ಕಾನೂನು ಪಾಲಿಸಲು ನೀನೇ ಬೇಕೆ..?

ಪುರಸಭೆ ಕಚೇರಿ ಮುಂದೆ ಕರ್ತವ್ಯ ಸ್ಥಗಿತಗೊಳಿಸಿ ದಿಢೀರ್ ಧರಣಿ ಕುಳಿತ ಮುಖ್ಯಾಧಿಕಾರಿ ಸಾಬಣ್ಣ ಕಟ್ಟಿಕಾರ್ ಹಾಗೂ ಸಿಬ್ಬಂದಿ, ಅಧ್ಯಕ್ಷ ಮಂಜುನಾಥ ಮೇಗೂರು ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿ ಧಿಕ್ಕಾರ ಕೂಗಿದರು. ಕಳೆದ ನಾಲ್ಕೈದು ತಿಂಗಳಿನಿಂದ ಆಡಳಿತಾತ್ಮಕ ವಿಚಾರದಲ್ಲಿಯೂ ನಿರಂತರ ಹಸ್ತಕ್ಷೇಪ ಮಾಡುತ್ತಿರುವ ಅಧ್ಯಕ್ಷ, ಪ್ರತಿ ಕೆಲಸಕ್ಕೂ ತಮ್ಮ ಅನುಮತಿ ಪಡೆದುಕೊಳ್ಳಬೇಕೆಂದು ಅಡ್ಡಿಯುಂಟು ಮಾಡುತ್ತಿದ್ದಾರೆ. ಅಲ್ಲದೇ, ತಾವು ಹೇಳಿದ ಕೆಲಸವನ್ನು ಯಾವುದೇ ಕಾನೂನು ಮತ್ತು ನಿಯಮಗಳನ್ನು ಪಾಲಿಸದೆಯೇ ಮಾಡಿಕೊಡಬೇಕು. ಕಾನೂನು ಪಾಲಿಸಲು ನೂರಾರು ಅಧಿಕಾರಿಗಳು ಸಿಗುತ್ತಾರೆ. ಅದಕ್ಕೆ ನೀನೇ ಬರಬೇಕಾಗಿಲ್ಲ. ನಾನು ಹೇಳಿದಂತೆ ಕೆಲಸ ಮಾಡಬೇಕು, ಇಲ್ಲವಾದಲ್ಲಿ ನನ್ನ ಅನುಮತಿಯಿಲ್ಲದೇ ಅದು ಹೇಗೆ ಕಾರಟಗಿಯಲ್ಲಿ ಕೆಲಸ ಮಾಡುತ್ತೀಯಾ ನಾನು ನೋಡುತ್ತೇನೆ? ಎಂಟು ದಿನಗಳಲ್ಲಿ ನಿಮ್ಮನ್ನು ಏನು ಮಾಡುತ್ತೇನೆ ನೋಡುತ್ತಿರಿ ಎಂದು ಬೆದರಿಕೆ ಹಾಕಿದ್ದಾರೆಂದು ಆರೋಪಿಸಿದರು. ಇನ್ನು, ಬ್ಯಾನರ್ ಅಳವಡಿಸಲು ಕೂಡಾ ಬೇಕಾದವರಿಗೆ ಯಾವುದೇ ಟ್ಯಾಕ್ಸ್ ಪಡೆಯುವಂತಿಲ್ಲ ಎಂದು ತಾಕೀತು ಮಾಡುತ್ತಿದ್ದಾರೆಂದು ಆರೋಪಿಸಿದರು.

ಒಂದು ಹಂತದಲ್ಲಿ ತೀವ್ರ ಆಕ್ರೋಶಗೊಂಡ ಮುಖ್ಯಾಧಿಕಾರಿ ಸಾಬಣ್ಣ, ಅಧ್ಯಕ್ಷ ಗೂಂಡಾ ವರ್ತನೆ ತೋರುತ್ತಿದ್ದು, ಗೂಂಡಾ ಅಧ್ಯಕ್ಷನಿಗೆ ಪುರಸಭೆ ಬರೆದುಕೊಟ್ಟಂತಾಗಿದೆ. ಇಲ್ಲಿ ಕೆಲಸವೇ ಮಾಡುವುದಿಲ್ಲ, ಈಗಾಗಲೇ ಜಿಲ್ಲಾಧಿಕಾರಿ ಗಮನಕ್ಕೆ ತಂದಿದ್ದು, ಇಲ್ಲಿಂದ ಮನೆ ಖಾಲಿ ಮಾಡಿಕೊಂಡು ಹೋಗುತ್ತೇನೆ ಎಂದು ಭಾವೋದ್ವೇಗಕ್ಕೊಳಗಾದರು. ಈ ವೇಳೆ ಸಚಿವ ತಂಗಡಗಿಯವರ ಆಪ್ತ ಸಹಾಯಕ ಹಾಗೂ ಕೆಲವರು ಮುಖ್ಯಾಧಿಕಾರಿಯನ್ನು ಸಮಾಧಾನಪಡಿಸಲು ಮುಂದಾದರು.