ಅಕ್ಕಿಆಲೂರ: ಅಕ್ರಮ ಹಣ ವರ್ಗಾವಣೆ, ಗ್ರಾಮ ಮತ್ತು ವಾರ್ಡ್ ಸಭೆ ನಡೆಸದ ಹಿನ್ನೆಲೆಯಲ್ಲಿ ಸ್ಥಳಿಯ ಗ್ರಾಪಂ ಪಿಡಿಒ ಕುಮಾರ ಮಕರವಳ್ಳಿ ಅಮಾನತುಗೊಳಿಸಿ ಜಿಪಂ ಸಿಇಒ ರುಚಿ ಬಿಂದಲ್ ಆದೇಶಿಸಿದ್ದಾರೆ. ಪಟ್ಟಣದ ಮನೆಮನೆಗೆ ಇ&ಸ್ವತ್ತು ನಂಬರ್ ಇರುವ ಪ್ಲೇಟ್ ಅಳವಡಿಸಲು ಸಾರ್ವಜನಿಕರಿಂದ ಹಣ ವಸೂಲಿ ಮಾಡಲಾಗಿದೆ. ನಿಯಮಾನುಸಾರ ವಾರ್ಡ್ ಮತ್ತು ಗ್ರಾಮಸಭೆ ನಡೆಸಲಾಗುತ್ತಿಲ್ಲ ಎಂದು ಪಟ್ಟಣದ ನಿವಾಸಿ ಎಸ್.ಕೆ ಬೆಲ್ಲದ ನೀಡಿದ ದೂರಿನ ಹಿನ್ನೆಲೆಯಲ್ಲಿ ಅಮಾನತು ಮಾಡಲಾಗಿದೆ. ಕಳೆದ ಒಂದು ತಿಂಗಳ ಹಿಂದೆ ಖಾಸಗಿ ಸಂಸ್ಥೆಗೆ ಅವಕಾಶ ಕೊಟ್ಟು ಪಟ್ಟಣದ ಪ್ರತಿ ಮನೆಗೂ ಇ&ಸ್ವತ್ತಿನ ನಂಬರ್ ಪ್ಲೇಟ್ ಅಳವಡಿಸಲು ಸಾರ್ವಜನಿಕರಿಂದ 100 ರೂ. ಪಡೆಯಲಾಗುತ್ತಿದೆ ಎಂದು ವ್ಯಾಪಕ ಆರೋಪ ಕೇಳಿ ಬಂದಿತ್ತು. ಅಲ್ಲದೇ, ಗ್ರಾಪಂ ಆಡಳಿತದಲ್ಲಿ ಹೆಚ್ಚುವರಿ ಬಿಲ್ ಹಚ್ಚಿ ಅಕ್ರಮವಾಗಿ ಹಣ ಪಡೆದು ಭ್ರಷ್ಟಾಚಾರ ನಡೆಸಲಾಗುತ್ತಿದೆ. ಅವಧಿ ಮೀರಿದರೂ ಸಂತೆ ಟೆಂಡರ್ ಕರೆಯುತ್ತಿಲ್ಲ ಎಂದು ಗ್ರಾಪಂ ಸದಸ್ಯರು ಆರೋಪಿಸುತ್ತಿದ್ದರು. ಈ ಹಿನ್ನಲೆಯಲ್ಲಿ ತನಿಖೆ ನಡೆಸಿದ ಅಧಿಕಾರಿಗಳು ಪಂಚಾಯತ್ ರಾಜ್ಯ ವ್ಯವಸ್ಥೆಗೆ ಅನುಗುಣವಾಗಿ ಪಿಡಿಒ ಕಾರ್ಯನಿರ್ವಹಿಸಿಲ್ಲ. ಅಧಿಕಾರಿ ದುರ್ಬಳಕೆ ಮಾಡಿಕೊಂಡಿದ್ದಾರೆ ಎಂದು ಅ.27ರಂದು ಜಿಪಂ ಸಿಇಒ ರುಚಿ ಬಿಂದಲ್ ಆದೇಶ ನೀಡಿದ್ದಾರೆ.
