ಕನಕಗಿರಿ ಉತ್ಸವಕ್ಕೆ ಸಿದ್ಧಪಡಿಸಿದ್ದ ವೇದಿಕೆ ತೆರವು

ಸಚಿವರು ಹಾಗೂ ಸಾರ್ವಜನಿಕರ ನಿರ್ಣಯದಂತೆ ಮೇ 14, 15ರಂದು ಕ್ರೀಡಾಕೂಟ ಹಾಗೂ 16, 17ರಂದು ಉತ್ಸವದ ಕಾರ್ಯಕ್ರಮ ನಡೆಯಬೇಕಿತ್ತು. ಇದಕ್ಕಾಗಿ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯಿಂದ 6 ಕೋಟಿ ರೂ. ಮಂಜೂರಾಗಿದ್ದು, ಒಂದು ವಾರದಿಂದ ಸಿದ್ಧತೆ ಕೈಗೊಳ್ಳಲಾಗಿತ್ತು.

ಈಗಾಗಲೇ ವೇದಿಕೆ ನಿರ್ಮಾಣ ಕಾರ್ಯ ಭರದಿಂದ ಸಾಗಿದ್ದು, ಊಟೋಪಚಾರಕ್ಕೆ ಆಹಾರ ಪದಾರ್ಥಗಳನ್ನು ದಾಸ್ತಾನು ಮಾಡಲಾಗಿತ್ತು. ಪ್ರಚಾರಕ್ಕಾಗಿ ಎಲ್ಲೆಡೆ ಬ್ಯಾನರ್, ಬಸ್ಸುಗಳಿಗೆ ಉತ್ಸವದ ಸ್ಟಿಕ್ಕರ್ ಸಹ ಅಂಟಿಸಲಾಗಿತ್ತು. ಆದರೆ, ಆಡಳಿತಾತ್ಮಕ ಕಾರಣದಿಂದ ಏಕಾಏಕಿ ಜೂ.10, 11ಕ್ಕೆ ಉತ್ಸವ ನಡೆಸಲಾಗುವುದು ಎಂದು ಜಿಲ್ಲಾಡಳಿತ ಘೋಷಣೆ ಮಾಡಿದೆ.

ಇದರಿಂದ ಅಳವಡಿಸಲಾಗಿದ್ದ ವೇದಿಕೆ, ಲೈಟಿಂಗ್‌ಗಳನ್ನು ಹಾಕಿದ್ದಕ್ಕಿಂತಲೂ ವೇಗವಾಗಿ ತೆರವು ಮಾಡಿ ಸಾಗಿಸಲಾಗಿದೆ.

ಜಿಲ್ಲಾಡಳಿತ ಆದೇಶದಂತೆ ನಿರ್ವಹಣೆ ಹೊತ್ತವರು ಕೋಟಿಗಟ್ಟಲೇ ಖರ್ಚು ಮಾಡಿದ್ದಾರೆ.

ಪಪಂ ಜೆಸಿಬಿಗಳಿಂದ ಮಾಡಿಸಿದ್ದ ಸ್ವಚ್ಛತೆ, ಪೌರ ಕಾರ್ಮಿಕರ ಹಾಗೂ ಲೋಕೋಪಯೋಗಿ ಇಲಾಖೆಯ ಕೆಲಸ ವ್ಯರ್ಥವಾಗಿದೆ. ಸರ್ಕಾರ ಮುಂದಿನ ದಿನಾಂಕ ನೀಡಿರುವುದು ಉತ್ಸವ ಆಚರಣೆ ಬಗ್ಗೆ ಜನರಲ್ಲಿದ್ದ ಉತ್ಸಾಹ ಕಳೆಗುಂದುವಂತೆ ಮಾಡಿದೆ.