ಟಿಪ್ಪರ್‌ಗಳ ಓವರ್ ಲೋಡ್‌ಗೆ ತೆಡೆ ನೀಡಿ

ಗ್ರಾಮದಲ್ಲಿ ಹಾದು ಹೋಗಿರುವ ರಾಜ್ಯ ಹೆದ್ದಾರಿಯಲ್ಲಿ ನಿಗದಿತ ಪ್ರಮಾಣಕ್ಕಿಂತ ಹೆಚ್ಚಿನ ಪ್ರಮಾಣದ ಜಲ್ಲಿ, ಮರಮ್ ಸೇರಿ ಇತರ ಕಟ್ಟಡ ಸಲಕರಣೆಗಳನ್ನು ಹಾಕುತ್ತಿದ್ದು, ರಸ್ತೆಯಲ್ಲೆಲ್ಲ ಚೆಲ್ಲಾಡುತ್ತಿವೆ. ಇದರಿಂದ ಅಪಘಾತ ಪ್ರಮಾಣ ಹೆಚ್ಚುತ್ತಿದ್ದು, ದ್ವಿಚಕ್ರ ವಾಹನ ಸಂಚಾರಕ್ಕೆ ತೊಂದರೆಯಾಗಿದೆ. ರೋಸಿಹೋದ ಗ್ರಾಮಸ್ಥರು ವಾಹನಗಳನ್ನು ತಡೆದು ಆಕ್ರೋಶ ವ್ಯಕ್ತಪಡಿಸಿದರು.

ಮಹೇಶ ದಲಾಲ್ ಆಗಮಿಸಿ ವಾಹನಗಳ ಮೇಲೆ ಕ್ರಮ ಕೈಗೊಳ್ಳುವ ಬಗ್ಗೆ ತಿಳಿಸಿದ್ದರಿಂದ ಪ್ರತಿಭಟನೆ ಹಿಂಪಡೆಯಲಾಯಿತು. ಟೋಲ್ ಏಜೆನ್ಸಿಯರನ್ನು ಸ್ಥಳಕ್ಕೆ ಕರೆಯಿಸಿ ರಸ್ತೆ ತುಂಬೆಲ್ಲ ಬಿದ್ದಿದ್ದ ಜಲ್ಲಿ ಕಲ್ಲುಗಳನ್ನು ತೆರವುಗೊಳಿಸಲಾಯಿತು.

ವಕೀಲ ಶಿವರಾಜ ಡಂಬರ್ ಮಾತನಾಡಿ, ಜಲ್ಲಿ, ಮರಂ ಸಾಗಣೆ ಮಾಡುವ ಟಿಪ್ಪರ್‌ಗಳು ನಿಯಮ ಮೀರಿ ಓವರ್ ಲೋಡ್ ಮಾಡಿಕೊಂಡು ಸಂಚರಿಸುತ್ತಿವೆ. ಜನರ ಓಡಾಟ, ವಾಹನ ಸಂಚಾರ ಹೆಚ್ಚಿರುವ ಗ್ರಾಮದಲ್ಲಿ ವೇಗ ಮಿತಿ ಇಲ್ಲದೇ ಟಿಪ್ಪರ್‌ಗಳು ರಭಸವಾಗಿ ಸಂಚಾರ ಮಾಡುತ್ತಿವೆ. ಓವರ್ ಲೋಡ್‌ನಿಂದ ರಸ್ತೆಯಲ್ಲೆಲ್ಲ ಜಲ್ಲಿಕಲ್ಲು ಬಿದ್ದು ಸಂಚಾರಕ್ಕೆ ತೊಂದರೆಯಾಗಿದೆ. ಹಲವು ಬಾರಿ ಸಂಬಂಧಿಸಿದ ಅಧಿಕಾರಿಗಳ ಗಮನಕ್ಕೆ ತಂದರೂ ಕ್ರಮವಾಗಿಲ್ಲ. ಇದನ್ನು ಆರ್‌ಒ ಮತ್ತು ಕಂದಾಯ ಇಲಾಖೆ ಅಧಿಕಾರಿಗಳು ಗಂಭೀರವಾಗಿ ಪರಿಗಣಿಸಬೇಕಿದ್ದ, ಕ್ರಷರ್, ಟಿಪ್ಪರ್ ಮಾಲೀಕರಿಗೆ ನಿಯಮ ಪಾಲನೆಗೆ ನೋಟಿಸ್ ಜಾರಿ ಮಾಡಬೇಕು. ಓವರ್ ಲೋಡ್ ತಡೆಯಬೇಕು. ವಾಹನಗಳಿಂದ ವಸ್ತುಗಳು ಬೀಳದಂತೆ ತಾಡಪಾಲ್ ಅಥವಾ ಗ್ರೀನ್ ನೆಟ್ ಅಳವಡಿಸುವ ವ್ಯವಸ್ಥೆ ಮಾಡುವಂತೆ ಒತ್ತಾಯಿಸಿದರು.

ಬೀರಪ್ಪ, ಖಾಜಾವಲಿ, ಎನ್. ವೀರೇಶ, ಷಣ್ಮುಖ ಹತ್ತಿಮರದ, ಕೇಶಪ್ಪ, ದುರಗಪ್ಪ, ಹವಳೆ ಮಂಜುನಾಥ, ಕಿರಣ್ ಕುಮಾರ್, ಹನುಮೇಶ, ಮುರ್ತುಜಾಸಾಬ್, ಬಾಪುಸಾಬ್, ಹುಸೇನ್, ರಾಜಾಸಾಬ್ ಗುಮಗೇರಿ ಇತರರಿದ್ದರು.