ಶೇಂಗಾಕ್ಕೆ ಟೆಂಡರ್ ಬರೆಯದ ದಲಾಲರು- ಕೊಟ್ಟೂರಿನಲ್ಲಿ ಪ್ರತಿಭಟನೆ

ಕೊಟ್ಟೂರು: ದಲಾಲರು ಶೇಂಗಾ ಟೆಂಡರ್ ಬರೆಯದ ಕಾರಣ ರೈತರು ಇಲ್ಲಿನ ಎಪಿಎಂಸಿ ಕಚೇರಿಗೆ ಮುತ್ತಿಗೆ ಹಾಕಿ ಮಂಗಳವಾರ ಪ್ರತಿಭಟನೆ ನಡೆಸಿದರು.

ಕಳೆದ ಮಂಗಳವಾರವೂ ಶೇಂಗಾ ಸ್ವಚ್ಛತೆ ಇಲ್ಲವೆಂದು ದಾಲಾಲರು ಟೆಂಟರ್ ಬರೆದಿರಲಿಲ್ಲ. ಆಗ ರೈತರು ಎಪಿಎಂಸಿ ಕಚೇರಿಗೆ ಮುತ್ತಿಗೆ ಹಾಕಿ ಪ್ರತಿಭಟನೆ ನಡೆಸಿದ್ದರು. ನಂತರ ಕೆಲ ಷರತ್ತುಗಳ ಮೇಲೆ ಟೆಂಡರ್ ಬರೆಯಲಾಗಿತ್ತು.

ಇದನ್ನೂ ಓದಿ: ಶೇಂಗಾ ಬೆಳೆಗೆ ಎಲೆಚುಕ್ಕಿ ರೋಗ: ರೈತ ಜಮೀನುಗಳಿಗೆ ಕೃಷಿ ಇಲಾಖೆ ಅಧಿಕಾರಿಗಳ ಭೇಟಿ

ಕೊಟ್ಟೂರು ತಾಲೂಕು ಸೇರಿ ಇತರೆ ಜಿಲ್ಲೆ ಮತ್ತು ತಾಲೂಕುಗಳಿಂದ ಇಲ್ಲಿನ ಮಾರುಕಟ್ಟೆಯಲ್ಲಿ ಸ್ಪರ್ಧಾತ್ಮಕ ಬೆಲೆಗೆ ಶೇಂಗಾ ಮಾರಾಟ ಮಾಡಲು ತಂದಿದ್ದರು. ಶೇಂಗಾ ಟೆಂಡರ್ ಆಗದ ಕಾರಣ ಮಾರುಕಟ್ಟೆಯಲ್ಲಿಯೇ 2 ಸಾವಿರಕ್ಕೂ ಹೆಚ್ಚು ಶೇಂಗಾ ಚೀಲಗಳನ್ನು ಇಲ್ಲಿಯೇ ಬಿಟ್ಟು ಹೋಗಿದ್ದಾರೆ.

ಖಾಸಗಿಯಾಗಿ ಸಭೆ ನಡೆಸಿದ ದಲಾಲರು ಮತ್ತು ಖರೀದಿದಾರರು

ದಲಾಲರು ಮತ್ತು ಖರೀದಿದಾರರು ಶನಿವಾರ ಖಾಸಗಿಯಾಗಿ ಸಭೆ ನಡೆಸಿ ಶೇಂಗಾ ಮಾರುಕಟ್ಟೆಗೆ ಯಾರು ಟೆಂಡರ್ ಬರೆಯಬಾರದು ಮತ್ತು ಖರೀದಿಸಬಾರದು ಎಂದು ತೀರ್ಮಾನ ಮಾಡಿದ್ದರು ಎನ್ನಲಾಗಿದೆ. ಈ ಕುರಿತು ಎಪಿಎಂಸಿ ಅಧ್ಯಕ್ಷರು ಮತ್ತು ಕಾರ್ಯದರ್ಶಿಗಳಿಗೆ ಯಾವುದೇ ಮಾಹಿತಿ ಇಲ್ಲ.

ಪೊಲೀಸರು ಬಿಗಿ ಬಂದೋಬಸ್ತ್

ಶೇಂಗಾ ಸ್ವಚ್ಛತೆ ಇಲ್ಲದ ಕಾರಣ, ದಾಲಾಲರು ಟೆಂಡರ್ ಬರೆಯದಿರುವುದು ಈ ಸಮಸ್ಯೆಗೆ ಮೂಲ ಕಾರಣವಾಗಿದೆ. ಯಾವುದೇ ಅಹಿತಕರ ಘಟನೆ ನಡೆಯದಂತೆ ಪೊಲೀಸರು ಬಿಗಿ ಬಂದೋಬಸ್ತ್ ಕೈಗೊಂಡಿದ್ದರು.