ಇತಿಹಾಸ: ಭಕ್ತರ ಹರಕೆಯನ್ನು ಕಾರ್ಯಸಿದ್ಧಿಗೊಳಿಸುವ ’ಶ್ರೀ ಕೋಟೆ ಮಾರಿಯಮ್ಮ’ ಮಡಿಕೇರಿ ನಗರದ ಹೃದಯ ಭಾಗದಲ್ಲಿ ಸುಮಾರು ೩೦೦ ವರ್ಷಗಳಿಂದ ನೆಲೆ ನಿಂತಿದ್ದಾಳೆ. ನಗರದಲ್ಲಿ ನಾಲ್ಕು ಶಕ್ತಿ ದೇವತೆಗಳಿವೆ. ಚೌಟಿ ಮಾರಿಯಮ್ಮ, ಕೋಟೆ ಮಾರಿಯಮ್ಮ, ದಂಡಿನ ಮಾರಿಯಮ್ಮ, ಮುತ್ತು ಮಾರಿಯಮ್ಮ. ಇವರೆಲ್ಲ ಸಹೋದರಿಯರು. ನಾಲ್ವರಲ್ಲಿ ಕೋಟೆ ಮಾರಿಯಮ್ಮ’ ಕೂಡ ಒಬ್ಬಳು. ಈ ನಾಲ್ವರು ಮೂಲತಃ ತಮಿಳುನಾಡಿವರು. ಸುಮಾರು ೩೦೦ ವರ್ಷಗಳ ಹಿಂದೆ, ಕೊಡಗು ರಾಜ್ಯವನ್ನು ರಾಜರು ಆಳ್ವಿಕೆ ನಡೆಸುತ್ತಿದ್ದ ಕಾಲವಾಗಿತ್ತು. ಈ ಸಂದರ್ಭದಲ್ಲಿ ಮಡಿಕೇರಿಯಲ್ಲಿ ವಿಪರೀತ ಕ್ಷಾಮ, ರೋಗ-ರುಜಿನಗಳು ಕಾಣಿಸಿಕೊಂಡಿದ್ದವು. ಅನೇಕ ಜನ ಮಾರಕ ಕಾಯಿಲೆಗಳಿಗೆ ಬಲಿಯಾಗಿದ್ದರು. ಇದರಿಂದ ಕಂಗಾಲಾದ ರಾಜ, ಇದಕ್ಕೆ ಪರಿಹಾರ ಕಂಡುಕೊಳ್ಳುವ ನಿಟ್ಟಿನಲ್ಲಿ ತಮಿಳುನಾಡಿನಿಂದ ನಾಲ್ವರು ಶಕ್ತಿದೇವತೆಗಳನ್ನು ಮಡಿಕೇರಿಯಲ್ಲಿ ಪ್ರತಿಷ್ಟಾಪಿಸಿದ್ದ. ಅದರಲ್ಲಿ ಕೋಟೆ ಮಾರಿಯಮ್ಮ’ ಕೂಡಾ ಒಬ್ಬಳಾಗಿದ್ದಾಳೆ.
