ಕುವೈತ್ನ ಮಂಗಾಫ್ನಲ್ಲಿ ಸಂಭವಿಸಿದ್ದ ಅಗ್ನಿ ದುರಂತದಲ್ಲಿ ಮಡಿದ ಭಾರತೀಯರ ಮೃತದೇಹ ಹೊತ್ತ ಸೇನಾ ವಿಮಾನ ಶುಕ್ರವಾರ ಕೊಚ್ಚಿ ನೆಡುಂಬಾಶ್ಯೇರಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಆಗಮಿಸುತ್ತಿದ್ದಂತೆ ನೆರೆದಿದ್ದವರ ಕಣ್ಣುಗಳು ತೇವಗೊಂಡಿತ್ತು. ವಿಮಾನದಿಂದ ಇಳಿಸಿದ ಮೃತದೇಹಗಳನ್ನು ಪ್ರತ್ಯೇಕ ಆಂಬುಲೆನ್ಸ್ಗಳ ಮೂಲಕ ಅವರ ಊರಿಗೆ ಕಳುಹಿಸಿಕೊಡಲಾಯಿತು. 23ಮಂದಿ ಕೇರಳೀಯರು ಸಹಿತ 45ಮಂದಿಯ ಮೃತದೇಹ ಕುವೈತ್ನಿಂದ ವಿಮಾನದಲ್ಲಿ ತರಲಾಗಿತ್ತು. ಉಳಿದ ಮೃತದೇಹಗಳೊಂದಿಗೆ ವಿಮಾನ ದೆಹಲಿಗೆ ವಾಪಸಾಗಿತ್ತು. ಕೊಚ್ಚಿ ವಿಮಾನ ನಿಲ್ದಾಣದಲ್ಲಿ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್, ಕೇಂದ್ರ ಸಚಿವ ಸುರೇಶ್ಗೋಪಿ ಹಾಗೂ ಇತರ ಮುಖಂಡರು ಅಂತಿಮ ನಮನ ಸಲ್ಲಿಸಿದರು. ಕಾಸರಗೋಡು ಚೆರ್ಕಳ ಸನಿಹದ ಕುಂಡಡ್ಕ ನಿವಾಸಿ ರಂಜಿತ್ ಹಾಗೂ ತೃಕ್ಕರಿಪುರ ಇಳಂಬಚ್ಚಿಯಲ್ಲಿ ವಾಸಿಸುತ್ತಿರುವ ಪಿ.ಕುಞಿಕೇಳು ನಾಯರ್ ಅವರ ಮೃತದೇಹಗಳನ್ನು ಊರಿಗೆ ತಲುಪಿಸಲಾಗಿದ್ದು, ಶುಕ್ರವಾರ ಸಂಜೆ ಅಂತ್ಯ ಸಂಸ್ಕಾರ ನಡೆಸಲಾಯಿತು.
