ಕೊಪ್ಪಳ

ತಿಮ್ಮಕ್ಕನ ವನ ಅಭಿವೃದ್ಧಿ ಗೌಣ

ಸಾಲು ಮರದ ತಿಮ್ಮಕ್ಕ ವೃಕ್ಷ ವನದ ಹೋರ ನೋಟ.
ಸಾಲು ಮರದ ತಿಮ್ಮಕ್ಕ ವೃಕ್ಷ ವನದ ಹೋರ ನೋಟ.
ರವೀಂದ್ರ ರಡ್ಡಿ
Published on: 

ಪ್ರಮುಖ ಮುಖ್ಯಾಂಶಗಳು

  • ಪರಿಸರ ರಾಯಭಾರಿ ವನದಲ್ಲಿಲ್ಲಾ ಸೂಕ್ತ ಪರಿಸರ
ಕೊಪ್ಪಳ: ಶತಾಯುಷಿ, ಪರಿಸರ ರಾಯಭಾರಿ ಸಾಲುಮರದ ತಿಮ್ಮಕ್ಕನವರ ಸಾಧನೆಯನ್ನು ಸ್ಮರಿಸಲು ಸರ್ಕಾರ ಕೋಟಿ ಕೋಟಿ ಖರ್ಚು ಮಾಡಿ ನಿರ್ಮಿಸಿದ ಸಾಲುಮರದ ತಿಮ್ಮಕ್ಕ ಜಿಲ್ಲಾ ವನ ಇಂದು ಅಕ್ಷರಶ@ ಅನಾಥವಾಗಿದೆ. ಗಿಡ-ಮರಗಳ ನಡುವೆ ಪರಿಸರ ಪಾಠ ಕಲಿಯಬೇಕಿದ್ದ ತಾಣ, ಈಗ ನಿರ್ವಹಣೆಯಿಲ್ಲದೆ ಸೊರಗುತ್ತಿದ್ದು, ಅಕ್ರಮ ಚಟುವಟಿಕೆಗಳ ತಾಣವಾಗಿ ಮಾರ್ಪಡುತ್ತಿರುವುದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ.
ಕೊಪ್ಪಳದ ಹೋರ ವಲಯದಲ್ಲಿ ಸುಮಾರು 6-&8 ಕಿಮೀ ದೂರದ ರುದ್ರಾಪೂರ, ಹಿರೇಕಾಸನಕಂಡಿ, ಬೇವನಹಳ್ಳಿ ಮತ್ತು ಬಗನಾಳ ಸೀಮಾ ವ್ಯಾಪ್ತಯಲ್ಲಿ ಸುಮಾರು 60 ಎಕರೆ ವಿಸ್ತೀರ್ಣದಲ್ಲಿ 2018ರಲ್ಲಿ ಆರಂಭವಾದ ಈ ವನಕ್ಕೆ ಈಗ ಗ್ರಹಣ ಹಿಡಿದಿದೆ. ನಗರದ ಮಾಲಿನ್ಯ ತಡೆದು ಶುದ್ಧ ಗಾಳಿ ನೀಡಬೇಕಿದ್ದ ಉದ್ಯಾನದ ಮುಂದೆ ಇರುವ ಕಾರ್ಖಾನೆಯ ದುರ್ವಾಸನೆ ಜನರ ಮೂಗು ಮುಚ್ಚಿಸುವಂತೆ ಮಾಡಿದೆ. ಹಸಿರಿನಿಂದ ಕಂಗೊಳಿಸಬೇಕಿದ್ದ ವನದಲ್ಲಿ ಈಗ ಒಣಗಿದ ಗಿಡಗಳು ಮತ್ತು ಮುಳ್ಳಿನ ಪೊದೆಗಳು ಕಾಣಸಿಗುತ್ತವೆ.
ಲಕ್ಷಾಂತರ ರೂಪಾಯಿ ವೆಚ್ಚದಲ್ಲಿ ಅಂದು ಅಳವಡಿಸಲಾಗಿದ್ದ ಮಕ್ಕಳ ಆಟದ ಸಾಮಗ್ರಿಗಳು, ವಿಶ್ರಾಂತಿ ಆಸನಗಳು ಮತ್ತು ಬಿದಿರಿನ ಮನೆ ಇಂದು ಮುರಿದು ಬಿದ್ದಿವೆ. ಕಳೆದ 7&-8 ವರ್ಷಗಳಿಂದ ಇಲ್ಲಿ ಯಾವುದೇ ಅಭಿವೃದ್ಧಿ ಕಾರ್ಯ ನಡೆದಿಲ್ಲ ಎಂಬುದು ಎದ್ದು ಕಾಣುತ್ತಿದೆ. ಪಾರ್ಕ್​ ಮಧ್ಯದಲ್ಲಿ ಸಾಂಸತಿಕ ಕಾರ್ಯಕ್ರಮಗಳಿಗಾಗಿ ನಿರ್ಮಿಸಲಾದ ವೇದಿಕೆ ಈಗ ಕಾಡು ಪ್ರಾಣಿಗಳನ್ನು ಹಿಡಿಯುವ 'ಬೋನ್​' ಇಡುವ ಕೊಟ್ಟಿಗೆಯಂತಾಗಿರುವುದು ವಿಪರ್ಯಾಸ.

