ಕೊರಡಹಳ್ಳಿ ರಸ್ತೆ ಗುಂಡಿಲೀ ಸಾಗದ ಬಂಡಿ, ಮಳೆಗಾಲದಲ್ಲಿ ಕೆಸರುಗದ್ದೆ, ಅಪಘಾತಗಳಿಗೆ ಆಹ್ವಾನ, ಜನಪ್ರತಿನಿಧಿಗಳ ವಿರುದ್ಧ ಗ್ರಾಮಸ್ಥರು ಗರಂ

ನಂದಗುಡಿ: ಶಿವನಾಪುರ ಗ್ರಾಪಂ ವ್ಯಾಪ್ತಿಯ ಕೊರಡಹಳ್ಳಿಯಲ್ಲಿ ಹಲವು ದಶಕಗಳಿಂದ ಸಮರ್ಪಕ ರಸ್ತೆ ಇಲ್ಲದೆ ಸಾರ್ವಜನಿಕರು ಪರದಾಡುವಂತಾಗಿದೆ. ಇಲ್ಲಿನ ರಸ್ತೆ ಗುಂಡಿಗಳಿಂದಾಗಿ ಬಂಡಿಗಳೂ ಸಾಗದಂತಹ ಪರಿಸ್ಥಿತಿ ಇದೆ. ಶಿವನಾಪುರ-ಚಿಕ್ಕನಹಳ್ಳಿ ಮಾರ್ಗವಾಗಿ ಕೋಲಾರ ರಾಷ್ಟ್ರಿಯ ಹೆದ್ದಾರಿಗೆ ಸಂಪರ್ಕ ಕಲ್ಪಿಸುವ ರಸ್ತೆಯಾಗಿದ್ದು, ಮಳೆ ಬಂದಾಗ ಕೆಸರುಗದ್ದೆಯಂತಾಗುತ್ತದೆ. ಇಲ್ಲಿ 45ಕ್ಕೂ ಅಧಿಕ ಮನೆಗಳಿದ್ದು, 200ಕ್ಕೂ ಹೆಚ್ಚು ಜನಸಂಖ್ಯೆ ಇದೆ. ಮುಖ್ಯರಸ್ತೆಯಿಂದ ಈ ಮನೆಗಳಿಗೆ ತೆರಳಬೇಕಾದರೆ ಯಾತನೆ ಅನುಭವಿಸಬೇಕಿದೆ.

ಮಕ್ಕಳು ಶಾಲೆಗೆ ತೆರಳಬೇಕಾದರೆ 3 ಕಿ.ಮೀ. ದೂರದಲ್ಲಿರುವ ಶಿವನಾಪುರಕ್ಕೆ ಮತ್ತು 5 ಕಿ.ಮೀ. ದೂರದಲ್ಲಿರುವ ನಂದಗುಡಿಗೆ ಸಾಗಬೇಕಿದೆ. ಮಳೆಗಾಲದಲ್ಲಿ ಕೆಸರುಗದ್ದೆಯಂತಾಗುವ ರಸ್ತೆಯಲ್ಲಿ ಬಿದ್ದು ಗಾಯಗೊಂಡಿರುವ ನಿದರ್ಶನಗಳಿವೆ ಎನ್ನುತ್ತಾರೆ ಗ್ರಾಮಸ್ಥರು.

ಆಗಿದ್ದು ಭೂಮಿ ಪೂಜೆ ಮಾತ್ರ: ರಸ್ತೆೆ ಅಭಿವೃದ್ಧಿ ಮಾಡಲು ಹಲವು ಬಾರಿ ಭೂಮಿ ಪೂಜೆಯೇನೋ ನೆರವೇರಿದೆ. ಆದರೆ ನಾನಾ ಕಾರಣಗಳಿಂದ ಕಾಮಗಾರಿ ನಡೆಯದೇ ನನೆಗುದಿಗೆ ಬಿದ್ದಿದೆ. ಇದರಲ್ಲಿ ರಾಜಕೀಯ ನಡೆಯುತ್ತಿದೆ ಎಂಬುದು ಗ್ರಾಮಸ್ಥರ ದೂರಾಗಿದೆ.

ಅನುದಾನವೂ ಇಲ್ಲ: ರಸ್ತೆ ದುರಸ್ತಿ ಬಗ್ಗೆ ಸ್ಥಳೀಯ ಶಾಸಕರಿಗೆ ಮನವಿ ಸಲ್ಲಿಸಿದರೂ ಕಾಳಜಿ ವಹಿಸಿಲ್ಲ. ತಾಪಂ, ಜಿಪಂ ಸದಸ್ಯರು ಚುನಾವಣೆ ಸಮಯದಲ್ಲಿ ಬಂದು ಹೋಗಿರುವುದು ಬಿಟ್ಟರೆ ಯಾವುದೇ ಅನುದಾನ ನೀಡಿಲ್ಲ ಎಂಬುದು ಗ್ರಾಮಸ್ಥರ ಆರೋಪವಾಗಿದೆ.