ಅಪ್ರಾಪ್ತಳ ಅತ್ಯಾಚರಕ್ಕೆ ಸಹಕರಿಸಿದವರಿಗೆ ಶಿಕ್ಷೆ

2020ರ ಅಕ್ಟೋಬರ್​ 14ರಂದು ತಾಲೂಕಿನ ಗ್ರಾಮವೊಂದರ ಬಾಲಕಿಯನ್ನು ಪಕ್ಕದ ಮನೆಯಲ್ಲಿ ವಾಸವಿದ್ದ ಪಂಜಾಬ್​ನ ಸರವನ್​ ಸಿಂಗ್​ ಎಂಬಾತ ಅಪಹರಿಸಿದ್ದ. ಪ್ರೀತಿಸುತ್ತಿದ್ದು ಮದುವೆ ಆಗುವೆ. ಬರದಿದ್ದರೆ ಗಲಾಟೆ ಮಾಡುವುದಾಗಿ ಹೆದರಿಸಿದ್ದ. ಬಳಿಕ ಜೋಬನ ಸಿಂಗ್​ ನೆರವಿನಿಂದ ಪಂಜಾಬ್​ ರಾಜ್ಯದ ಬಹಾನಿ ಬಡೆಸಾನ್​ ಗ್ರಾಮಕ್ಕೆ ಕರೆದೊಯ್ದಿದ್ದ. ನಂತರ ಜಸ್ವಂತ ಸಿಂಗ್​, ಸರಬ್ಬಿತ್​ ಸಿಂಗ್​ ಹಾಗೂ ಜಗತಾರ ಸಿಂಗ್​ ಸಹಾಯದಿಂದ ಬಾಲಕಿಗೆ 20 ವರ್ಷ ವಯಸ್ಸಾಗಿದೆ ಎಂದು ಕೋರ್ಟ್​ ಅಫಿಡವಿಟ್​ ಮಾಡಿಸಿದ್ದಾನೆ.

ಬಳಿಕ ಮದುವೆ ಮಾಡಿಕೊಂಡು ಅಮೃತಸರ ಪಟ್ಟಣದ ಸುಖಜ್ಯೋತಿ ಡಾಬಾದಲ್ಲಿ ವಾಸವಾಗಿ ಅತ್ಯಾಚಾರ ಎಸಗಿದ್ದ. ಈ ಸಂಬಂಧ ಕೊಪ್ಪಳ ಗ್ರಾಮೀಣ ಠಾಣೆಯಲ್ಲಿ ಅಪ್ರಾಪ್ತಳ ತಂದೆ ನೀಡಿದ ದೂರಿನ ಅನ್ವಯ ಪ್ರಕರಣ ದಾಖಲಾಗಿದೆ. ಎಎಸ್​ಐ ಶರಣಪ್ಪ ಅಂಗಡಿ ಪ್ರಾಥಮಿಕ ತನಿಖೆ ನಡೆಸಿದ್ದು, ಸಿಪಿಐ ರವಿ ಉಕ್ಕುಂದ ಹೆಚ್ಚಿನ ತನಿಖೆ ನಿರ್ವಹಿಸಿ ನ್ಯಾಯಾಲಯಕ್ಕೆ ದೋಷಾರೋಪಣೆ ಪಟ್ಟಿ ಸಲ್ಲಿಸಿದ್ದರು.

ವಿಚಾರಣೆ ಹಂತದಲ್ಲೇ ಅತ್ಯಾಚಾರ ಎಸಗಿದ ಸರವನ್​ ಸಿಂಗ್​ ಮೃತಪಟ್ಟಿದ್ದಾನೆ. ಆರೋಪ ಸಾಬೀತಾದ ಹಿನ್ನೆಲೆಯಲ್ಲಿ ಅತ್ಯಾಚಾರಕ್ಕೆ ಸಹಕರಿಸಿದ ಸರವನ್​ ಸಿಂಗ್​ ಸಹಚರರಾದ ಜೋಬನ್​ ಸಿಂಗ್​, ಜಸ್ವಂತ್​ ಸಿಂಗ್​, ಸರಬ್ಬಿತ್​ ಸಿಂಗ್​ ಹಾಗೂ ಜಗತಾರ್​ ಸಿಂಗ್​ಗೆ 20 ವರ್ಷ ಕಠಿಣ ಜೈಲು ಶಿಕ್ಷೆ ಹಾಗೂ 20 ಸಾವಿರ ರೂ. ದಂಡ ವಿಧಿಸಿ ನ್ಯಾಯಾಧೀಶ ಕುಮಾರ್​ ಡಿ.ಕೆ. ತೀರ್ಪು ನೀಡಿದ್ದಾರೆ. ಸರ್ಕಾರದ ಪರವಾಗಿ ವಿಶೇಷ ಸರ್ಕಾರಿ ಅಭಿಯೋಜಕಿ ಗೌರಮ್ಮ ದೇಸಾಯಿ ವಾದ ಮಂಡಿಸಿದ್ದಾರೆ.