ನಂಬರ್‌ಪ್ಲೇಟ್ ಇಲ್ಲದೇ ಮರಳು ಸಾಗಣೆ

ಕನಕಗಿರಿ: ನಂಬರ್ ಪ್ಲೇಟ್ ಇಲ್ಲದೆ ಮರಳು ತುಂಬಿಕೊಂಡು ಟಿಪ್ಪರ್‌ಗಳು ಸಂಚರಿಸುತ್ತಿದ್ದರೂ ಆರ್‌ಟಿಒ ಕ್ರಮಕ್ಕೆ ಮುಂದಾಗದಿರುವುದರ ಬಗ್ಗೆ ತಹಸೀಲ್ದಾರ್ ಚಂದ್ರಶೇಖರ ಗಾಳಿ ಅಸಮಾಧಾನ ಹೊರಹಾಕಿದರು.

ನಾನಾ ಬೇಡಿಕೆಗಳನ್ನು ಈಡೇರಿಸಲು ಆಗ್ರಹಿಸಿ ಕಳೆದ ಜ.27ರಂದು ವಿವಿಧ ಸಂಘಟನೆಗಳಿಂದ ನಡೆದ ಪಟ್ಟಣ ಬಂದ್‌ನ 11 ಅಂಶಗಳ ಕುರಿತು ಸಂಬಂಧಿಸಿದ ಇಲಾಖೆಯ ಅಧಿಕಾರಿಗಳು ಹಾಗೂ ಸಂಘ ಸಂಸ್ಥೆಗಳ ಪ್ರತಿನಿಧಿಗಳೊಂದಿಗೆ ಇಲ್ಲಿನ ತಾಪಂ ಸಭಾಂಗಣದಲ್ಲಿ ಹಮ್ಮಿಕೊಂಡಿದ್ದ ಸಭೆಯಲ್ಲಿ ಮಾತನಾಡಿದರು.

ಮಿತಿಗಿಂತ ಹೆಚ್ಚು ಭಾರ ಹೊತ್ತು ವಾಹನಗಳು ಸಾಗುತ್ತವೆ. ಇದರಿಂದ ರಸ್ತೆಗಳು ಹಾಳಾಗಿವೆ ಎಂಬ ದೂರು ಕೇಳಿಬಂದಾಗ ಆರ್‌ಟಿಒ ಕಚೇರಿ ಎಸ್‌ಡಿಎ ಸಂತೋಷ ಪ್ರತಿಕ್ರಿಯಿಸಿ, ಈ ಬಗ್ಗೆ 23 ಪ್ರಕರಣ ದಾಖಲಿಸಲಾಗಿದೆ ಎಂದರು.

ತಹಸೀಲ್ದಾರ್ ಚಂದ್ರಶೇಖರ ಗಾಳಿ ಮಾತನಾಡಿ, ಟಿಪ್ಪರ್‌ಗಳು ನಂಬರ್ ಪ್ಲೇಟ್ ಇಲ್ಲದೇ ಸಂಚರಿಸುವುದನ್ನು ನಾನೇ ಹಲವು ಬಾರಿ ನೋಡಿದ್ದೇನೆ. ಅಭಿವೃದ್ಧಿ ಕಾಮಗಾರಿ, ಮನೆ ಹಾಗೂ ಇತರೆ ನಿರ್ಮಾಣ ಕೆಲಸಗಳಿಗೆ ಮರಳು ಅವಶ್ಯ. ಮರಳು ಸಾಗಣೆ ತಡೆಯುವುದು ನನ್ನ ಉದ್ದೇಶವಲ್ಲ. ನಿಯಮಬದ್ಧ ಸಾಗಣೆ ಮಾಡಿ. ಅಪಘಾತವಾದರೆ ಹೇಗೆ ಗುರುತು ಪತ್ತೆ ಮಾಡುತ್ತೀರಿ? ಎಂದು ಆರ್‌ಟಿಒ ಸಿಬ್ಬಂದಿಗೆ ಪ್ರಶ್ನಿಸಿದರು.

ತಾಲೂಕು ಸಂಪೂರ್ಣ ನೀರಾವರಿಯಾಗಬೇಕು. ತೋಟಗಾರಿಕಾ ಪಾರ್ಕ್ ಆರಂಭಿಸಬೇಕು ಎನ್ನುವ ರೈತ ಸಂಘದ ಜಿಲ್ಲಾಧ್ಯಕ್ಷ ಗಣೇಶರೆಡ್ಡಿ ಪ್ರಶ್ನೆಗೆ ಇದು ಜಿಲ್ಲಾ ಮಟ್ಟದಲ್ಲಿ ಚರ್ಚೆಯಾಗಬೇಕು ಎಂದು ತಹಸೀಲ್ದಾರ್ ತಿಳಿಸಿದರು. ಕೊಪ್ಪಳ-ಕನಕಗಿರಿ ನಾನ್‌ಸ್ಟಾಪ್ ಬಸ್, ಬಸ್ ನಿಲ್ದಾಣವನ್ನು ಮೇಲ್ದರ್ಜೆಗೇರಿಸಬೇಕು ಎಂದು ಹಿಂದೂ ಕಾರ್ಯಕರ್ತ ಅಯ್ಯನಗೌಡ ಪ್ರಶ್ನಿಸಿದರು. ಡಿಪೋ ಮ್ಯಾನೇಜರ್ ಪ್ರವೀಣ ಮಾತನಾಡಿ, ಹೊಸ ಬಸ್‌ಗಳು ಬಂದ ನಂತರ ಆರಂಭಿಸಲಾಗುವುದು, ನಾನ್‌ಸ್ಟಾಪ್‌ಗಾಗಿ ಮೇಲಧಿಕಾರಿಗಳಿಗೆ ಪತ್ರ ಬರೆಯಲಾಗುವುದು ಎಂದರು.

