ಕುರುಗೋಡು ಜನರಿಗೆ ಕುಡಿವ ನೀರಿನ ಸಮಸ್ಯೆ: ಟಿ.ಬಿ.ಡ್ಯಾಮ್‌ನಿಂದ ಕೆರೆಗೆ ಹರಿಯದ ಜಲ

ಕುರುಗೋಡು: ಮುಂಗಾರು ಮಳೆ ಕೊರತೆಯಿಂದ ತುಂಗಭದ್ರಾ ಜಲಾಶಯಕ್ಕೆ ಒಳ ಹರಿವು ಹೆಚ್ಚಾಗದಿರುವುದು ಪಟ್ಟಣದ ಜನರ ಕುಡಿವ ನೀರಿನ ಸಮಸ್ಯೆಗೆ ಕಾರಣವಾಗಿದೆ.

ತುಂಗಭದ್ರಾ ಜಲಾಶಯದಲ್ಲಿ ಕೇವಲ ನಾಲ್ಕು ಅಡಿ ಬಾಕಿ ಇದೆ

ಪಟ್ಟಣಕ್ಕೆ ಪ್ರತಿದಿನ 6 ಲಕ್ಷ ಲೀಟರ್‌ನಂತೆ ನೀರು ಪೂರೈಕೆ ಮಾಡಲು ಯೋಜನೆ ರೂಪಿಸಿ 17 ಎಕರೆ ಪ್ರದೇಶದಲ್ಲಿ 2010ರಲ್ಲಿ ಕೆರೆ ನಿರ್ಮಿಸಿದ್ದು, ತುಂಗಭದ್ರಾ ಜಲಾಶಯದ ಕೆಳ ಮಟ್ಟದ ಕಾಲುವೆಯಿಂದ ನೀರು ಹರಿಸಲಾಗುತ್ತಿತ್ತು. ಪ್ರಸಕ್ತ ವರ್ಷ ಮುಂಗಾರು ವಿಳಂಬದಿಂದ ಕಾಲುವೆಗೆ ನೀರು ಹರಿಯದೆ ಕೆರೆ ಬರಿದಾಗುತ್ತಿದ್ದು, ಕೇವಲ ನಾಲ್ಕು ಅಡಿ ಬಾಕಿ ಇದೆ.

ಇದನ್ನೂ ಓದಿ: ಕುಡಿವ ನೀರಿನ ಸಮಸ್ಯೆ ಕೂಡಲೇ ಪರಿಹರಿಸಿ- ಸಚಿವ ಪ್ರಿಯಾಂಕ್ ಖರ್ಗೆ ಸೂಚನೆ

ಕೊಳವೆ ನೀರಲ್ಲಿ ಫ್ಲೋರೈಡ್ ಅಂಶ ಹೆಚ್ಚಾಗಿದ್ದು

ಸದ್ಯ ಎರಡ್ಮೂರು ದಿನಕ್ಕೊಮ್ಮೆ ಕುಡಿವ ನೀರು ಪೂರೈಸಲಾಗುತ್ತಿದೆ. ಪುರಸಭೆ ವ್ಯಾಪ್ತಿಗೆ ಒಳಪಡುವ ಬೋರ್‌ವೆಲ್‌ನಿಂದಲೂ ಪಟ್ಟಣದ ಜನರಿಗೆ ನೀರು ಪೂರೈಕೆ ಮಾಡಲಾಗುತ್ತಿದೆ. ಆದರೆ, ಬೋರ್‌ವೆಲ್ ನೀರು ಶುದ್ಧೀಕರಿಸದೆ ನೇರವಾಗಿ ಬಿಡಲಾಗುತ್ತಿದೆ. ಕೊಳವೆ ನೀರಲ್ಲಿ ಫ್ಲೋರೈಡ್ ಅಂಶ ಹೆಚ್ಚಾಗಿದ್ದು, ಜನರ ಆರೋಗ್ಯದ ಮೇಲೆ ಪರಿಣಾಮ ಬೀರಲಿದೆ. ಆದ್ದರಿಂದ ಶುದ್ಧೀಕರಿಸಿ ಪೂರೈಸಲು ಅಧಿಕಾರಿಗಳು ಮುಂದಾಗಬೇಕು ಎಂಬ ಒತ್ತಾಯ ಕೇಳಿಬಂದಿದೆ.

ಕುಡಿಯಲು ಫ್ಲೋರೈಡ್ ನೀರೇ ಗತಿ

ಕೆರೆಯಲ್ಲಿ ಸದ್ಯ ನಾಲ್ಕು ಅಡಿ ನೀರಿದ್ದು, ತಳ ಮಟ್ಟದಲ್ಲಿ ಪಾಚಿ, ಹೂಳು ಹೆಚ್ಚಾಗಿದೆ. ಅಲ್ಲದೆ ಜಲಚರಗಳಿಗೆ ಡೆಡ್ ಸ್ಟೋರೆಜ್ ಎಂದು ಕನಿಷ್ಠ 2 ಅಡಿ ಬಿಡಬೇಕಿದೆ. ಅಂದರೆ 4 ಅಡಿ ನೀರಲ್ಲಿ 2 ಅಡಿ ಮಾತ್ರ ಬಳಕೆಗೆ ಯೋಗ್ಯವಿದೆ. ಕೆರೆ ಬರಿದಾಗುವ ಮುಂಚೆ ಕಾಲುವೆಗೆ ನೀರು ಬಂದರೆ ಪಟ್ಟಣದ ಜನರಿಗೆ ನೀರಿನ ಸಮಸ್ಯೆ ನೀಗುತ್ತದೆ. ಇಲ್ಲವಾದರೆ ಪರದಾಡುವಂತಾಗಲಿದೆ. ಉಳ್ಳವರು ಖಾಸಗಿ ಆರ್‌ಒ ಘಟಕಗಳಲ್ಲಿ ನೀರು ಕೊಂಡು ಕುಡಿದರೆ, ಬಡವರು, ದಿನಗೂಲಿ ನೌಕರರು ಹಾಗೂ ಕಾರ್ಮಿಕರಿಗೆ ಫ್ಲೋರೈಡ್ ನೀರೇ ಗತಿಯಾಗಿದೆ.