'ನಿರಾಶ್ರಿತರಿಗೆ ಸೂರು’ ಸರ್ವೇ ಕಾರ್ಯಾರಂಭ

ಗಂಗಾವತಿ; ನಗರ ವ್ಯಾಪ್ತಿಯಲ್ಲಿರುವ ನಿರಾಶ್ರಿತರಿಗೆ ಸೂರು ಕಲ್ಪಿಸುವ ನಿಟ್ಟಿನಲ್ಲಿ ತಾಲೂಕಾಡಳಿತ ಸರ್ಕಾರಿ ಜಾಗದ ಸರ್ವೇಯನ್ನು ಕೈಗೆತ್ತಿಕೊಂಡಿದ್ದು, ಆರಂಭಿಕ ಒಂದು ಸಾವಿರ ನಿರಾಶ್ರಿತರಿಗೆ ನಿವೇಶನ ಒದಗಿಸುವ ನಿಟ್ಟಿನಲ್ಲಿ ಕಾರ್ಯಪ್ರವೃತ್ತವಾಗಿದೆ. ಪ್ರತಿ ಕ್ಷೇತ್ರದಲ್ಲೂ 5 ಸಾವಿರ ಮನೆಗಳನ್ನು ವಿತರಿಸುವ ನಿಟ್ಟಿನಲ್ಲಿ ರಾಜ್ಯ ಸರ್ಕಾರ ಯೋಜನೆ ರೂಪಿಸಿದ್ದು, ಸರ್ಕಾರಿ ಭೂಮಿ ಕಾಯ್ದಿರಿಸುವಂತೆ ಸುತ್ತೋಲೆ ಹೊರಡಿಸಿತ್ತು. ನಗರಸಭೆ ಮತ್ತು ಕಂದಾಯ ಅಧಿಕಾರಿಗಳ ತಂಡ ನಗರ ವ್ಯಾಪ್ತಿಯ ಸ.ನಂ.207, 53 ಮತ್ತು ವಿಪ್ರ ವ್ಯಾಪ್ತಿಯ ಸ.ನಂ.178ರ ಭೂಮಿಯಲ್ಲಿ ನಿವೇಶನ ರೂಪಿಸಲು ನಿರ್ಧರಿಸಿರುವ ಹಿನ್ನೆಲೆಯಲ್ಲಿ ಜಂಟಿ ಸರ್ವೇ ಕೈಗೊಳ್ಳಲಾಗಿದೆ.

ಈಗಾಗಲೇ ವಸತಿಗಾಗಿ 3,700 ಅರ್ಜಿಗಳು ಸಲ್ಲಿಕೆಯಾಗಿದ್ದು, ಕಳೆದ 25 ವರ್ಷಗಳಿಂದ ಯಾವುದೇ ನಿವೇಶನ ವಿತರಿಸಿಲ್ಲ. ಮೊದಲ ಹಂತದಲ್ಲಿ ಒಂದು ಸಾವಿರ ನಿವೇಶನ ರೂಪಿಸುವ ನಿಟ್ಟಿನಲ್ಲಿ ಪ್ರಭಾರ ಪೌರಾಯುಕ್ತ ರಾಮರೆಡ್ಡಿ ಪಾಟೀಲ್ ನೇತೃತ್ವದ ನಗರಸಭೆ ಮತ್ತು ಕಂದಾಯ ಅಧಿಕಾರಿಗಳ ತಂಡ ಸರ್ಕಾರಿ ಭೂಮಿಯನ್ನು ಗುರುತಿಸಿದ್ದು, ಕೃಷಿಯೇತರ ಭೂಮಿಯನ್ನಾಗಿ ಪರಿವರ್ತಿಸುವ ನಿಟ್ಟಿನಲ್ಲಿ ತಾಲೂಕಾಡಳಿತಕ್ಕೆ ಪ್ರಸ್ತಾವನೆ ಸಲ್ಲಿಸಲಿದೆ.

ಈ ಬಗ್ಗೆ ಪ್ರಭಾರ ಪೌರಾಯುಕ್ತ ರಾಮರೆಡ್ಡಿ ಪಾಟೀಲ್ ಮಾತನಾಡಿ, ನಗರ ಮತ್ತು ವಿಪ್ರ ಪ್ರದೇಶದಲ್ಲಿ 300 ಎಕರೆ ಸರ್ಕಾರಿ ಭೂಮಿ ಇರುವ ಮಾಹಿತಿಯಿದ್ದು, ಕಂದಾಯ ಸಿಬ್ಬಂದಿಯೊಂದಿಗೆ ಮೊದಲ ಹಂತದಲ್ಲಿ ಸರ್ವೇ ನಡೆಸಲಾಗುತ್ತಿದೆ. ನಗರಸಭೆಗೆ ವಸತಿ ಯೋಜನೆಗಾಗಿ ಸಲ್ಲಿಕೆಯಾದ ಅರ್ಜಿಗಳ ಪೈಕಿ 1000 ಅರ್ಜಿ ವಿಲೇವಾರಿ ಮಾಡಲು ನಿರ್ಧರಿಸಲಾಗಿದೆ. ಕಂದಾಯ ಮತ್ತು ನಗರಸಭೆ ಜಂಟಿಯಾಗಿ ಸರ್ವೇ ಕಾರ್ಯ ಕೈಗೆತ್ತಿಕೊಳ್ಳಲಾಗಿದೆ ಎಂದು ತಿಳಿಸಿದರು.

ಅತಿ ಹೆಚ್ಚು ಸಾಗುವಳಿ ಚೀಟಿ: ಸರ್ವೇ ಕೈಗೊಂಡ ಸರ್ಕಾರಿ ಜಾಗದಲ್ಲಿ ಕೆಲವು ಅಕ್ರಮವಾಗಿ ಸಾಗುವಳಿ ಚೀಟಿ ಪಡೆದುಕೊಂಡಿದ್ದು, ಈ ಬಗ್ಗೆ ತಾಲೂಕಾಡಳಿತ ಪರಿಶೀಲಿಸಬೇಕಿದೆ. ಅದರಲ್ಲೂ ಸ.ನಂ.207ರಲ್ಲಿ ಕೃಷಿ ಯೋಗ್ಯ ಭೂಮಿ ಇಲ್ಲದಿದ್ದರೂ ಸಾಗುವಳಿ ಚೀಟಿ ಪಡೆದವರ ಪಟ್ಟಿಯಿದೆ. ಪ್ರಭಾವಿಗಳಿಂದಲೇ ಜಾಗ ಒತ್ತುವರಿಯಾಗಿದ್ದು, ನಿರಾಶ್ರಿತರಿಗೆ ವಸತಿ ಯೋಜನೆಗಾಗಿ ಮೀಸಲಿಡುವ ನಗರಸಭೆ ಮತ್ತು ತಾಲೂಕಾಡಳಿತ ನಿರ್ಧಾರವನ್ನು ಸ್ವಾಗತಿಸಿರುವ ಜನರು, ವಿಳಂಬ ಮಾಡದೆ ಕಾಲಮಿತಿಯೊಳಗೆ ಕಾರ್ಯಪ್ರವೃತ್ತರಾಗಬೇಕೆಂದು ಒತ್ತಾಯಿಸಿದ್ದಾರೆ.