ಜಾತ್ರೆ ನಿಮಿತ್ತ ದೇವಸ್ಥಾನವನ್ನು ಬಣ್ಣ ಬಳಿದು, ಹೂ, ವಿದ್ಯುತ್ ದೀಪಗಳು, ತಳಿರುತೋರಣದಿಂದ ಅಲಂಕರಿಸಲಾಗಿತ್ತು. ಬೆಳಗ್ಗೆ ದೇವತೆಯರಿಗೆ ಭಕ್ತರು ಮಡಿ ಉಡಿಯಿಂದ ನೈವೇದ್ಯ, ಉಡಿ, ಕಾಯಿ, ಕರ್ಪೂರ, ಹೂಗಳೊಂದಿಗೆ ಪೂಜೆ ಸಲ್ಲಿಸಿ ಹರಕೆ ತೀರಿಸಿದರು. ಕೆಲವರು ಜನಪದ ವಾದ್ಯ ಮೇಳದೊಂದಿಗೆ ದೀರ್ಘದಂಡ ನಮಸ್ಕಾರ ಹಾಕಿ ಭಕ್ತಿ ಅರ್ಪಿಸಿದರು.

ಈ ಭಾಗದಲ್ಲಿ ಪ್ರಸಿದ್ಧಿ ಪಡೆದ ಶಕ್ತಿ ದೇವತೆಗಳಾದ ಶ್ರೀ ದುರ್ಗಾಂಬೆ ಹಾಗೂ ಲಕ್ಕಾಂಬೆಯ ಜಾತ್ರೋತ್ಸವ ಜ.9ರವರೆಗೆ ಅದ್ದೂರಿಯಾಗಿ ನಡೆಯಲಿದೆ. ಪಿಎಸ್‌ಐ ಪ್ರಹ್ಲಾದ ನಾಯಕ ನೇತೃತ್ವದಲ್ಲಿ ಪೊಲೀಸ್ ಬಿಗಿ ಬಂದೋಬಸ್ತ್ ಒದಗಿಸಲಾಗಿದೆ.

ಬುಧವಾರ ಶ್ರೀದೇವಿಯರ ಗಂಗಾದರ್ಶನ ಹಾಗೂ ಜನಪದ ವಾದ್ಯಮೇಳದೊಂದಿಗೆ ಅಡ್ಡಪಲ್ಲಕ್ಕಿ ಮೆರವಣಿಗೆ ಗ್ರಾಮದ ಪ್ರಮುಖ ಬೀದಿಗಳಲ್ಲಿ ನಡೆಯಲಿದೆ. ನಂತರ ಅನ್ನಸಂತರ್ಪಣೆ, ರಾತ್ರಿ ನಾಟಕ ಪ್ರದರ್ಶನ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿದೆ.