ತುಂಗಭದ್ರಾ ಜಲಾಶಯ ಗೇಟ್ ಮುನ್ನೆಚ್ಚರಿಕೆ ಮರೀಚಿಕೆ

ತ್ರಿವಳಿ ರಾಜ್ಯಗಳ ಅಕ್ಷಯಪಾತ್ರೆ ಮುನಿರಾಬಾದ್ ತುಂಗಭದ್ರಾ ಜಲಾಶಯದ ಗೇಟ್ ಬದಲಾವಣೆಗೆ ಟಿಬಿ ಬೋರ್ಡ್ ಮುಂದಾಗಿದೆ. ಗೇಟ್ ನಿರ್ವಹಣೆಯಲ್ಲಿ ನಿರ್ಲಕ್ಷ್ಯವಹಿಸಿ ವರ್ಷದ ಹಿಂದೆ ಜಲಾಶಯ ಅಪಾಯದ ಅಲಗಿಗೆ ಸಿಕ್ಕು ಕೂದಲೆಳೆ ಅಂತರದಲ್ಲಿ ಪಾರಾಗಿದೆ. ಈಗ ಮುನ್ನೆಚ್ಚರಿಕೆವಹಿಸದೆ 33 ಗೇಟ್ ಒಂದೇ ಬಾರಿಗೆ 10 ಅಡಿ ಕತ್ತರಿಸು ನಿರ್ಧಾರಿಸಿದ್ದು ಅಸಡ್ಡೆ ಮುಂದುವರೆದಿದೆ. ರಾಜ್ಯ ಸರ್ಕಾರವೂ ಬೋರ್ಡ್ ತಾಳಕ್ಕೆ ಕುಣಿಯುತ್ತಿದ್ದು, ರೈತರು, ಪ್ರಜ್ಞಾವಂತ ಅಧಿಕಾರಿಗಳ ಅಸಮಾಧಾನಕ್ಕೆ ಕಾರಣವಾಗಿದೆ.

1,633ಅಡಿ ಸಂಗ್ರಹ ಸಾಮರ್ಥ್ಯದ ಜಲಾಶಯದಲ್ಲಿ ಸದ್ಯ1,620 ಅಡಿ (63.998 ಟಿಎಂಸಿ) ನೀರಿದೆ. 1,613ಅಡಿಗೆ ಕ್ರಸ್ಟ್ ಗೇಟ್ ಅಳವಡಿಸಿದ್ದು, 9 ಅಡಿ ನೀರು ಖಾಲಿ ಆಗಬೇಕಿದೆ. ಕಾಲುವೆ, ನದಿ ಮೂಲಕ ಆಂಧ್ರಕ್ಕೆ 8 ಟಿಎಂಸಿ, ತೆಲಂಗಾಣ 3 ಟಿಎಂಸಿ‌ ನೀರು ಹರಿಸಲಾಗುತ್ತಿದೆ. ರಾಜ್ಯದ ಪಾಲಿನ 11ಟಿಎಂಸಿ ಅಡಿ‌ ನೀರು ಕಾಯ್ದಿರಿಸಲಾಗಿದೆ. ಎರಡನೇ ಬೆಳೆಗೆ ನೀರು ಹಂಚಿಕೆ ಕೈಬಿಡಲಾಗಿದೆ. ಬಾಕಿ ನೀರು ವಿತರಿಸಿಯೂ 40 ಟಿಎಂಸಿ ಉಳಿಯುವುದು. ಬರುವ ಮಳೆಗಾಲದವರೆಗೂ ಬಹುತೇಕ ಕ್ರಸ್ಟ್ ಗೇಟ್ ವರೆಗೆ ನೀರು ನಿಲ್ಲಲಿದೆ. ಒಂದೊಮ್ಮೆ ಮೇ ತಿಂಗಳ ಮೊದಲಾರ್ಧದಲ್ಲೇ ವರುಣ ಅಬ್ಬರಿಸಿದರೆ ಅಣೆಕಟ್ಟೆಗೆ ಒಳಹರಿವು ಹೆಚ್ಚುವುದು.

ಗೇಟ್ ಅಳವಡಿಕೆಯಲ್ಲಿ ಈಗಾಗಲೇ ಸಾಕಷ್ಟು ವಿಳಂಬವಾಗಿರುವುದರಿಂದ ಅವಸರಕ್ಕೆ ಬಿದ್ದ ಟಿಬಿಬಿ ಎಲ್ಲ ಗೇಟ್ ಗಳನ್ನು ತಲಾ 10 ಅಡಿಗಳಷ್ಟು ಕತ್ತರಿಸುತ್ತಿದೆ. 18ನೇ ಗೇಟ್ ಕಟ್ ಮಾಡಿದ್ದು, 20ನೇ ಗೇಟ್ ತುಂಡು ಮಾಡುವ ಕಾರ್ಯ ನಡೆದಿದೆ. ಎರಡು ತಂಡಗಳನ್ನು ನಿಯೋಜಿಸಿ ವಾರದಲ್ಲಿ ಎಲ್ಲ ಗೇಟ್ ಗಳನ್ನು ಕತ್ತರಿಸಲು ಗುತ್ತಿಗೆ ಕಂಪನಿ ಯೋಜಿಸಿದೆ. ಐದು ತಿಂಗಳಲ್ಲಿ 33 ಗೇಟ್ ಅಳವಡಿಕೆ ಸಾಧ್ಯವಾಗದಿದ್ದಲ್ಲಿ ಮತ್ತೆ ಅಪಾಯ ಎರಗಲಿದೆ. ಅರೆಬರೆ ಕಟ್ ಮಾಡಿದಲ್ಲಿ ಬಾಕಿ ಗೇಟ್ ಎತ್ತರಿಸುವುದು ಸವಾಲಿನ ಕೆಲಸ.

ಒಂದೆಡೆ ಜಲಾಶಯಕ್ಕೆ ಧಕ್ಕೆ ಆಗುವ ಅಪಾಯ ಮೈಮೇಲೆ ಎಳೆದುಕೊಂಡರೆ ಮತ್ತೊಂದೆಡೆ ಮುಂಗಾರು ಬೆಳೆಗೆ ನೀರು ಒದಗಿಸುವುದು ಕಠಿಣವಾಗಲಿದೆ. ಒಂದೇ ಹಂತದಲ್ಲಿ ಎಲ್ಲ ಗೇಟ್ ಕತ್ತರಿಸಿ ಇಳಿಸುವ ಸಾಹಸದ ಬದಲು ಗೇಟ್ ಗಳ ಸಾಮರ್ಥ್ಯ ಅನುಸಾರ 2-3 ಹಂತದಲ್ಲಿ ಹೊಸ ಗೇಟ್ ಅಳವಡಿಸಿದಲ್ಲಿ ಕಾರ್ಯಾಚರಣೆ ಸುಲಭ. ಬರುವ ಮುಂಗಾರು-ಹಿಂಗಾರು ಬೆಳೆಗಳಿಗೂ ನೀರು ಹೊಂದಾಣಿಕೆ ಸುಲಭ ಸಾಧ್ಯ ಎಂಬುದು ತಜ್ಞ ಇಂಜಿನಿಯರ್ ಗಳ ಅಂಬೋಣ.