ಕೋಟೆಕಣಿ ರಸ್ತೆ ಸಂಚಾರ ದುಸ್ತರ : ನಗರಸಭೆಯ ನಿರ್ಲಕ್ಷ್ಯ ಧೋರಣೆಗೆ ಚಾಲಕರ ಅಸಮಾಧಾನ : ಪಾದಚಾರಿಗಳಿಗೂ ಸಂಕಷ್ಟ

ಕಾಸರಗೋಡು: ನಗರದ ಅತ್ಯಂತ ವಾಹನ ದಟ್ಟಣೆಯಿಂದ ಕೂಡಿದ ಹೊಸ ಬಸ್‌ನಿಲ್ದಾಣದಿಂದ ಕೋಟೆಕಣಿಗೆ ತೆರಳುವ ರಸ್ತೆ ಸಂಪೂರ್ಣ ಶಿಥಿಲಗೊಂಡಿದೆ. ಅಲ್ಲಲ್ಲಿ ಕುಸಿದಿರುವುದರಿಂದ ವಾಹನ ಸಂಚಾರದೊಂದಿಗೆ ಪಾದಚಾರಿಗಳ ಸಂಚಾರಕ್ಕೂ ತೊಡಕುಂಟಾಗುತ್ತಿದೆ.

ಮಳೆನೀರು ಹರಿಯಲು ನಿರ್ಮಿಸಲಾಗಿರುವ ಒಳಚರಂಡಿ ಅಲ್ಲಲ್ಲಿ ಕುಸಿದು ಹಾನಿಗೀಡಾಗಿದೆ. ಚರಂಡಿಗೆ ಅಳವಡಿಸಿದ್ದ ಸ್ಲ್ಯಾಬ್ ಗಳು ಕುಸಿದ ಪರಿಣಾಮ ವಾಹನಗಳ ಚಕ್ರ ಇದರೊಳಗೆ ಸಿಲುಕಿ ಸರಾಗ ಸಂಚಾರಕ್ಕೂ ತಡೆಯುಂಟಾಗುತ್ತಿದೆ. ಪಾದಚಾರಿಗಳ ಕಾಲುಗಳೂ ಸ್ಲ್ಯಾಬ್ ಸಂದಿಯಲ್ಲಿ ಸಿಲುಕಿ ಸಂಕಷ್ಟ ಎದುರಿಸಬೇಕಾಗುತ್ತಿದೆ. ಅಗಲ ಕಿರಿದಾದ ರಸ್ತೆ ಇದಾಗಿದ್ದು, ಒಳಚರಂಡಿ ವ್ಯವಸ್ಥೆಯೂ ಅಸ್ತವ್ಯಸ್ತಗೊಂಡಿದೆ. ಎರಡು ವಾಹನಗಳು ಮುಖಾಮುಖಿಯಾದಲ್ಲಿ ಚಾಲಕರು ಹರಸಾಹಸದಿಂದ ವಾಹನ ಚಲಾಯಿಸಬೇಕಾಗುತ್ತದೆ.

ರಾಮನಾಥ ಕ್ಷೇತ್ರ, ಇಗರ್ಜಿ, ಆಸ್ಪತ್ರೆ, ಸಭಾಂಗಣ ಸೇರಿದಂತೆ ನಾನಾ ಸಂಸ್ಥೆಗಳು ಇಲ್ಲಿ ಕಾರ್ಯಾಚರಿಸುತ್ತಿರುವುದರಿಂದ ಪ್ರಸಕ್ತ ರಸ್ತೆಯನ್ನು ಅಭಿವೃದ್ಧಿಪಡಿಸಲು ನಗರಸಭೆ ತುರ್ತು ಕ್ರಮ ಕೈಗೊಳ್ಳಬೇಕಾಗಿದೆ. ಕಾಸರಗೋಡು ಹೊಸ ಬಸ್ ನಿಲ್ದಾಣದಿಂದ ಕೋಟೆಕಣಿ ಹಾದಿಯಾಗಿ ಸಂಚರಿಸುವ ಈ ರಸ್ತೆ ಕರಂದಕ್ಕಾಡಿನಿಂದ ಮಧೂರು ಸಂಚರಿಸುವ ರಸ್ತೆಗೆ ಸಂಪರ್ಕ ಕಲ್ಪಿಸುತ್ತಿರುವುದರಿಂದ ಸೂರ್ಲು, ಮನ್ನಿಪ್ಪಾಡಿ, ಕೂಡ್ಲು ಪ್ರದೇಶಕ್ಕೆ ತೆರಳುವವರಿಗೆ ಹೆಚ್ಚು ಪ್ರಯೋಜನಕಾರಿಯಾಗಿದೆ.

ಈ ರಸ್ತೆಯ ಬಹುತೇಕ ಕಟ್ಟಡಗಳು ರಸ್ತೆ ಅಂಚಿನಲ್ಲಿದ್ದು, ರಸ್ತೆ ವಿಸ್ತರಣೆಗೆ ತೊಡಕಾಗುತ್ತಿವೆ. ರಸ್ತೆ, ಒಳಚರಂಡಿ ಸರಿಪಡಿಸುವುದರ ಜತೆಗೆ, ರಸ್ತೆ ಅಂಚಿಗೆ ಅಳವಡಿಸಿರುವ ವಿದ್ಯುತ್ ಕಂಬಗಳನ್ನು ತೆರವುಗೊಳಿಸಿ, ಅಲ್ಪ ದೂರ ಅಳವಡಿಸಲು ಕ್ರಮ ಕೈಗೊಳ್ಳುವುದರಿಂದ ರಸ್ತೆಯಲ್ಲಿನ ವಾಹನಗಳ ದಟ್ಟಣೆ ಪರಿಹರಿಸಿಕೊಳ್ಳಲು ಸಾಧ್ಯ ಎಂದು ಚಾಲಕರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಅಂಚಿನಲ್ಲಿವೆ ವಿದ್ಯುತ್ ಕಂಬಗಳು

ಕಾಸರಗೋಡು ನಗರಸಭೆಯ ಏಳನೇ ವಾರ್ಡ್‌ನ ಈ ರಸ್ತೆ ಸಂಪೂರ್ಣ ಹಾಳಾಗಿದೆ. ಒಂದೆಡೆ ಅಗಲ ಕಿರಿದಾದ ರಸ್ತೆ, ಇನ್ನೊಂದೆಡೆ ರಸ್ತೆ ಅಂಚಿಗೆ ಅಳವಡಿಸಿರುವ ವಿದ್ಯುತ್ ಕಂಬಗಳಿಂದ ವಾಹನ ಚಾಲಕರ ಪಾಲಿಗೆ ಮತ್ತಷ್ಟು ಸಂಕಷ್ಟ ಎದುರಾಗುತ್ತಿದೆ. ರಸ್ತೆ ಅಂಚಿಗೆ ಅಳವಡಿಸಿರುವ ವಿದ್ಯುತ್ ಕಂಬಗಳನ್ನು ತೆರವುಗೊಳಿಸಿ, ಸೂಕ್ತ ಒಳಚರಂಡಿಯೊಂದಿಗೆ ರಸ್ತೆ ನಿರ್ಮಿಸಿಕೊಡುವಂತೆ ಸ್ಥಳೀಯ ನಿವಾಸಿಗಳು ಆಗ್ರಹಿಸಿದ್ದಾರೆ.

https://www.vijayavani.net/gathering-of-senior-citizens

https://www.vijayavani.net/yaksharaksha-award-to-jayananda-sampaje