ಕೀರ್ತಿಕುಪ್ಪಗೆ ಬಂತು ಕೆಎಸ್​ಆರ್​ಟಿಸಿ ಬಸ್​

ಕೆಜಿಎಫ್​- ತಾಲೂಕಿನ ಕೀರ್ತಿಕುಪ್ಪ ಗ್ರಾಮಕ್ಕೆ ಬಸ್​ ಸಂಪರ್ಕವಿಲ್ಲದೇ ಶಾಲಾ&ಕಾಲೇಜು ವಿದ್ಯಾರ್ಥಿಗಳು, ವೃದ್ಧರಿಗೆ ತೊಂದರೆಯಾಗಿತ್ತು. ಈ ಬಗ್ಗೆ ಶಾಸಕಿ ರೂಪಕಲಾ ಅವರಿಗೆ ಗ್ರಾಮಸ್ಥರು ಮನವಿ ಮಾಡಿದ ಹಿನ್ನೆಲೆಯಲ್ಲಿ ಮಂಗಳವಾರ ಗ್ರಾಮಕ್ಕೆ ಬಂದ ಬಸ್​ಗೆ ಗ್ರಾಮಸ್ಥರು ಪೂಜೆ ಸಲ್ಲಿಸಿ ಸಂಭ್ರಮಾಚರಿಸಿದರು.

ಕೀರ್ತಿಕುಪ್ಪ ಗ್ರಾಪಂ ಸದಸ್ಯೆ ಗಾಯತ್ರಿ ಗಣೇಶ್​ ಮಾತನಾಡಿ, ಕಳೆದ 40 ವರ್ಷಗಳಿಂದ ಗ್ರಾಮಕ್ಕೆ ಸರ್ಕಾರಿ ಬಸ್​ ಬರದೇ ಇದ್ದುದರಿಂದ ಶಾಲಾ ಮಕ್ಕಳಿಗೆ, ವಯೋವೃದ್ಧರಿಗೆ, ಆಸ್ಪತ್ರೆಗೆ ಹೋಗುವವರಿಗೆ ತೊಂದರೆಯಾಗುತ್ತಿದ್ದು, ಗ್ರಾಮಕ್ಕೆ ಸರ್ಕಾರಿ ಬಸ್​ ಬೇಕು ಎಂದು ಶಾಸಕಿಗೆ ಮನವಿ ಸಲ್ಲಿಸಿದ ಹಿನ್ನೆಲೆಯಲ್ಲಿ ಬಸ್​ ಬಂದಿದೆ ಎಂದರು.

ಗ್ರಾಮವು ಕರ್ನಾಟಕ ಆಂಧ್ರ ಗಡಿ ಭಾಗದಲ್ಲಿದ್ದು, ಗ್ರಾಮದಲ್ಲಿ 100 ಮನೆಗಳಿವೆ. ಸುಮಾರು 50ಕ್ಕೂ ಹೆಚ್ಚು ಮಕ್ಕಳು ಕ್ಯಾಸಂಬಳ್ಳಿ ಹಾಗೂ ಕೆಜಿಎಫ್​ ನಗರಗಳಲ್ಲಿರುವ ಶಾಲೆಗಳಲ್ಲಿ ವ್ಯಾಸಂಗ ಮಾಡುತ್ತಿದ್ದು ಬಸ್​ ಇಲ್ಲದೇ ಪರದಾಡುವಂತಾಗಿತ್ತು ಎಂದರು.

ಬಸ್​ಗೆ ತೆರಳಬೇಕಾದರೆ ಮಕ್ಕಳು ನಿತ್ಯ 1 ಕಿ.ಮಿ ದೂರದಲ್ಲಿರುವ ಬಸ್​ ನಿಲ್ದಾಣಕ್ಕೆ ತೆರಳಬೇಕಿತ್ತು. ಮಳೆಗಾಲದಲ್ಲಿ ಮಕ್ಕಳು ಶಾಲೆಗಳಿಗೆ ತೆರಳಲು ಕಷ್ಟವಾಗುತಿತ್ತು. ಗ್ರಾಮದಲ್ಲಿರುವ ವೃದ್ಧರು ಹೆಂಗಸರು ಆಸ್ಪತ್ರೆಗಳಿಗೆ, ಮಾರುಕಟ್ಟೆಗೆ ಹೋಗಲು ಕಷ್ಟವಾಗುತ್ತಿತ್ತು. ಶಾಸಕಿ ಶಾಲಾ ವಿದ್ಯಾರ್ಥಿಗಳಿಗೆ ಅನುಕೂಲವಾಗುವಂತೆ ಬೆಳಗ್ಗೆ ಹಾಗೂ ಸಂಜೆ ಒಂದು ಟ್ರಿಪ್​ ಕಳುಹಿಸಬೇಕು ಎಂದು ಕೆಎಸ್​ಆರ್​ಟಿಸಿ ಅಧಿಕಾರಿಗಳಿಗೆ ಆದೇಶ ನೀಡಿದ ಮೇರೆಗೆ ಅಧಿಕಾರಿಗಳು ಬಸ್​ ಕಳುಹಿಸಿಕೊಟ್ಟಿದ್ದು ನಮಗೆ ಅನುಕೂಲವಾಗಿದೆ ಎಂದರು.