ಕಳೆದ ಶೈಕ್ಷಣಿಕ ಸಾಲಿನಲ್ಲಿ ವಿದ್ಯಾರ್ಥಿಗಳಿಗೆ ಶೂ-ಸಾಕ್ಸ್ ಹಂಚದೇ, ವಿದ್ಯಾರ್ಥಿಗಳ ಬದಲು ಎನ್‌ಜಿಒಗೆ ರೂಮ್ ನೀಡಿದ ಹಾಗೂ ಕರ್ನಾಟಕ ದರ್ಶನಕ್ಕೆ ಮಕ್ಕಳನ್ನು ಕಳುಹಿಸದ, ಎಸ್ಸೆಸ್ಸೆಲ್ಸಿ ಪರೀಕ್ಷೆಗೆ ವಂಚಿತರನ್ನಾಗಿಸಿದವರ ವಿರುದ್ಧ ಕ್ರಮಕ್ಕೆ ಮುಂದಾಗಬೇಕು ಎಂದು ಯುವಕ ನೀಲಕಂಠ ಬಡಿಗೇರ, ಅಯ್ಯನಗೌಡ ಬಿಇಒಗೆ ಒತ್ತಾಯಿಸಿದರು.

ನುಣುಚಿಕೊಳ್ಳುವಂತಿಲ್ಲ: ಬಿಇಒ ನಟೇಶ ಪ್ರತಿಕ್ರಿಯಿಸಿ, ಶೂ ಸಾಕ್ಸ್ ಹಂಚಿಕೆಗೆ ಮಾಡದ ಬಸರಿಹಾಳ ಶಾಲೆಯ ಶಿಕ್ಷಕನ ವಿರುದ್ಧ ಕ್ರಮವಹಿಸಲಾಗುವುದು. ಕೆಪಿಎಸ್ ಶಾಲೆಯ ಶೂ ಸಾಕ್ಸ್ ಹಂಚಿಕೆ ವಿಷಯ ತನಿಖೆ ಹಂತದಲ್ಲಿದೆ ಎಂದರು. ಶಿಕ್ಷಕರ ಕೊರತೆ ನಡುವೆಯೂ ಹಲವು ಶಿಕ್ಷಕರು ಶಾಲೆಯಿಂದ ಹೊರಗುಳಿಯುತ್ತಿದ್ದು, ಬಡ ಮಕ್ಕಳಿಗೆ ಅನ್ಯಾಯವಾಗುತ್ತ್ತದೆ ಎಂದು ಗಣೇಶರೆಡ್ಡಿ, ಅಯ್ಯನಗೌಡ ಕೇಳಿದರು. ಹೊಸ ನಿಯಮ ಜಾರಿಯಲ್ಲಿದ್ದು, ಸಕಾಲಕ್ಕೆ ಫೋಟೊ ಅಪ್ಲೋಡ್ ಮಾಡಬೇಕು. ಇದರಿಂದ ಯಾರೇ ಕೆಲಸದಿಂದ ನುಣುಚಿಕೊಳ್ಳುವಂತಿಲ್ಲ ಎಂದು ತಹಸೀಲ್ದಾರ್ ಉತ್ತರಿಸಿದರು.

ಸಭೆಯಲ್ಲಿ ಕನಕಾಚಲ ದೇವಸ್ಥಾನದಿಂದ ಪುಷ್ಕರಣಿಗೆ ಇರುವ ಹಳ್ಳಕ್ಕೆ ತೂಗು ಸೇತುವೆ, ಕಲ್ಮಠ ಶಾಲೆಯ ಬಳಿ ಸೇತುವೆ ದುರಸ್ತಿ, ಕಾರ್ಯ, ತರಕಾರಿ ಮಾರುಕಟ್ಟೆಗೆ ರೈತಪರ, ಕನ್ನಡಪರ ಸೇರಿ ನಾನಾ ಸಂಘಟನೆಗಳಿಂದ ಆಗ್ರಹಿಸಲಾಯಿತು. ಪ್ರಮುಖರಾದ ಶರಣಪ್ಪ ಬಜಾರದ, ಮರಿಯಪ್ಪ ಹುಗ್ಗಿ, ಬಸವರಾಜ ಕೋರಿ, ಲೋಕೋಪಯೋಗಿ ಇಲಾಖೆ ಎಇಇ ವಿಶ್ವನಾಥ, ಜೆಸ್ಕಾಂ ಎಇಇ ಮಂಜುನಾಥ, ವೈದ್ಯಾಧಿಕಾರಿ ಶರಣಪ್ಪ ಚಕೋಟಿ, ನೋಂದಣಾಧಿಕಾರಿ ಸಂತೋಷ ಇತರರಿದ್ದರು.