500- 2000 ರೂ. ನಡೆಯುತ್ತಿದೆ. ಮುಂದಿನ ದಿನಗಳಲ್ಲಿ ಉತ್ತಮ ಬೆಲೆ ಸಿಗಬಹುದು ಎನ್ನುವ ನಿರೀಕ್ಷೆಯಲ್ಲಿದ್ದಾರೆ ರೈತರು.

ಮಾಯಕೊಂಡ,ಆನಗೋಡಲ್ಲಿ ಸರ್ಕಾರ ಬೆಂಬಲ ಬೆಲೆಯೊಂದಿಗೆ ಖರೀದಿ ಕೇಂದ್ರಗಳನ್ನು ಸ್ಥಾಪಿಸಿದರೆ ನಗರ ಪ್ರದೇಶಗಳ ಮಾರುಕಟ್ಟೆಗಳಿಗೆ ಮೆಕ್ಕೆಜೋಳ ಸಾಗಿಸುವ ಖರ್ಚು ಉಳಿಯುತ್ತದೆ.