ಟಿಕೆಟ್​ ಹಣ ಎಲ್ಲಿಗೆ?

60 ಎಕರೆ ವಿಶಾಲವಾದ ಪ್ರದೇಶವನ್ನು ನಿರ್ವಹಿಸಲು ಇರುವುದು ಕೇವಲ ಇಬ್ಬರೇ ಸಿಬ್ಬಂದಿ. ಇವರಲ್ಲಿ ಒಬ್ಬರು ಟಿಕೆಟ್​ ಕಲೆಕ್ಷನ್​ನಲ್ಲಿ ನಿರತರಾದರೆ, ಮತ್ತೊಬ್ಬರು ಇಡೀ ಪಾರ್ಕ್​ ಕಾಯಬೇಕು. ಹೀಗಿರುವಾಗ ಸ್ವಚ್ಛತೆ ಮತ್ತು ಸುರಕ್ಷತೆ ಮರೀಚಿಕೆಯಾಗಿದೆ. ಪ್ರತಿ ವ್ಯಕ್ತಿಗೆ 20 ರೂ. ಟಿಕೆಟ್​ ಪಡೆದರೂ, ನಿತ್ಯ ಸುಮಾರು 2&-3 ಸಾವಿರ ರೂ. ಸಂಗ್ರಹವಾದರೂ ಪಾರ್ಕ್​ ಅಭಿವೃದ್ಧಿಗೆ ಬಳಸುತ್ತಿಲ್ಲ ಎಂಬ ಆರೋಪ ಕೇಳಿಬರುತ್ತಿದೆ. ಪಾರ್ಕ್​ ನಿರ್ವಹಣೆಗೆ ಅವಶ್ಯಕ ನೀರಿನ ಕೋರತೆಯಿಂದ ಇಡೀ ವನ ಬರಡು ಭೂಮಿತಂತೆ ಭಾಸವಾಗುತ್ತದೆ.
ಸರ್ಕಾರದಿಂದ ಅನುದಾನದ ಕೊರತೆಯಿದೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಸ್ಥಳಿಯ ಶಾಸಕರು ಮತ್ತು ಜಿಲ್ಲಾಡಳಿತ ವಿಶೇಷ ಆಸಕ್ತಿ ವಹಿಸಿ, ಹೆಚ್ಚಿನ ಸಿಬ್ಬಂದಿ ನೇಮಕ, ನೀರಿನ ಸೌಲಭ್ಯ ಮತ್ತು ಸಿಸಿಟಿವಿ ಕ್ಯಾಮೆರಾಗಳನ್ನು ಅಳವಡಿಸಿ ಈ ವನಕ್ಕೆ ಮರುಜೀವ ನೀಡಬೇಕಿದೆ.
===

