ಕುರುಗೋಡು: ತಾಲೂಕಿನ ವಿವಿಧ ಶಾಲೆಗಳಲ್ಲಿ ಹಬ್ಬದ ವಾತಾವರಣ ಕಳೆಗಟ್ಟಿತ್ತು. ಕೆಲ ತಿಂಗಳಿಂದ ಮಕ್ಕಳಿಲ್ಲದೆ ಬಿಕೋ ಎನ್ನುತ್ತಿದ್ದ ಶಾಲಾ ಆವರಣ ಚಿಣ್ಣರ ಆಟದಿಂದ ಜೀವಕಳೆ ಪಡೆದಿತ್ತು. ಕುರುಗೋಡು, ಯಲ್ಲಾಪುರ, ದಮ್ಮೂರು, ಬಸಾಪುರ, ಗೆಣಿಕೆಹಾಳು, ಕಲ್ಲುಕಂಬ, ಬಾದನಹಟ್ಟಿ, ಚಾನಾಳ್, ಹಡ್ಲಿಗಿ ಸೇರಿದಂತೆ ವಿವಿಧ ಸರ್ಕಾರಿ ಜ್ಞಾನ ದೇಗುಲಗಳನ್ನು ಬೆಳಗ್ಗೆಯಿಂದಲೇ ರಂಗೋಲಿ, ತಳಿರು ತೋರಣ ಹಾಗೂ ವಿವಿಧ ಬಗೆಯ ಅಲಂಕಾರದಿಂದ ಸಿಂಗರಿಸಲಾಗಿತ್ತು. ಎಲ್ಕೆಜಿ, ಯುಕೆಜಿ, ಒಂದನೇ ತರಗತಿಗೆ ಪ್ರವೇಶ ಪಡೆಯಲು ಬಂದಿದ್ದ ಮಕ್ಕಳು, ಪಾಲಕರಿಗೆ ಶಿಕ್ಷಕರು ಹೂ ನೀಡಿ ವಿದ್ಯಾರ್ಥಿಗಳು ಬರ ಮಾಡಿಕೊಂಡರು. ಬಳಿಕ ಮಕ್ಕಳು ಸಿಹಿ ಖಾದ್ಯ ಸವಿದು ಖುಷಿಪಟ್ಟರು.