ಪರಿಸರ ಪಾಠವಲ್ಲ ಪ್ರೇಮಪಾಠ

ತಿಮ್ಮಕ್ಕನವರ ಜೀವನ ಚರಿತ್ರೆ ಓದಿ ಮಕ್ಕಳು ಪ್ರೇರಿತರಾಗಬೇಕಿದ್ದ ಈ ವನ, ಈಗ ಕಾಲೇಜು ವಿದ್ಯಾರ್ಥಿಗಳ ಸರಸ-ಸಲ್ಲಾಪದ ಗೂಡಾಗಿದೆ. ಸಿಬ್ಬಂದಿ ಕೊರತೆಯ ಲಾಭ ಪಡೆಯುತ್ತಿರುವ ಪ್ರೇಮಿಗಳು, ಗಿಡಗಳ ಮರೆಯಲ್ಲಿ ಅಸಭ್ಯವಾಗಿ ವರ್ತಿಸುತ್ತಿರುವುದು ಕುಟುಂಬ ಸಮೇತ ಬರುವವರಿಗೆ ಮುಜುಗರ ಉಂಟುಮಾಡುತ್ತಿದೆ. ಜಿಲ್ಲಾಡಳಿತ ತಕ್ಷಣ ಎಚ್ಚೆತ್ತುಕೊಳ್ಳದಿದ್ದರೆ ಈ ವನ ಸಂಪೂರ್ಣ ಅಕ್ರಮ ಚಟುವಟಿಕೆಗಳ ಕೇಂದ್ರವಾಗುವುದರಲ್ಲಿ ಸಂಶಯವಿಲ್ಲ.
"

ಮರಗಳ ತಾಯಿಯ ಹೆಸರಿಟ್ಟ ಪಾರ್ಕ್​ ಹೀಗೆ ಸೊರಗುತ್ತಿರುವುದು ಜಿಲ್ಲೆಗೆ ಅವಮಾನ. ಇಲ್ಲಿ ಕೇವಲ ವಸೂಲಿ ನಡೆಯುತ್ತಿದೆ ಹೊರತು ಅಭಿವೃದ್ಧಿಯಲ್ಲ. ಪ್ರತಿದಿನ ಈ ಉಧ್ಯಾನವನದಲ್ಲಿ ಅಕ್ರಮ ಚಟುವಟಿಕೆಗಳು ನಡೆಯುತ್ತವೆ ಅನ್ನುವ ಗುಮಾನಿ ಸಹ ಕೇಳಿಬರುತ್ತಿದೆ, ಕಾಲೇಜು ವಿಧ್ಯಾರ್ಥಿ ಗಳಿಗೆ ನೆಚ್ಚಿನ ತಾಣವಾಗಿದೆ ಇವರ ಮೇಲೆ ನಿಗಾವಹಿಸಬೇಕು ಹಾಗೂ ತಕ್ಷಣ ಪೊಲೀಸರು ಗಸ್ತು ನಡೆಸಬೇಕು ಮತ್ತು ಹೆಚ್ಚಿನ ಸಿಬ್ಬಂದಿಗಳನ್ನು ನೇಮಿಸಬೇಕು.

"

ಮಕ್ಕಳು ಮತ್ತು ಸಾರ್ವಜನಿಕರಿಗೆ ಅವಶ್ಯವಿರುವ ಆಟೋಪಕರಣಗಳು ಇಲ್ಲದಿರುವುದು ನನ್ನ ಗಮನಕ್ಕೆ ಇಲ್ಲ. ಕಾಲೇಜು ವಿದ್ಯಾರ್ಥಿಗಳಿಗೆ ಯುನಿಫಾಮ್​ರ್ ಮೇಲೆ ಬರಬೇಡಿ ಎಂದು ಹೇಳಲು ನಮಗೆ ಯಾವುದೇ ಡೈರೆಕ್ಷನ್​ ಇಲ್ಲ. ಅಲ್ಲಿ ಸಂಗ್ರಹವಾಗುವ ಹಣದಿಂದ ಆದಷ್ಟು ನಿರ್ವಹಣೆ ಮಾಡುತ್ತಿದ್ದೇವೆ. ಈ ಎಲ್ಲಾ ಅಂಶಗಳನ್ನು ಮುಂದಿನ ಮ್ಯಾನೆಜ್​ಮೆಂಟ್​ ಕಮಿಟಿಯ ಸಭೆಯ ಗಮನಕ್ಕೆ ತರುತ್ತೇನೆ.

Koppal
Forest
Thimmakka
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net